Hɛsekiɛle 39

1<<Deniwalaŋ bu, gbala tia Gɔge na n ke yako nyiaa, <Nnɛ yaa Degbeŋgyoo Doŋ Pou Nyee ne yako, mee tia neŋ Gɔge, Mɛsɛke na Tubale kegyiise siamante. 2Maa lese n sia lee yenaŋ keŋ n sia tee nɛ, na maa wɔŋ neŋ. Maa mo neŋ lee naŋ ado yenaŋ na maa yela n kaa tia Iserae bulase. 3Na maa gyɔ n baŋdaŋ lee n demena dɔɔ na ke yela n baŋdaŋ nyeela ka lee n dunoluŋ man yala. 4Iserae bulase dɔɔ te, ɛmɛɛ na n yoonɔɔtena na tɛɛlese ŋan be kpuɛna neŋ nɛ ɛ ke yala. Maa mo ŋon yɛɛ weenɛɛ fa gyebuse baŋ bɛɛ dii naane na ŋaleman wonembia. 5Nyaŋ ke yala peŋteŋpereiŋ man, nawolo nyi ma te kolosi, Degbeŋgyoo Doŋ Pou Nyee torola yako. 6Maa too Magɔge na baŋ be kyaa ɛpo nɔɔse tɛɛle man wose kefɛɛ man nɛ, na baa gyeŋ nyi maŋ yɛna Degbeŋgyoo.

7< <<Maa yela me balaŋ Iseraetena ka gyeŋ ma yele fereŋkyeŋ keŋ be man. Mɔɔ gyae maa tekaa yela baa do ma yele fereŋkyeŋ keŋ ayimɛɛ ya, na tɛɛlese baŋ ka gyeŋ nyi maŋ Degbeŋgyoo yɛna Fereŋkyeŋte Iserae. 8Degbeŋgyoo Doŋ Pou Nyee kpa nyiaa, Kɛɛ kɔŋ! Ke gyae ke kɔŋ mɔ. Mena wee kei yaa me yako ke nombia.

9< <<Botɔɔ te baŋ be kyaa Iserae donɔɔse man nɛ, baa lee ka mo yoo abɔɔ ŋan do boalaŋ na baa too nyeele pampasaŋse, dinaana na buruburu ŋan na baŋdaŋ na baŋdaŋ nyeela, na yoo akpokpose na apiase. Baa mo ŋa do boalaŋ kulutooneŋ nyetooro (7). 10Bɔɔ gyae baa gyae daase lee wɔɔse yaa laaneŋ man ya, nawolo nyi baa mo yoo abɔɔ ŋan do boalaŋ. Baa kuu yooman abɔɔ lee baŋ bɔɔ kuu be yooman abɔɔ nɛ gyaŋ, na baa ŋmaa lee baŋ bɔɔ ŋmaa lee be gyaŋ nɛ, Degbeŋgyoo Doŋ Pou Nyee torola yako.

11< <<Mena wee kenaŋ nɛ maa fa Gɔge balaŋ dewue Iserae, detaŋgya keŋ doo gbɛɛ tɛɛra baŋ bɛɛ lee ɛpo weese dɛɛlee yenaŋ nɛ man. Ke gyae ke tɔ gbɛɛ tɛɛra gbɛɛ, nawolo nyi baa wuu Gɔge na ɔ balaŋ dikpii keŋ botɔɔ. Mena dɔɔ baa bake ke nyi Gɔge Hamɔn Detaŋgya.

12< <<Iseraetena baa mo gyaalaŋna nyetooro (7) wuu wɔ, na baa nyiŋ gberaa be tɛɛle keŋ. 13Tɛɛle keŋ man balaŋ pou baa wuu wɔ, te ma keyoodi wee gyae yɛɛ ketɔɔse wee, Degbeŋgyoo Doŋ Pou Nyee torola yako. 14Baa lese balaŋ see na baa gberaa tɛɛle keŋ wee kamasɛ. Baŋ na baale baa yaasee gyoo tɛɛle keŋ man ke kɛo, nyi be naa woya na baa wuu wɔ.

