Hɛsekiɛle 33

Ba ke baake Hɛsɛkiɛle ŋgba gyeere nɛ

1Degbeŋgyoo yako maŋ nyiaa, 2<Deniwalaŋ bu, kolosi fa n balaŋ na n ke yako wɔ nyiaa, <<Akpaa ma mo yoosila tia tɛɛle daale, te tɛɛle kenaŋ balaŋ da lese be man baale ŋolo nyi waa yɛɛ gyeere, 3te ɔ naa yoosila kenaŋ ne kɔŋ kaa tia tɛɛle keŋ, te ɔ wola kaberɛ faaree balaŋ baŋ, 4te akpaa ŋolo de nyii kaberɛ keŋ, te ɔ ta mo kefaaree keŋ yɛɛ kolo ya te yoosila de kaa koe wɔ nɛ, kenaŋ na ba yeŋ keŋ gyae ke busaana wɔ. 5Lee keŋ bɔɔ nyii kaberɛ keŋ te ba te tei kefaree keŋ ya dɔɔ, ba yeŋ keŋ gyae ke busaana wɔ. Beŋ nyii kefaree keŋ na, nafɔ beŋ lɛɛ ba nyee. 6Mɔ nyi gyeere ŋon de naa yoosila keŋ ne kɔŋ, te ɔ ta wola kaberɛ keŋ faree balaŋ baŋ ya te yoosila keŋ de kɔŋ kaa ko ŋolo na, walaŋ ŋonaŋ waa yeŋ lee ɔ dukum dɔɔ, mɔna maa bɔɔse ɔtenate yeŋ akɔntaa lee gyeere ŋon gyaŋ.>>

7<Deniwalaŋ bu, ma te yɛɛ neŋ gyeere fa Iseraetena, mena dɔɔ nyii nombia ŋan mee kolosi, na n ka mo faaree wɔ. 8Akpaa me yako akpanyanyaŋte nyi, <<Nyaŋ akpanyanyaŋte, de yɛɛ senaa nyaŋ ka yeŋ,>> te n te kolosi fa wɔ na baa kyɛɛkee lee be gbɛɛneŋ man ya nɛ, mena akpanyanyaŋte ŋonaŋ waa yeŋ lee ɔ dukum dɔɔ, mɔna maa bɔɔse ɔtenate yeŋ akɔntaa lee n gyaŋ. 9Mɔna nyi n faaree akpanyanyaŋte ŋonaŋ nyi waa kyɛɛkee lee ɔ gbɛɛneŋ man te ba te yɛɛ mena ya nɛ, baa yeŋ lee be dukum dɔɔ, mɔna nyaŋ gbagba nyaŋ ke lɛɛ n nyee.

10<Deniwalaŋ bu, yako Iseraetena nyiaa, <Nnɛ yaa ɛ ne yako, <<De nombiakumɛɛ na de dukum ta bese kasolɔse fa daa te dɛɛ yeyɛɛ. Sena te dee nyiŋ nyeedoŋ?> >> 11Yako wɔ nyiaa, <<Degbeŋgyoo Doŋ Pou Nyee kpa, maŋ nyiŋaa me kyaa nɛ, akpanyanyaŋtena yeŋ be dana maŋ gyoŋ ya, mɔna mɛɛ gyae bo nyi baa kyɛɛkee lee be gbɛɛneŋ man na baa nyiŋ nyeedoŋ. Ɛ kyɛɛkee, Ɛ kyɛɛkee lee ɛ gbɛɛneŋ kumɛɛ man. Iseraetena, woŋ dɔɔ te ɛ ka yeŋ?>>

