Hɛsekiɛle 32

Katoroŋ fa Faaro

1Kulutooneŋ kufualate ŋon, ɔ gyaalaŋna kufualate ŋon wee gyaŋgbate nɛ, Degbeŋgyoo yako maŋ nyiaa, 2<<Deniwalaŋ bu, toroŋ fa Igyipite gyoo Faaro na n ke yako e nyiaa,

< <<N yɛɛ ŋgba dinaate nɛ tɛɛlese man,

n yɛɛ ŋgba wonembukum nɛ ɛpo man,

n ne saale n boŋobiise man

n na mo n naawɔɔ sakatee loŋ keŋ

na n te kutu boŋobiise ŋan.

3< <<Nnɛ yaa Degbeŋgyoo Doŋ Pou Nyee ne yako,

< <<Maa mo balaŋ dikpii kpuna ma wose,

na maa fuŋ ma asawu wuu neŋ,

na baa wɔŋee neŋ lee ma asawu keŋ man.

4Maa fuŋ neŋ lɔ dekeŋkeŋ dɔɔ

na maa tuu neŋ tɛɛle peŋteŋpereiŋ dɔɔ.

Maa yela adido gyebuse pou kaa kyakee n dɔɔ,

na maa yela ŋaleman wonembia pou kaa tao n naane baa.

5Maa yaasee n naane gyakaa bulase dɔɔ

na maa mo n deyeŋe wulu ataŋgyase man.

6Maa yela n fatabo ke waale tɛɛle,

menɛɛ kelii bulase dɔɔ,

na n naane ke wulu akyoloŋkyoloŋse man.

7Nyi me feefu neŋ ko nɛ, maa wuu adidose,

na detiŋtɛɛ ka gyoo ŋe kyolobiise

maa mo debuŋta wuu weese,

te gyaalaŋ be gyae waa lee ya.

8Maa yela adido kanease ŋan ne ŋalakee nɛ,

ka gyoo detiŋtɛɛ wuu neŋ.

maa yela detiŋtɛɛ ka gyoo n tɛɛle, Degbeŋgyoo Doŋ Pou Nyee torola yako.

9Nyi ma mo n kewɔlɛɛ kɔŋ tɛɛlese man,

nyi ma mo neŋ gyu tɛɛlese ŋan n ba gyeŋ ya man nɛ,

maa yela balaŋ burum wɔe ke lɔ wɔ.

10Nyi me wɔŋ me yoosila be siaman nɛ,

maa yela balaŋ burum nɔɔ ke doo wɔ lee nyaŋ dɔɔ,

gyakoloŋ gyae ke yela be gyooneŋ ke seree lee nyaŋ dɔɔ.

Wee keŋ n ke yala nɛ,

gyakoloŋ gyae ka gyoo be man ɔkamasɛ

debaŋ kamasɛ nyi nyaŋ ka ko e.

11< <<Nnɛ yaa Degbeŋgyoo Doŋ Pou Nyee ne yako,

< <<Babilɔn gyoo yoosila

gyae ke kɔŋ kaa tia neŋ.

12Maa yela n balaŋ dikpii ke yala,

doŋtena yoosila nɔɔman,

tɛɛlese nyeeman doŋtena nyiŋmaa man,

Baa wɔlɛɛ Igyipite wose kegate keŋ,

na baa di ɔ balaŋ dikpii keŋ pou dɔɔ.

13Maa koe ɔ nunkyuese pou

lee loŋse burum nɔɔman

balaŋ nawɔɔ ba tekaa saale ke man,

yaa nunkyue awɔkatese ke kutu ke ya.

14Botɔɔ te maa yela ɔ loŋse ke doo

na maa yela ɔ boŋobiise ke laŋ ŋgba nuŋ nɛ,

Degbeŋgyoo Doŋ Pou Nyee torola yako.

15Nyi me yele Igyipite de doo yakaa

te ma lese kpene kamasɛ lee tɛɛle keŋ man,

te maa koe baŋ pou be kyaa botɔɔ nɛ,

botɔɔ te baa gyeŋ nyi maŋ yɛna Degbeŋgyoo.>>

16Kei yɛna katoroŋ keŋ baa kaŋtee fa e. Tɛɛlese bia alebia baa kaŋtee ke, Igyipite na ɔ dikpii keŋ pou baa kaŋtee ke, Degbeŋgyoo Doŋ Pou Nyee torola yako.>>

