Hɛsekiɛle 38

Degbeŋgyoo ke yoodi tɛɛlese dɔɔ

1Degbeŋgyoo yako maŋ nyiaa, 2<Deniwalaŋ bu, mo n sia tee Gɔge ŋon ɔ ba lee Magɔge tɛɛle man, Mɛsɛke na Tubale siamante ŋon, na n ke gbala tia e 3na n ke yako nyiaa, <<Nnɛ yaa Degbeŋgyoo Doŋ Pou Nyee ne yako, mee tia neŋ Gɔge, Mɛsɛke na Tubale siamante. 4Maa lese n sia lee yenaŋ keŋ n sia tee nɛ, na maa mo darawaase kyaŋ n kedaa na maa wɔŋ neŋ kpuna n yoonɔɔtena pou, n dɛɛkyɔŋse, na n dɛɛkyɔŋ kyaara baŋ bɔɔ bake gbegya, na n dikpii dinaa keŋ be dana nyeele pampasaŋse dinaana na buruburu keŋ be popou ne sara be yoosilase. 5Pesia, na Kusi na Pute baa kpuna wɔ, na be popou dana nyeele pampasaŋse na nyeele kotɔtɔɔse, 6Gomɛre na ɔ yoonɔɔtena na Bɛte Togarema na ɔ yoonɔɔtena baŋ bɔɔ lee naŋ ado yenaŋ, tɛɛlese burum baa kpuna ŋon.

7< <<Desina n wose, bake gbegya, na ɛmɛɛ na nya akpiise baŋ pou bɔɔ yilaa n gyaŋ nɛ ke ta be siaman. 8Weeya burum wɔle nɛ maa baake neŋ fa yoo. Kulutooneŋ ŋaale ne kɔŋ keŋ n ke gyu ke yoona tɛɛle keŋ bɔɔ nyiŋ ba wose lee yoo man, te bɔɔ yilaa be tɛɛlese gyu Iserae bulase ŋan ŋe wulaa ŋe doo yakaa nɛ dɔɔ. Ba moo wɔ lee tɛɛlese ŋenaŋ man, te nɛnɛɛ be popou kyaa wose kefɛɛ man. 9Ɛmɛɛ na ɛ yoonɔɔtena pou na tɛɛlese burum ŋan kpuɛna ŋon nɛ, ɛ ka gyeŋ gyu ɛ siaman ŋgba feliŋ dinaa nɛ, ɛ ke yɛɛ ŋgba debuŋta wuuna tɛɛle nɛ.

10< <<Nnɛ yaa Degbeŋgyoo Doŋ Pou Nyee ne yako, wee kenaŋ nombia burum gyae ke kɔŋ n nyee man na n ke bake nyeempɔ kum. 11Nyaŋ ke yako nyiaa, <<Maa gyu akuraase ŋan ba te baŋ akyaŋ kilisi ŋa ya nɛ man, maa gyu ke tuŋlaa wɔ na maa yoona balaŋ baŋ be kyaa wosefɛɛreŋ man, baŋ pou be kyaa botɔɔse ŋan akyaŋse yaa anaanɔɔse na nyeela bee gyee wɔ ya nɛ. 12Maa kuu yooman abɔɔ na maa ŋmaa abɔɔ na maa yoo tia donɔɔse ŋan ŋɔɔ yɛlɛɛ te bɔɔ bese baŋ ŋa, na balaŋ baŋ bɔɔ yilaawɔ lee tɛɛlese man, na baŋ bɔɔ nyiŋ ba wose lee donɔɔ man wonembia na abɔɔ man, te be kyaa tɛɛle keŋ n nsana nɛ. 13Seba na Dedane na Taresisi kebudiira na ŋa akuraase1 pou baa yako neŋ nyiaa, <<N te kɔŋ n kaa kuu yooman abɔɔ? N te yilaa nya akpiise kɔŋ ɛ kaa ŋmaa, na ɛ ka mo kɔba wolom na kɔba yayam laŋ, na ɛ ka mo donɔɔ man wonembia, na abɔɔ na ɛ ke lɛo yooman abɔɔ burum?>> >

14<Mena dɔɔ, deniwalaŋ bu, gbala na n ke yako Gɔge nyiaa, <<Nnɛ yaa Degbeŋgyoo Doŋ Pou Nyee ne yako, wee keŋ me balaŋ Iseraetena baa kyaa wosefɛɛreŋ man na, n be gyae n ka gyeŋ ke yee? 15N ka lee naŋ n dekyae adoyenaŋ kɔŋ, ɛmɛɛ na tɛɛlese burum, na be popou kyakɛɛ dɛɛkyɔŋse dɔɔ, dikpii dinaa na yoonɔɔtena burum. 16Nyaŋ ke yoo gyu n siaman ke tia me balaŋ Iseraetena ŋgba debuŋta wuuna tɛɛle nɛ. Gɔge, weeya ne kɔŋ, keŋ maa mo neŋ kaa tia me tɛɛle, te me tɛɛ n dɔɔ lese ma fereŋkyeŋ keŋ wola na, tɛɛlese baa gyeŋ maŋ.

17< <<Nnɛ yaa Degbeŋgyoo Doŋ Pou Nyee ne yako, nyaŋ yɛna walaŋ ŋon mɔɔ gbale ta ma somere gbalara baŋ bɔɔ lee Iserae dɔɔ kaalaŋ nɛ. Debaŋ kenaŋ nɛ, be gbalawɔ kulutooneŋ burum man nyi maa mo neŋ kaa tia wɔ. 18Nnɛ ne gyaela ke kɔŋ wee kenaŋ, nyi Gɔge de yoo tia Iserae tɛɛle nɛ, me baŋ nedoŋ gyae ka koro, Degbeŋgyoo Doŋ Pou Nyee torola yako. 19Me nuŋkurili baŋ na baŋ nedoŋ man te ma torowɔ yako nyi mena debaŋ kenaŋ na tɛɛle gyae ke wosi Iserae. 20Ɛpo man kpebia, na adido gyebuse, na ŋaleman wonembia, na wonembu kamasɛ ŋon ɔ ne tuuna tɛɛle, na balaŋ baŋ pou be kyaa tɛɛle kei dɔɔ nɛ baa seree me siaman. Bulase gyae ke kulii na tɛɛle bɔɔneŋ ke yɛlɛɛ na dekyaŋ kamasɛ ke yala tɛɛle man. 21Degbeŋgyoo Doŋ Pou Nyee ta toro yako nyi, maa yela yoosila ke tia Gɔge me bulase pou dɔɔ, ɔkamasɛ yoosila gyae ke tia ɔ dɛɛ. 22Maa mo kaweekum na balaŋ kakoe wɔŋ ɔ deŋele, maa yela ɔga dinaa ke ŋɛɛ na akpeleŋkpeleŋbia na kpatakpela keŋ ne kpaa nɛ ke yala baŋ na be yoonɔɔtena na tɛɛlese burum ŋan ŋe kpuɛna e nɛ dɔɔ. 23Mena te maa lese me wɔɔle na ma fereŋkyeŋ keyɛɛ wola na maa yela tɛɛlese ka gyeŋ maŋ. Botɔɔ te baa gyeŋ nyi maŋ yɛna Degbeŋgyoo.>>