Hɛsekiɛle 34

Degbeŋgyoo waa yɛɛ Iserae namensekɛɛlere

1Degbeŋgyoo yako man nyiaa, 2<Deniwalaŋ bu, gbala tia Iserae namensekɛɛlera, gbala na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ŋon ne yako, ɛmɛɛ Iserae namensekɛɛlera baŋ ɛ ne kɛɛ yaageŋ wui bo nɛ, ɛ laako. Namensekɛɛlera bɛɛ kɛɛ namense dikpii keŋ dɔɔ bo yee? 3Ɛ ne nyɔɔ miliki, na ɛ ta mo wonembia wona ŋɛrɛɛ abɔɔ do na ɛ ta koe wonembia kpaakpaa nyibaŋ, mɔna ɛ bɛɛ kɛɛ namense dikpii keŋ dɔɔ ya. 4Ɛ ta do baŋ bɔɔ yɔkɔse nɛ doŋ, yaa ɛ ke kyɔ kaweesetena kawee, yaa ɛ ke bake baŋ bɔɔ gooli nɛ gyamɛɛ ya. Ɛ ta mo baŋ bɔɔ kpase nɛ kɔŋ, yaa ɛ ke kɛo baŋ bɔɔ yoo nɛ ya. Ɛ moo kaŋeredo na nyeeman doŋ bo di be dɔɔ. 5Mena dɔɔ ba te yaasee, lee keŋ bɔɔ dana kɛɛlere ya dɔɔ, te ba ke yaasee nɛ be kaa bese weenɛɛ fa ŋale man wonembia. 6Me namense dɔŋ bee gyu kɔŋ bulase pou na bulabii kamasɛ dɔɔ. Be yaaseewɔ gyu tɛɛle keŋ pou dɔɔ, te ŋolo te kɛo wɔ yaa waa sila be gbɛɛ ya.

7Mena dɔɔ, ɛmɛɛ namensekɛɛlera, ɛ nyii Degbeŋgyoo nombii 8Degbeŋgyoo Doŋ Pou Nyee kpa nyiaa, maŋ nyiŋaa me kyaa nɛ, lee keŋ me namense taŋ kɛɛlera ya dɔɔ te be kuu wɔ ŋgba yooman abɔɔ te be kaa bese weenɛɛ fa ŋaleman wonembia pou, te lee keŋ me namensekɛɛlera baŋ te kɛo me namense dikpii keŋ dɔɔ ya mɔna baŋ gbagba dɔɔ te bɛɛ kɛɛ tina me namense dikpii keŋ yela dɔɔ nɛ, 9ɛmɛɛ namensekɛɛlera, ɛ nyii Degbeŋgyoo nombii, 10nnɛ yaa Degbeŋgyoo Doŋ Pou Nyee ne yako, mee tia namensekɛɛlera baŋ, te maa bɔɔse me namense dikpii keŋ akɔntaa lee be gyaŋ. Mɔɔ gyae maa tekaa yela baa kɛɛ me namense dikpii keŋ dɔɔ na namensekɛɛlera baŋ be nyiŋ kɛɛ ba wose dɔɔ bela ya. Maa lɛo me namense dikpii keŋ lee be nɔɔman na, bɔɔ nyiŋ bese weenɛɛ fa wɔ bela ya.

11< <<Nawolo nyi nnɛ yaa Degbeŋgyoo Doŋ Pou Nyee ne yako, Maŋ gbagba maa kɛo me namense na maa kɛɛ be dɔɔ. 12Mena keŋ namensekɛɛlere ne kɛo ɔ namense baŋ bɔɔ yaasee debaŋ keŋ ɔ kyaa be gyaŋ nɛ, mena ke te maa kɛɛ me namense dɔɔ. Maa lɛɛ wɔ lee botɔɔse ŋan pou bɔɔ yasee gyu debuŋta na detiŋtɛɛ wee keŋ nɛ. 13Maa mo wɔ lee tɛɛlese dɔɔ na maa yilaa wɔ lee donɔɔse man, na maa mo wɔ gyu baŋ gbagba be tɛɛle man. Maa yela baa nyiŋ weenɛɛ di Iserae bulase dɔɔ, akyoloŋkyoloŋse na tɛɛlese ŋan balaŋ kyaa nɛ pou man. 14Maa besena ŋa yɛɛ wonembia deediise kpaakpaa, na Iserae bulase ŋan korɛɛ nɛ ke yɛɛ wonembia deediise tɛɛle. Botɔɔ te baa doo deediise kpaakpaa man, te botɔɔ te baa tao ŋalese kpaakpaa Iserae bulase dɔɔ. 15Maŋ gbagba maa kɛɛle me namense na maa yela baa tisi doo, Degbeŋgyoo Doŋ Pou Nyee torola yako. 16Maa kɛo baŋ bɔɔ yoo nɛ na maa mo baŋ bɔɔ yoo gbɛɛ nɛ kɔŋ, maa bake baŋ bɔɔ gooli nɛ gyamɛɛ na maa do baŋ bɔɔ yɔkɔse nɛ doŋ, mɔna ma koe baŋ bɔɔ doo nuŋ na baŋ be dana doŋ nɛ. Maa kɛɛle namense dikpii keŋ katenee man.