12<<Mena dɔɔ deniwalaŋ bu, yako n balaŋ nyiaa, <<Nyi walaŋ ŋon ɔ tenɛɛ de yɛɛ deŋele doŋ na, walaŋ ŋonaŋ katenee keŋ ɔ be yɛɛ kaalaŋ nɛ te yɛɛ yakaa. Te akpaa akpanyanyaŋte de kyɛɛkee na, walaŋ ŋonaŋ akpanyanyaŋ ŋan ɔ be yɛɛ kaalaŋ be gyae ka mo e gyu fɔɔkedi man ya. Nyi walaŋ ŋon ɔ tenɛɛ de yɛɛ dukum na, ɔ be gyae waa nyiŋ gbɛɛ kyaa ya, be famenɛ nyi ɔ teneewɔ kaalaŋ ya.>> 13Nyi me yako ŋon ɔ tenɛɛ nɛ nyi de yɛɛ senaa n ke nyiŋ nyeedoŋ, te nɛnɛɛ ɔ mo ɔ wose lɔ ɔ katenee keŋ dɔɔ te ɔ yɛɛ dukum nɛ, bɔɔ gyae baa tɔɔse walaŋ ŋonaŋ abɔɔ katenee ŋan ɔ be yɛɛ nɛ man dokoloŋ ya. Waa yeŋ lee nombia kumɛɛ ŋan ɔ be yɛɛ nɛ dɔɔ. 14Te akpaa me yako akpanyanyaŋte nyi, <<De yɛɛ senaa nyaŋ ka yeŋ,>> te akpaa ɔ kyɛɛkee lee ɔ dukum man te ɔ yɛɛ keŋ doona ke gbɛɛ te ke dei, 15te ɔ besena keŋ bɔɔ mo see awoba ɔ gyaŋ paa kolo, na keŋ ɔ be ŋmɛɛle nɛ fa te ɔ sila mmaraa keŋ ne fa nyeedoŋ, te ɔ te yɛɛ nombiikum ya nɛ, de yɛɛ senaa walaŋ ŋonaŋ waa nyiŋ nyeedoŋ, ɔ be gyae waa yeŋ ya. 16Bɔɔ gyae baa tɔɔse mena walaŋ ŋonaŋ dukum kamasɛ keŋ ɔ be yɛɛ tia e ya. Ba te yɛɛ keŋ doona ke gbɛɛ na keŋ ke dei, de yɛɛ senaa baa nyiŋ nyeedoŋ.

17<Mɔna n balaŋ ne yako nyi, <<Degbeŋgyoo gbɛɛ be doona ke gbɛɛ ya,>> Mɔna baŋ gbɛɛneŋ gba be doola na ke gbɛɛ ya. 18Nyi walaŋ ŋon ɔ tenɛɛ de kyɛɛkee lee ɔ katenee man te ɔ yɛɛ nombiikum nɛ, baa yeŋ fa ke. 19Te nyi akpaa akpanyanyaŋte de kyɛɛkee lee wa akpanyanyaŋ keyɛɛ man te ɔ yɛɛ keŋ doona ke gbɛɛ na keŋ ke dei nɛ, baa nyiŋ nyeedoŋ lee ba ayɛɛsa dɔɔ. 20Mɔna ɛmɛɛ Iseraetena kpa, <<Degbeŋgyoo gbɛɛ be doona ke gbɛɛ ya.>> Mɔna maa di ɛ man ɔkamasɛ nombia ŋgba mena keŋ ɛ gbɛɛneŋ doo nɛ.>>

Yerusalɛm keyala nawolo

21De ke gyu yoogbeŋiri man kulutooneŋ kufualate ŋon, ɔ gyaalaŋna kufute ŋon wee anoŋte nɛ, balee ŋolo ŋon ɔ be nyiŋ gbɛɛ yeu lee Yerusalɛm nɛ kɔŋawɔ kaa yako maŋ nyiaa, <Donɔɔ dinaa keŋ te yale.> 22Balinɔɔ keŋ pɛ tɛɛ kena na balee ŋonaŋ ke kɔŋ nɛ, na Degbeŋgyoo nyiŋmaa gyakaa me dɔɔ, te ɔ gyuusu me nɔɔ pɛte balee ŋon kɔŋawɔ me gyaŋ ke tɛɛkena nebo keŋ. Mena dɔɔ me nɔɔ gyuusuwɔ keŋ mɔɔ yɛɛ yididi bela ya.

