Hɛsekiɛle 37

Ŋɔɔ awolɛɛ detaŋgya

1Na Degbeŋgyoo nyiŋmaa gyakaa me dɔɔ, te ɔ moo Degbeŋgyoo Feliŋ mo maŋ lee debɔɔ man te ɔ moo maŋ ka seŋ detaŋgya daale nsana, na ŋɔɔ te wulu ke. 2Ɔ moo maŋ kila ŋe man, te me naa ŋɔɔ burum ŋan doo detaŋgya keŋ man, ŋɔɔ ŋan ta wolo nideli. 3Te ɔ bɔɔse maŋ nyiaa, <<Deniwalaŋ bu, ŋɔɔ kɛŋa gyae ke tale nyiŋ nyeedoŋ?

Te me tiranɔɔ nyiaa, <Degbeŋgyoo Doŋ Pou Nyee, nyaageŋ gyeŋala.>>

4Keŋte ɔ yako maŋ nyiaa, <<Gbala fa ŋɔɔ kɛŋa na n ke yako ŋa nyi, <<Ɛmɛɛ ŋɔɔ ŋan ɛ ba wolo, ɛ nyii Degbeŋgyoo nombii! 5Nnɛ yaa Degbeŋgyoo Doŋ Pou Nyee ne yako ŋɔɔ kɛŋa, maa yela weesɛɛ kaa gyoo ɛ man, na ɛ ke nyiŋ nyeedoŋ. 6Maa mo wolase do ɛ man na maa mo wosenaane mataa ŋon na maa mo wose tɔne wuu ŋon. Maa mo weesɛɛ do ɛ man na ɛ ke nyiŋ nyeedoŋ. Botɔɔ te ɛ ka gyeŋ nyi maŋ yɛna Degbeŋgyoo.>> >

7Mena dɔɔ me gbalawɔ ŋgba mena keŋ ɔ be faedo maŋ nɛ. Me kɛɛ gbale nɛ me nyii yeesa ŋaale, kewosi yeesa, te ŋɔɔ ŋan kaa towaawɔ, ŋɔe towaawɔ na ŋɔe. 8Me kɛɛ na wolase na wosenaane ta lee ŋe dɔɔ, te wose tɔne kaa wuu ŋe dɔɔ mɔna weesɛɛ be doo ŋe man ya.

9Keŋte ɔ yako maŋ nyiaa, gbala fa weesɛɛ keŋ, deniwalaŋ bu, gbala na n ke yako ke nyiaa, <<Nnɛ yaa Degbeŋgyoo Doŋ Pou Nyee ne yako, weesɛɛ, lee feliŋse anaara ŋan man kɔŋ na n ka lee weesɛɛ do balaŋ kɛwɔ baŋ bɔɔ koo nɛ man na baa nyiŋ nyeedoŋ.>> > 10Mena dɔɔ me gbalawɔ ŋgba mena keŋ ɔ be faedo maŋ nɛ, te weesɛɛ gyoowɔ be man te be nyiŋa nyeedoŋ te ba korowɔ seŋ, yoonɔɔtena burum baale.

11Keŋte ɔ yako maŋ nyiaa, <Deniwalaŋ bu, mena ŋɔɔ kɛŋa seŋɛɛ fa Iseraetena. Bɛɛ yako nyi, <<De ŋɔɔ ta wolo te dɔɔ dana loo kegyakaa bela ya, ba te wɔlɛɛ daa kerekere.>> 12Mena dɔɔ gbala na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, me balaŋ maa gyuusu ɛ yebɔɔse na maa lese ŋon lee ŋe man, maa besena ŋon kɔŋ Iserae tɛɛle keŋ man. 13Nyi me gyuusu ɛ yebɔɔse te ma lese ŋon lee ŋe man nɛ, botɔɔ te ɛmɛɛ me balaŋ ɛ ka gyeŋ nyi maŋ yɛna Degbeŋgyoo. 14Maa mo me Feliŋ do ɛ man na ɛ ke nyiŋ nyeedoŋ, na maa yela ɛ ke kyaa ɛmɛɛ gbagba ɛ tɛɛle man. Botɔɔ te ɛ ka gyeŋ nyi maŋ Degbeŋgyoo te kolosi te me yɛɛ ke, Degbeŋgyoo torola yako.>> >

