Hɛsekiɛle 31

Faaro, ŋgba Lebanɔn sida daŋ keŋ kɔɔ yale nɛ

1Kulutooneŋ kufudaalete ŋon ɔ gyaalaŋna batoorote ŋon wee gyaŋgbate nɛ, Degbeŋgyoo yako maŋ nyiaa, 2Deniwalaŋ bu, yako Igyipite gyoo Faaro na ɔ balaŋ burum baŋ nyiaa,

< <<Amɔte yaa baa mo maana neŋ doŋ man?

3Kɛɛ Asiriya, nafɔ ke yɛɛ sida daŋ ke Lebanɔn,

keŋ ke tombia dana kyeo te kee wuu laa keŋ,

ka korowɔ gyu adido,

ka korɛɛ kela daase pou.

4Loŋse ŋan yelaa ke nyiŋa ka wose,

loŋse ŋan ne puu lee tɛɛle man yelaa ka beewɔ yɛɛ dɔɔloŋ,

ŋe boŋobiise ne lam

kilisi ka mokɔɔ pou,

te ka loŋse kpasewɔ gyu

ŋaleman daase ŋan pou gyaŋ.

5Mena dɔɔ ka korowɔ gyu adido adido

kela ŋaleman daase pou,

ke gbasase kereewɔ,

te ke tombia yɛɛ dɔɔloŋ,

ŋe fɛlɛɛwɔ lee loŋse burum ŋan dɔɔ.

6Adido gyebuse pou

loo ba asaase do ke gbasase man,

ŋale man wonembia pou

ne kaa lolee ke tɛɛ,

tɛɛlese dinaana pou

ne kyaa ke wuluŋ man.

7Ke dana kyeo kɔ ɔkeereŋ man,

ke gbasase fɛlɛɛwɔ nideli,

nawolo nyi ke lila gyoowɔ tɔɔman,

ke tuŋ loŋse burum.

8Sida daase ŋan doo Wurubuarɛ wɔɔbii man,

be tale maana ke

yaa yunipa daase,

ke maana ke gbasase,

yaa oferam daase

ke maana ke tombia ya,

daŋ daale be kyaa Wurubuarɛ wɔɔbii keŋ man

keŋ ka kyeo be lii ke ya.

9Maŋ faana ke tombia burum,

te ke yɛɛ kyeo,

daase ŋan pou kyaa Edɛn,

Wurubuarɛ wɔɔbii keŋ man sia ne yɛɛ e.

10< <<Mena dɔɔ nnɛ yaa Degbeŋgyoo Doŋ Pou Nyee yako, lee keŋ sida daŋ dinaa keŋ ba koro kela ŋaleman daase ŋan, te kɛɛ yɛɛ agaŋtaŋ lee ke dɔɔloŋ dɔɔ nɛ, 11me ta mo ke do tɛɛlese siamante nyiŋmaa man, nyi waa yɛɛ ke ŋgba mena keŋ wa akpanyanyaŋ doo nɛ. Me ta lese ke see yenaŋ, 12te ŋɔɔla tɛɛlese nyeeman doŋtena kara ke lɔ te be tinaa ke yela. Ke gbasase yalawɔ bulase dɔɔ na ataŋgyase pou man, ke tombia te tekerii doo tɛɛle keŋ akyoloŋkyoloŋse man. Tɛɛlese ŋan ŋe kyaa tɛɛle keŋ dɔɔ leewɔ ɔ wuluŋ man te be tinaa ke yela. 13Gyebuse pou ne kyakee daŋ keŋ kɔɔ yale nɛ dɔɔ, te ŋale man wonembia kyaa ke tombia man. 14Na daase ŋan seŋɛɛ boo nɔɔman nɛ man daale ba tekaa yɛɛ agaŋtaŋ beiŋ, na ke tombia ka koro gyu adido kela ŋaleman daase ŋan ya. Te daase ŋan ne nyiŋ loŋ nideli nɛ, man daale ta tekaa koro lii ke ya. Be ta mo ŋe popou fa yeŋ, gyu yebɔɔ man kpuna balaŋ baŋ bɔɔ yem gyu woyadɛɛ nɛ.

15< <<Nnɛ yaa Degbeŋgyoo Doŋ Pou Nyee ne yako, wee kenaŋ keŋ bɔɔ tisina ke gyu woyadɛɛ nɛ, me yelaa loŋse ŋan ne puu lee tɛɛle man nɛ dii waraŋsa fa ke. Me tɔɔ boŋobiise ŋan, te ɔ loŋse burum ŋan bɛɛ tekaa laŋ ya. Lee ŋon dɔɔ me yelaa detiŋtɛɛ gyoo Lebanɔn, te ŋale man daase ŋan pou botowɔ. 16Me yelaa tɛɛlese sereewɔ lee ka keyala yeesa dɔɔ, debaŋ keŋ mɔɔ tisina ke gyu woyadɛɛ nyi ke dee gyu ke kpuna baŋ bɔɔ yem nɛ. Botɔɔ te Edɛn daase pou, na Lebanɔn daase kpaakpaa nyiŋan ŋan, daase ŋan bɔɔ do ŋa loŋ nideli nɛ wɔe gyae ke fɛɛ wɔ tɛɛle tɔɔman. 17Baŋ mɔ te tisi gyu woyadɛɛ ŋgba sida daŋ dinaa keŋ nɛ, gyu baŋ bɔɔ yale yoosila nɔɔman mo kpuna yoonɔɔtena baŋ bɔɔ kyaa ke wuluŋ man tɛɛlese ŋan man nɛ.

18< <<Edɛn daase ŋan man woŋti te baa mo maana neŋ lee n doŋ na n gyoorobiiri man? Mɔna nyaŋ mɔ, baa tɛɛse neŋ kpuna Edɛn daase lɔ tɛɛle man, nyaŋ ke doo baŋ ba te kara be baalawose ya nɛ man, kpuna baŋ bɔɔ yale yoosila nɔɔman nɛ.

< <<Kei yɛna Faaro na ɔ balaŋ burum baŋ, Degbeŋgyoo Doŋ Pou Nyee torola yako.>> >