Igyipite ke tisi gyu woyadɛɛ

17Kulutooneŋ kufualate ŋon, ɔ gyaalaŋ wee kufu anoŋte nɛ, Degbeŋgyoo yako maŋ nyiaa, 18<Deniwalaŋ bu, lɔ nɔɔ lee Igyipite dikpii keŋ dɔɔ, na n ka mo baŋ na be bia alebia baŋ bɔɔ lee tɛɛlese doŋ nyiŋan man nɛ, tisi gyu tɛɛle ateta kpuna baŋ bɔɔ tisi gyu yebɔɔ man nɛ. 19Yako wɔ nyiaa, <<Ba boele ŋon nideli kela akaŋ baŋ? Ɛ tisi gyu ateta na ɛ kaa doo baŋ ba te kara be baalawose ya nɛ man.> 20Baa yala baŋ bɔɔ yale yoosila nɔɔman nɛ man. Ba te wɔŋ yoosila keŋ, baa tuu e na ɔ dikpii keŋ pou laŋ. 21Ba ke doo woya baŋ man nɛ, siamantena doŋtena baŋ baa yako lee Igyipite na baŋ be kpuɛna e nɛ wose man nyiaa, <<Be te tisi kɔŋ ateta te be doo baŋ ba te kara be baalawose ya, na baŋ bɔɔ yale yoosila nɔɔman nɛ man.>

22<Asiriya na ɔ yoonɔɔtena pou kyaa botɔɔ, baŋ ɔ ba koe nɛ yebɔɔse te kilisi e, baŋ bɔɔ yale yoosila nɔɔman nɛ. 23Ba yebɔɔse doo bɔɔneŋ ŋan tɔɔman, te ɔ yoonɔɔtena dokɛɛ kilisi ɔ yebɔɔ. Be ta koe baŋ pou bɔɔ do balaŋ gyakoloŋ tɛɛle keŋ dɔɔ nɛ, ba te yale yoosila nɔɔman.

24<Elam kyaa botɔɔ, te ɔ dikpii keŋ pou te kilisi ɔ yebɔɔ. Be ta koe be popou, ba te yale yoosila nɔɔman. Baŋ pou bɛɛ do balaŋ gyakoloŋ tɛɛle dɔɔ nɛ, te tisi gyoo tɛɛle tɔɔman keŋ ba te kara be baala wose ya. Be ta do ba wose desɛŋ baŋ bɔɔ tisi gyoo yebɔɔ man nɛ man. 25Ba te lɔ e dofoŋoŋ baŋ bɔɔ koe nɛ man, te ɔ dikpii pou te kilisi ɔ yebɔɔ. Ba te kara be popou baalawose ya, ba te yale yoosila nɔɔman. Lee keŋ be gyakoloŋ be yaasee gyu denibalaŋ tɛɛle man dɔɔ, desɛŋ te kyaŋ wɔ kpuna baŋ bɔɔ tisi gyu yebɔɔ man nɛ, be ta mo wɔ doosi baŋ bɔɔ koe nɛ man.

26<<Mɛsɛke na Tubale kyaa botɔɔ te ba akpiise pou te kilisi ba yebɔɔse. Ba te kara be popou baalawose ya, be yalae yoosila nɔɔman nawolo nyi bɛɛ do balaŋ gyakoloŋ tɛɛle dɔɔ. 27Mɔna ba te doo kpuna beneŋ yoonɔɔtena baŋ bɔɔ tisi gyu woyadɛɛ kpuna be yoo abɔɔ nɛ ya. Ba moo be yoosilase do ba nyeeya ateta na be yoo nyeele pampasaŋse gyakaa be dɔɔ, doo nyi mena baalabia kɛo mɔ kekyaa na be ŋmaase balaŋ tɛɛle kei dɔɔ.

28<Nyaŋ Faaro mɔ, baa tekerii neŋ, na n ke doo baŋ ba te kara be baalawose ya, kpuna baŋ bɔɔ mo yoosila koe wɔ nɛ man.

29<Ɛdom kyaa botɔɔ kpuna ɔ gyooneŋ na ɔ kegyiise, keŋ na be doŋ koraŋ nɛ be ta mo wɔ doosi kpuna baŋ bɔɔ yale yoosila nɔɔman nɛ man. Be doo kpuna baŋ ba te kara be baalawose ya, kpuna baŋ bɔɔ tisi gyu yebɔɔ man nɛ.

30<Ado yenaŋ kegyiise na Sidontena pou kyaa botɔɔ. Keŋ na be kɛɛ mo be doŋ do balaŋ gyakoloŋ koraŋ nɛ, be tisiwɔ gyu yebɔɔ man kpuna baŋ bɔɔ koe nɛ desɛŋ man. Be doo keŋ ba te kara be baalawose ya, kpuna baŋ bɔɔ yale yoosila nɔɔman nɛ, te ba seele ba desɛŋ kpuna baŋ bɔɔ tisi gyu yebɔɔ man nɛ.

31<Faaro na ɔ yoonɔɔtena pou baa naa wɔ, na ɔ wɔe ke fɛɛ e, lee ɔ dikpii keŋ pou bɔɔ yale yoosila nɔɔman dɔɔ. Degbeŋgyoo Doŋ Pou Nyee torola yako. 32Doo nyi me yelaa ɔ doo balaŋ gyakoloŋ tɛɛle dɔɔ koraŋ nɛ, Faaro na ɔ dikpii pou baa doo baŋ ba te kara be baalawose ya, kpuna baŋ bɔɔ yale yoosila nɔɔman nɛ man, Degbeŋgyoo Doŋ Pou Nyee torola yako.>