Tɛɛle dokoloŋ doo gyoo dokoloŋ tɛɛ

15Degbeŋgyoo yako maŋ nyiaa, 16<Deniwalaŋ bu, mo daŋ na n ke ŋmarase gyakaa ke dɔɔ nyi, <<Ke yɛɛ Yuda na Iseraetena baŋ be kpuɛna e nɛ wui.>> Na n ka bese mo daŋ wɔle, na n ke ŋmarase ke dɔɔ nyiaa, <<Ke yɛɛ Yosɛfo (keŋ yɛɛ Eferam wui) na Iseraetena baŋ pou be kpuɛna e nɛ wui.>> 17Mo ŋa towaa na ŋa ke yɛɛ daŋ dokoloŋ n nyiŋmaa man.

18<Nyi n balaŋ de bɔɔse neŋ nyi, <<N ba wola daa kpene keŋ kei na wolo yee?>> nɛ 19yako wɔ nyiaa <Nnɛ yaa Degbeŋgyoo Doŋ Pou Nyee ne yako, kɛɛ mɛɛ gyu me kaa mo Yosɛfo daŋ keŋ do Eferam nyiŋmaa man na baŋ be kpuɛna Iserae dekpaŋalaŋ ne wui towaana Yuda daŋ. Maa mo ŋa towaa yɛɛ daŋ dokoloŋ, na ŋa ke yɛɛ dokoloŋ me nyiŋmaa man.> 20Kyaŋ daase ŋan n be ŋmarase gyakaa ŋe dɔɔ nɛ be siaman, 21na n ke yako wɔ nyiaa, <Nnɛ yaa Degbeŋgyoo Doŋ Pou Nyee ne yako, maa lese Iseraetena lee tɛɛlese ŋan bɔɔ gyu ne man. Maa yilaa wɔ lee yenaase na maa mo wɔ kɔŋ baŋ gbagba be tɛɛle man. 22Maa yɛɛ wɔ tɛɛle dokoloŋ tɛɛle keŋ man Iserae bulase dɔɔ. Gyoo dokoloŋ ne gyaela waa di be popou dɔɔ te bɔɔ gyae baa yɛɛ tɛɛlese ala yaa baa kpase yɛɛ gyooridediise ala bela ya. 23Bɔɔ gyae baa tekaa mo be bɛɛneŋ yaa be duwaare dinɔɔse yaa be nombia kumɛɛ waalaa ba wose bela ya. Nawolo nyi maa lɛɛ wɔ lee be nombiakumɛɛ ŋan pou ne yele bɛɛ lee wɔle nɛ man na maa gberaa wɔ. Baa bese me balaŋ na maŋ mɔ ka bese be Wurubuarɛ.

24< <<Ma somere Dawide waa di gyoori be dɔɔ, na be popou ke nyiŋ namensekɛɛlere dokoloŋ. Baa sila maŋ mmaraase na baa kɛɛ nideli di me kawolase dɔɔ. 25Baa kyaa tɛɛle keŋ mɔɔ mo fa ma somere Yakɔbe te be naanaɔ be kyaa ke man nɛ man. Baŋ na be bia na be naana naanasebia baa kyaa botɔɔ kekpaakekpaa, te ma somere Dawide waa yɛɛ be siamante kekpaakekpaa. 26Daa na wɔ dɛɛ yɛɛ wosefɛɛreŋ nɔɔkebakesee, ke gyae ke yɛɛ nɔɔkebakesee keŋ gyae ke doo kekpaakekpaa. Maa yela baa kyaa gbeli na be yaanɔɔle ke wuku, na maa baŋ ma fereŋkyeŋ keŋ be man kekpaakekpaa. 27Ma dekyae gyae ke doo be man, maa yɛɛ be Wurubuarɛ na baa yɛɛ me balaŋ. 28Nyi ma fereŋkyeŋ keŋ de doo be man kekpaakekpaa nɛ, tɛɛlese baa gyeŋ nyi maŋ Degbeŋgyoo yɛɛna Iserae fereŋkyeŋ.>> >