Hɛsekiɛle 36

Loo kegyakaa fa Iserae bulase

1<Deniwalaŋ bu, gbala yako Iserae bulase ŋan na n ke yako nyiaa, <<Iserae bulase, ɛ nyii Degbeŋgyoo nombii. 2Nnɛ yaa Degbeŋgyoo Doŋ Pou Nyee ne yako. Kɔlare ŋon yakowɔ lee ɛ wose man nyiaa, <Mbo! Beneŋ dakoreese ŋan te kaa bese de wui.> >> 3Mena dɔɔ gbala na n ke yako nyiaa, <<Nnɛ yaa Degbeŋgyoo Doŋ Pou Nyee ne yako, lee keŋ bɔɔ yoo ŋon te bɔɔ wɔlɛɛ ŋon yenaŋ kamasɛ na ɛ ke nyiŋ bese tɛɛlese akaŋ wui, na balaŋ nɔɔse ke doo ɛ dɔɔ, na baa wɔlɛɛ ŋon dii akɛrɛɛ gyakaa ɛ dɔɔ dɔɔ nɛ, 4ɛmɛɛ Iserae bulase, ɛ nyii Degbeŋgyoo Doŋ Pou Nyee nombii, nnɛ yaa Degbeŋgyoo Doŋ Pou Nyee ne yako bulase na bulasebia na akyoloŋkyoloŋse na ataŋgyase na donɔɔse ŋan ŋɔɔ wɔlɛɛ na donɔɔse ŋan ŋe doo yakaa, te bɔɔ kuu ŋa ŋgba yoo abɔɔ te tɛɛlese akaŋ ŋan be kilisi ŋa na boŋo ŋa nɛ, 5nnɛ yaa Degbeŋgyoo Doŋ Pou Nyee ne yako, maa kolosi tia Iserae tɛɛlese akaŋ ŋan na Ɛdom lee me baŋ nedoŋ man, lee ba kenyaŋee na nombiakumɛɛ ŋan doo be konɔɔse man dɔɔ ba moo me tɛɛle bese be wui, na baa nyiŋ mo ke wonembia deedii ŋgba yooman abɔɔ nɛ.>> 6Mena dɔɔ gbala lee Iserae tɛɛle wose man na n ke yako bulase na bulasebia na akyoloŋkyoloŋse na ataŋgyase ŋan nyiaa, <<Nnɛ yaa Degbeŋgyoo Doŋ Pou Nyee ne yako, <Mee kolosi me nuŋkurili baŋ man lee keŋ ɛ be kaana tɛɛlese kekulu dɔɔ. 7Mena dɔɔ nnɛ yaa Degbeŋgyoo Doŋ Pou Nyee ne yako, me te gyina me nyiŋmaa kaŋ ntam nyi baa kulu tɛɛlese ŋan be kilisi ŋon nɛ mɔ.

8< <<Mɔna ɛmɛɛ Iserae bulase, ɛ ka lese gbasase na ɛ ka se bia fa me balaŋ Iserae, nawolo nyi be gyae ke kyare ya baa kɔŋ dɛɛ. 9Maa kɛɛ ɛ dɔɔ na maa boele ŋon, baa fara ŋon na baa duu abɔɔ bia ɛ dɔɔ, 10te maa yela balaŋ burum kaa kyaa ɛ man, ayi, Iseraetena pou. Baa kyaa donɔɔse ŋan man na baa desina ŋan be yɛlɛɛ nɛ baŋee. 11Maa yela balaŋ na wonembia baŋ be kyaa ɛ man nɛ yaanɔɔle ka bo, baa lolee na baa wuku. Maa yela balaŋ kaa kyaa n man ŋgba beneŋ keŋ nɛ, na maa yela n ke de kela beneŋ keŋ. Botɔɔ te ɛ ka gyeŋ nyi maŋ yɛna Degbeŋgyoo. 12Maa yela balaŋ, me balaŋ Iseraetena kaa kyaa n man. Nyaŋ ka bese be wui na n ka bese be dedii, n be gyae n ka tekaa koe be bia tɛɛle keŋ man ya.

13< <<Nnɛ yaa Degbeŋgyoo Doŋ Pou Nyee ne yako, lee keŋ baale ne yako ŋon nyi, <Ɛ ne tao balaŋ te ɛ na koe ɛ tɛɛle keŋ man bia dɔɔ nɛ,> 14ɛ be gyae ɛ ka tekaa tao balaŋ yaa ɛ ka koe ɛ bia tɛɛle keŋ man ya, Degbeŋgyoo Doŋ Pou Nyee torola yako. 15Mɔɔ gyae maa tekaa yela tɛɛlese ka tee ŋon ya, te balaŋ be gyae ba tekaa kulu ŋon yaa baa yela ɛ tɛɛle ke yala ya, Degbeŋgyoo Doŋ Pou Nyee torola yako.>> >

Iserae ka bese seŋ keyakosee

16Degbeŋgyoo besewɔ yako maŋ nyiaa, 17<Deniwalaŋ bu, debaŋ keŋ Iseraetena kyaa baŋ gbagba tɛɛle man nɛ, ba moo be dinɔɔ na ba ayɛɛsa waalaa ke. Na be dinɔɔ yɛɛ ŋgba alo gyaaku kena nɛ. 18Mena dɔɔ ma lese me baŋ nedoŋ wola wɔ, nawolo nyi ba koe balaŋ tɛɛle keŋ dɔɔ, te ba moo be bɛɛneŋ waalaa ke. 19Me gegi wɔ do tɛɛlese ŋan man te me yaasee wɔ do donɔɔse man, me dii be nombia ŋgba mena keŋ be dinɔɔ na ba ayɛɛsa wɔɛ nɛ. 20Te yenaŋ kamasɛ keŋ be gyu tɛɛlese man na bɛɛ do ma yele fereŋkyeŋ keŋ ayimɛɛ, nawolo nyi bee kolosi be nombia nyiaa, <<Degbeŋgyoo balaŋ yaa kɛwɔ, mɔna kaboena nyi baa lee ɔ tɛɛle dɔɔ.>> 21Ma tela ma yele fereŋkyeŋ keŋ Iseraetena ba do ke ayimɛɛ tɛɛlese ŋan man bɔɔ gyu nɛ nideli.