< <<Gyaalaŋna nyetooro ŋan wɔle nɛ, baa bese ke kɛo nideli bela. 15Nyi be dɔŋ tɛɛle keŋ man bɛɛ kɛo, te ŋolo de naa walaŋ ŋɔe nɛ, waa yɛɛ kagyene daale see ke tɛɛ kelii debaŋ keŋ baŋ bɛɛ wula yebɔɔse nɛ ba kaa wuu ke Hamɔn Gɔge Detaŋgya keŋ man, 16keŋ benaana donɔɔ keŋ bɛɛ baake ke nyi Hamona1 nɛ. mena te baa yɛɛ na baa gberaa tɛɛle keŋ.>

17<<Deniwalaŋ bu, nnɛ yaa Degbeŋgyoo Doŋ Pou Nyee ne yako, baake gyebuse kpookpoo na ŋaleman wonembia pou, <<Ɛ yilaa na ɛ ke gyaŋee lee yenaŋ kamasɛ kɔŋ kedeesa keŋ mɛɛ yɛɛ maa fa ŋon nɛ gyaŋ, kedeesa dinaa keŋ gyakaa Iserae bulase dɔɔ nɛ. Botɔɔ te ɛ ke tao naane na ɛ ke nyɔɔ fatabo. 18Ɛ ke tao yoonɔɔtena dinaana naane na ɛ ke nyɔɔ kegyiise baŋ be kyaa tɛɛle keŋ dɔɔ nɛ fatabo ŋgba namense baala, na namense bia, na asoose, na nunkyuese fatabo nɛ, be popou yɛɛ Basan wonembia baŋ be dana nuŋ. 19Kedeesa keŋ mɛɛ yɛɛ maa fa ŋon nɛ, ɛ ke tao nuŋse baa nideli na ɛ ke nyɔɔ fatabo dɛɛse. 20Dɛɛkyɔŋse, na dɛɛkyɔŋ kyaara, na baalabia na yoonɔɔtena kpookpoo naane gyae ke baa ŋon me nɔɔkedi keŋ tɛɛ, Degbeŋgyoo Doŋ Pou Nyee torola yako.

21<<Maa lese me gyoorobiiri debɔɔ tɛɛlese man, na tɛɛlese pou ke naa ma deŋele kewɔŋ na mena keŋ me dana doŋ. 22Lee wee kenaŋ ne gyuu nɛ, Iseraetena baa gyeŋ nyi maŋ yɛna Degbeŋgyoo be Wurubuarɛ. 23Na tɛɛlese ka gyeŋ nyi Iseraetena dukum dɔɔ te be gyuu yoogbeŋiri man, nawolo nyi be te di anokoare fa maŋ ya. Mena dɔɔ ma moo me sia weese wɔ te ma moo wɔ do be kɔlara nyiŋmaa man, te be popou yalawɔ yoosila nɔɔman. 24Me wɔŋa ba deŋele ŋgba mena keŋ ba ayimɛɛ na be dukum keyɛɛ doo nɛ, te ma moo me sia weese wɔ.

25<<Mena dɔɔ nnɛ yaa Degbeŋgyoo Doŋ Pou Nyee ne yako, nɛnɛɛ maa besena Yakɔbe see ɔ beneŋ man 2 na maa wii Iseraetena pou, te maa gyee ma yele fereŋkyeŋ keŋ. 26Be kɔŋ kaa kyaa be tɛɛle man wosefɛɛreŋ man keŋ ŋolo bɛɛ ŋmaase wɔ ya nɛ, baa wolee ba desɛŋ na anokoare keŋ be te dii fa maŋ ya nɛ pou. 27Nyi ma mo wɔ lee tɛɛlese ŋan man te me yilaa wɔ lee be kɔlara donɔɔse man nɛ, maa ta be dɔɔ lese ma fereŋkyeŋ keyɛɛ keŋ debɔɔ tɛɛlese burum siaman. 28Botɔɔ te baa gyeŋ nyi maŋ yɛna Degbeŋgyoo be Wurubuarɛ, doo nyi ma moo wɔ gyu yoogbeŋiri tɛɛlese man koraŋ nɛ, maa yilaa wɔ gyu baŋ gbagba be tɛɛle man, keŋ mɔɔ gyae maa tina ŋolo yela ya. 29Mɔɔ gyae maa tekaa mo me sia weese wɔ bela ya, nawolo nyi maa mo me Feliŋ do Iseraetena man, Degbeŋgyoo Doŋ Pou Nyee torola yako.>