17< <<Te ɛmɛɛ me namense dikpii, nnɛ yaa Degbeŋgyoo Doŋ Pou Nyee ne yako, maa di nam na ɔ dɔɔ nam, na nam baale na asoo baale nombia. 18Deedii kpaakpaa keŋ man ɛ ne dii nɛ ta boo fa ŋon yee? Kaboena nyi yaa mo ɛ nawɔɔ sakatee ɛ deedii akaŋ keŋ? Loŋ kpaakpaa keŋ ɛ ne nyɔɔ nɛ be dei fa ŋon yee? Kaboena nyi yaa mo ɛ naawɔɔ kutu ke? 19Kaboena nyi me namense dikpii keŋ baa di ŋan ɛ be sakatee, na baa nyɔɔ loŋ keŋ ɛ ba mo ɛ naawɔɔ kutu nɛ?

20< <<Mena dɔɔ nnɛ yaa Degbeŋgyoo Doŋ Pou Nyee ne yako wɔ, kɛɛ, maŋ gbagba maa di nam ŋon ɔ kerɛɛ na ŋon ɔ be nyɔe nɛ nombia. 21Lee keŋ ɛ na mo ɛ beŋtii na ɛ degbaŋgbaŋ tɛɛse namense baŋ bɔɔ yɔkɔse kelii debaŋ keŋ ɛ ke gegi wɔ do ŋale dɔɔ nɛ, 22maa lɛɛ me namense dikpii keŋ bɔɔ gyae baa kuu wɔ ŋgba yoo man abɔɔ nɛ ya. Maa di nam dokoloŋ na ɔ dɔɔ nam nombia. 23Maa yela me namensekɛɛlere ŋolo, ma somere Dawide ke kɛɛ be dɔɔ, waa mo wɔ gyu dedii na waa yɛɛ be namensekɛɛlere. 24Maŋ Degbeŋgyoo maa yɛɛ be Wurubuarɛ na ma somere Dawide ke yɛɛ siamante be man. Maŋ Degbeŋgyoo kolosila.

25< <<Daa na wɔ dɛɛ yɛɛ wosefɛɛreŋ nɔɔkebakesee, na maa gegi wonembia kumɛɛ lee tɛɛle keŋ man na baa nyiŋ kyaa kefula keŋ man na baa doo laa keŋ man wosekefɛɛ man. 26Maa hiraa baŋ na botɔɔse ŋan be kilisi me bulabii nɛ. Maa yela ɔga ke ŋɛɛ ɔ debaŋ man, ke gyae ke yɛɛ ɔga ŋon waa hiraa wɔ. 27Daase gyae ka se ŋe bia te tɛɛle gyae ke de weenɛɛ. Balaŋ baŋ baa nyiŋ kegyee be tɛɛle man. Nyi me tekerii ba dokɔŋ keŋ nyeela, te me lɛɛ wɔ lee baŋ bɔɔ mo wɔ bese gbeŋa nyiŋmaa man nɛ, botɔɔ te baa gyeŋ nyi maŋ yɛna Degbeŋgyoo. 28Tɛɛlese be gyae baa tekaa mo wɔ ŋgba yooman abɔɔ, yaa ŋaleman wonembia ke kyaŋ wɔ tao ya. Baa kyaa kegyee man, te ŋolo be ŋmaase wɔ ya. 29Maa fa wɔ tɛɛle keŋ gyae ke lɛɛ yele lee ke weenɛɛ kede man, te tanam keyala be gyae ke kɔŋ be dɔɔ tɛɛle keŋ dɔɔ bela yaa tɛɛlese ke kulu wɔ ya. 30Botɔɔ te baa gyeŋ nyi maŋ Degbeŋgyoo be Wurubuarɛ, me kpuɛna wɔ, te baŋ Iseraetena yɛɛ me balaŋwɔ, Degbeŋgyoo Doŋ Pou Nyee torola yako. 31Ɛ yɛɛ me namensewɔ, me deedii man wonembia, te maŋ yɛna ɛ Wurubuarɛ, Degbeŋgyoo Doŋ Pou Nyee torola yako.>> >