22<Mena dɔɔ yako Iseraetena nyiaa, <<Nnɛ yaa Degbeŋgyoo Doŋ Pou Nyee ne yako, na ɛmɛɛ Iseraetena dɔɔ te mɛɛ gyae maa yɛɛ abɔɔ kɛŋa ya, mɔna lee ma yele fereŋkyeŋ keŋ ɛ ba do ke ayimɛɛ tɛɛlese ŋan man ɛ be gyu nɛ dɔɔ. 23Maa lese ma yele dinaa keŋ bɔɔ do ke ayimɛɛ tɛɛlese man, yele keŋ ɛ ba do ke ayimɛɛ be man nɛ fereŋkyeŋ keyɛɛ wola. Nyi me tɛɛ ɛ dɔɔ lese wola tɛɛlese nyi me yɛɛ fereŋkyeŋ be siaman nɛ, botɔɔ te baa gyeŋ nyi maŋ yɛna Degbeŋgyoo. Degbeŋgyoo Doŋ Pou Nyee torola yako.

24< <<Nawolo nyi maa lese ŋon lee tɛɛlese baŋ man, maa yilaa ŋon lee donɔɔse pou man na maa besena ŋon kɔŋ ɛmɛɛ gbagba ɛ tɛɛle man. 25Maa mo loŋ kpaakpaate ŋmatee ŋon na ɛ ka lee, maa gberaa ŋon lee ya ayimɛɛ pou na ɛ bɛɛneŋ pou man. 26Maa fa ŋon konɔɔ wɔle na maa mo feliŋ wɔle do ɛ man, maa lese konɔɔ yuŋte lee ɛ man na maa mo konɔɔ keŋ woɛ nɛ do ɛ man. 27Na maa mo me Feliŋ do ɛ man na ke yela ɛ ke di me kawolase dɔɔ, na ɛ ke kɛɛ nideli di maŋ mmaraase dɔɔ. 28Kenaŋ na ɛ ke kyaa tɛɛle keŋ mɔɔ mo fa ɛ naanaɔ nɛ man, ɛ ke yɛɛ me balaŋ na maa yɛɛ ɛ Wurubuarɛ. 29Maa lɛɛ ŋon lee ya ayimɛɛ pou man. Maa baake weenɛɛ kɔŋ na maa yela ŋe ka bo nideli, te mɔɔ gyae maa yela tanam keyala ŋon ya. 30Maa yela ɛ daasebia na ɛ wɔɔman weenɛɛ ka bo, na desɛŋ ba tekaa kyaŋ ŋon tɛɛlese man lee tanam keyala dɔɔ ya. 31Botɔɔ te ɛ ke tɔɔse ɛ dinɔɔ kumɛɛ na ya akpanyanyaŋ ayɛɛsa, na ka wee ŋon lee ɛ dukum na ya ayɛɛsa anekɔlaŋ ŋan dɔɔ. 32Degbeŋgyoo Doŋ Pou Nyee ta toro yako nyiaa, mɛɛ gyae ɛ ka gyeŋ nyi na ɛmɛɛ dɔɔ te mɛɛ yɛɛ kei ya. Iseraetena, desɛŋ dɛɛ kyaŋ ŋon na ɛ sia ka yeŋ lee ya ayɛɛsa dɔɔ!

33< <<Nnɛ yaa Degbeŋgyoo Doŋ Pou Nyee ne yako, wee keŋ maa gberaa ŋon lee ɛ dukum pou man nɛ, maa yela ɛ donɔɔse ka bese seŋ, na ɛ ka bese ma ŋan be yɛlɛɛ nɛ. 34Baa fara tɛɛlese ŋan doo yakaa nɛ, yela keŋ ŋe gyae ke doo yakaa balaŋ baŋ pou bɛɛ lam botɔɔ nɛ siaman. 35Baa yako nyi, <Tɛɛle kei keŋ nafɔ ke doo yakaa nɛ, te kaa yɛɛ ŋgba Edɛn wɔɔbii nɛ, donɔɔse dinaana ŋan ŋɔɔ yɛlɛɛ te ŋe doo yakaa te ŋɔɔ wɔlɛɛ nɛ, nɛnɛɛ ba te baŋ akagyase do ŋa te balaŋ kyaa ŋe man.> 36Botɔɔ te tɛɛlese akaŋ ŋan be kilisi ŋon nɛ baa gyeŋ nyi maŋ Degbeŋgyoo ta bese baŋ keŋ bɔɔ wɔlɛɛ nɛ, te me duu abɔɔ botɔɔ keŋ doo yakaa nɛ. Maŋ Degbeŋgyoo kolosila te maa yɛɛ ke mɔ.>

37<Nnɛ yaa Degbeŋgyoo Doŋ Pou Nyee ne yako, maa bese nyii Iserae kasola na maa yɛɛ kei fa wɔ. Maa yela be balaŋ ka bo ŋgba namense nɛ, 38baa bo ŋgba namense dikpii baŋ bɛɛ mo deesi Yerusalɛm be nɔɔkedi debaŋ man nɛ. Mena te balaŋ akpiise baa wulu donɔɔse dinaa ŋan be yɛlɛɛ nɛ. Botɔɔ te baa gyeŋ nyi maŋ yɛna Degbeŋgyoo.>