23Keŋte Degbeŋgyoo yako maŋ nyiaa, 24<Deniwalaŋ bu, balaŋ baŋ be kyaa donɔɔse ŋan be yɛlɛɛ Iserae tɛɛle man nɛ ne yako nyiaa, <<Aberaham yɛɛ walaŋ dokoloŋ, mɔna ɔ moo tɛɛle keŋ bese ɔ wui. Mɔna daa boe, de yɛɛ senaa be ta mo tɛɛle keŋ fa daa ŋgba de wui nɛ.>> 25Mena dɔɔ yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, akpaa ɛ ne tao naane keŋ fatabo doo ke man, te ɛ na som ɛ bɛɛneŋ, te ɛ na koe balaŋ na, kaboena nyi yaa mo tɛɛle keŋ bese ɛ wui? 26Ɛ na mo ɛ wose lɔ ɛ yoosila dɔɔ, ɛ ne yɛɛ abɔɔ anekɔlaŋ te ɛ man ɔkamasɛ na do ɔ dɔɔ wɛɛle ayimɛɛ na, kaboena nyi yaa mo tɛɛle keŋ bese ɛ wui?

27<Yako wɔ nombii kei, <<Nnɛ yaa Degbeŋgyoo Doŋ Pou Nyee ne yako, maŋ nyiŋaa me kyaa nɛ baŋ bɔɔ kaa botɔɔse ŋan be yɛlɛɛ nɛ baa yala yoosila nɔɔman, maa mo baŋ bɔɔ lee donɔɔ keŋ man nɛ fa ŋaleman wonembia ka kyekpetee wɔ, na kaweekum ka koe baŋ be kyaa akagyase na boya bɔɔneŋ man nɛ. 28Maa yela tɛɛle keŋ ke wɔlɛɛ doo yakaa, na wa agaŋtaŋ doŋ keŋ ke kɔŋ ɔto, na Iserae bulase ke doo yakaa keŋ ŋolo be gbaa ŋa ya. 29Nyi me yele tɛɛle keŋ de doo yakaa lee abɔɔ anekɔlaŋ ŋan pou bɔɔ yɛɛ dɔɔ nɛ, botɔɔ te baa gyeŋ nyi maŋ yɛna Degbeŋgyoo.>

30<<Deniwalaŋ bu, mɔ nyaŋ dɔɔ n balaŋ ne kolosi n woseman nombia ba akpaŋalaŋ akyaŋse na anaanɔɔse man, bɛɛ yako fa dɔŋa nyi, <Kɔŋ kaa nyii nombii keŋ ba lee Degbeŋgyoo gyaŋ.> 31Me balaŋ ne kɔŋ n gyaŋ ŋgba mena keŋ bɛɛ taŋ yɛɛ nɛ, na ba te kyaa n gyaŋ nyi baa nyii n nombia. Mɔna bɔɔ na mo ŋa yɛɛ kolo ya. Be nɔɔse ne kolosi kegyae nombia, mɔna be konɔɔse na peree na tɔnɔɔ keŋ be doona ke gbɛɛ ya nɛ. 32Ampaŋ, baŋ gyaŋ na n te yɛɛ ŋolo e kela ŋon ɔ na mo woya gyoŋ nyiŋan kpee kegyae nɔɔneŋ te ɔ gyeŋ suya kegyɔ nideli nɛ ya, nawolo nyi bee nyii n nombia mɔna bɔɔ na mo ŋa yɛɛ kolo ya.

33Nyi kɛŋa pou de kɔŋ mena, keŋ de yɛɛ senaa ŋe gyae ke kɔŋ nɛ, botɔɔ te baa gyeŋ nyi gbalare ŋolo kyaawɔ be man.>>