Hɛsekiɛle 35

Kegbala tia Ɛdom

1Degbeŋgyoo yako maŋ nyiaa, 2Deniwalaŋ bu mo n sia tee Seire bula, gbala tia ke 3na n ke yako nyiaa, <<Nnɛ yaa Degbeŋgyoo Doŋ Pou Nyee ne yako, Seire bula, mee tia neŋ, maa gyina me nyiŋmaa tia neŋ na maa yɛɛ neŋ tɛɛle keŋ kɔɔ doo yakaa. 4Maa yɛlɛɛ n donɔɔse na maa yela n ke wɔlɛɛ. Botɔɔ te nyaŋ ka gyeŋ nyi maŋ yɛna Degbeŋgyoo.

5< <<Lee keŋ n ba mo beneŋ beneŋ kekɔla do n man te n ba lese Iseraetena fa yoosila debaŋ keŋ be doo kayeyɛɛ man, na debaŋ keŋ ba deŋele kewɔŋ be yɛɛ doŋ nideli nɛ dɔɔ, 6Degbeŋgyoo Doŋ Pou Nyee kpa nyiaa, maŋ nyiŋaa me kyaa nɛ, maa yela baa ko neŋ, te ke gyae ke sila neŋ. Keŋ n te yee balaŋ kako ya dɔɔ, fatabo gyae ke sila neŋ. 7Maa yela Seire bula ke doo yakaa na maa tɔ baŋ bɛɛ gyoo lee ke man nɛ gbɛɛ. 8Maa mo balaŋ baŋ bɔɔ koe nɛ wulu n bulase, baŋ bɔɔ yale yoosila nɔɔman nɛ baa yala n bulasebia na nya ataŋgyase na nya akyoloŋkyoloŋse man. 9Maa yela n ke doo yakaa kekpaakekpaa, balaŋ be gyae baa kyaa n donɔɔse man ya. Botɔɔ te nyaŋ ka gyeŋ nyi maŋ yɛna Degbeŋgyoo.

10< <<Nawolo nyi n yakowɔ nyiaa, <<Mena tɛɛlese na donɔɔse ala kɛŋa gyae ka bese de wui te dɛɛ mo ŋa bese de wui,>> keŋ maŋ Degbeŋgyoo kyaa botɔɔ, 11mena dɔɔ Degbeŋgyoo Doŋ Pou Nyee kpa nyiaa, maŋ nyiŋaa me kyaa na, maa wɔŋ n deŋele ŋgba mena keŋ n nuŋkurili na baŋ keŋ n ba lese wola wɔ lee n kekɔla wɔ doo nɛ, te akpaa me di n nombia na maa yela baa gyeŋ maŋ. 12Botɔɔ te n ka gyeŋ nyi maŋ Degbeŋgyoo te nyii tubia ŋan n be yako tia Iserae bulase nɛ. N yakowɔ nyiaa, <Be doo yakaa te be ta mo wɔ fa daa nyi dɛɛ wɔlɛɛ.>> 13N gate n wose tia maŋ, te n kolosiwɔ tia maŋ keŋ n te tina yela ya, te me nyii ke. 14Nnɛ yaa Degbeŋgyoo Doŋ Pou Nyee ne yako, debaŋ keŋ tɛɛle keŋ pou ne nyaŋee nɛ, maa yela n ke doo yakaa. 15Lee keŋ n be nyaŋee debaŋ keŋ Iserae doo yakaa nɛ dɔɔ, mena te maa yɛɛ neŋ. Seire bula, na Ɛdom pou, ɛ ke doo yakaa. Botɔɔ te baa gyeŋ nyi maŋ yɛna Degbeŋgyoo.>> >