Hɛsekiɛle 30

Katoroŋ lee Igyipite wose maŋ

1Degbeŋgyoo yako maŋ nyiaa, 2<<Deniwalaŋ bu, gbala na n ke yako nyiaa, <<Nnɛ yaa Degbeŋgyoo Doŋ Pou Nyee ne yako,

< <<Lɔ nɔɔ na n ke yako nyiaa,

<<Wee kenaŋ dɛɛ laako!>

3Nawolo nyi wee keŋ ta benaa,

Degbeŋgyoo wee keŋ ta benaa,

debuŋta wee

tɛɛlese kewɔlɛɛ debaŋ.

4Yoosila gyae ka koro tia Igyipite,

na kaale ke kɔŋ Kuse dɔɔ1.

Nyi ba koe balaŋ Igyipite nɛ,

baa kuu ɔ wose kenyiŋ laŋ,

na baa yɛlɛɛ ɔ mokɔɔ kaseese.

5Kuse na Libiya, na Lidiya na Arabiya pou, na Kube na balaŋ baŋ, baŋ na wɔ be bake nɔɔ see nɛ baa yeŋ yoosila nɔɔman kpuna Igyipite.

6<Nnɛ yaa Degbeŋgyoo ne yako,

< <<Baŋ ba seŋɛɛ Igyipite wɔle nɛ baa yala

na wa agaŋtaŋ doŋ keŋ ke yɔkɔse.

Baa yala yoosila nɔɔman ɔ man,

lee Migedɔle kelii Asewan.

Degbeŋgyoo Doŋ Pou Nyee torola yako.

7Baa doo yakaa

tɛɛlese ŋan doo yakaa nɛ man,

na be donɔɔse dinaana ke doo

tɛɛlese ŋan ŋɔɔ wɔlɛɛ nɛ man.

8Nyi ma too Igyipite

te ma koe baŋ pou bɛɛ kyɔ e nɛ,

botɔɔ te baa gyeŋ nyi maŋ yɛna Degbeŋgyoo.

9< <<Mena wee kenaŋ nɛ kpilara baa mo pantuuse lee me gyaŋ gyu ke ŋmaase Kuse ŋon ɔ ne lɛɛ ɔ wose di nɛ. Igyipite kewɔlɛɛ wee keŋ nɛ baa nyii weeleŋ, nawolo de yɛɛ senaa ke gyae ke kɔŋ.

10< <<Nnɛ yaa Degbeŋgyoo Doŋ Pou Nyee ne yako,

< <<Maa ta Babilɔn gyoo Nebukadenɛsa dɔɔ,

yela Igyipite wose kenyiŋ ke kɔŋ ɔto.

11Nebukadenɛsa na ɔ yoonɔɔtena, tɛɛlese baŋ be dana doŋ nɛ,

baa mo wɔ kɔŋ be kaa wɔlɛɛ tɛɛle keŋ.

Baa wɔŋ be yoosilase tia Igyipite,

na baŋ bɔɔ koe yoo man nɛ ke wulu tɛɛle keŋ.

12Maa yela Naele loŋse ka yo

na maa yɔɔ tɛɛle keŋ fa balaŋ kumɛɛ,

maa ta ŋɔɔla dɔɔ

yela tɛɛle na kpene kamasɛ keŋ doo ke man nɛ ke doo yakaa.

Maŋ Degbeŋgyoo kolosila.

13< <<Nnɛ yaa Degbeŋgyoo Doŋ Pou Nyee ne yako,

< <<Maa wɔlɛɛ bɛɛneŋ baŋ

na maa lese bɛɛneŋ dinɔɔse lee Memefise.

Siamante be gyae waa tekaa kyaa Igyipite ya,

te maa yela gyakoloŋ ka gyoo tɛɛle keŋ pou.

14Maa yela Igyipite ado yenaŋ ke doo yakaa,

maa too Soan

na maa wɔŋ Tebese deŋele.

15Maa lese me baŋ nedoŋ wola Pelusium,

donɔɔ dinaa keŋ ne gyee Igyipite nɛ,

na maa munu Tebese balaŋ burum baŋ.

16Maa too Igyipite,

Pelusium waa nyii weeleŋ.

Feliŋkum gyae ka mo Tebese laŋ,

te Memefise waa doo kayeyɛɛ man agbaatee agbaatee.

17Heliopolise na Bubasetise tewulɛɛ

baa yala yoosila nɔɔman,

na donɔɔse dinaana ŋan man balaŋ ke gyu yoogbeŋiri man.

18Nyi ma lese Igyipite doŋ keŋ nɛ,

detiŋtɛɛ gyae ka gyoo Tahepanehɛse,

botɔɔ te wa agaŋtaŋ doŋ keŋ gyae ke kɔŋ ɔto.

Debuŋta gyae ke wuu e,

na wa akuraase ke gyu yoogbeŋiri man.

19Nnɛ te maa wɔŋ Igyipite deŋele,

na baa gyeŋ nyi maŋ yɛna Degbeŋgyoo.> >>

Ba te tekerii Faaro baameŋse

20Kulutooneŋ kufudaalete ŋon ɔ gyaalaŋ gyaŋgbate ŋon wee nyetoorote nɛ, Degbeŋgyoo yako maŋ nyiaa, 21Deniwalaŋ bu, ma te tekeri Igyipite gyoo Faaro bam. Ba te bake ke na ka towaa, yaa baa loo akyakaa do ke na ke nyiŋ yɛɛ doŋ keŋ waa tale kyaŋ yoosila ya. 22Mena dɔɔ nnɛ yaa Degbeŋgyoo Doŋ Pou Nyee ne yako, mee tia Igyipite gyoo Faaro. Maa tekerii ɔ baameŋse ala ŋan, bam kpaakpaate na dukum keŋ pou, na maa yela yoosila keŋ ka lee ɔ nyiŋmaa man yala. 23Maa gegi Igyipitetena do tɛɛlese man, na maa yaasee wɔ do donɔɔse man. 24Maa do Babilɔn gyoo baameŋse doŋ, na maa mo me yoosila do ɔ nyiŋmaa man, mɔna maa tekerii Faaro baameŋse, na waa keŋee ɔ siaman ŋgba ŋon ɔ be gooli nɛ. 25Maa do Babilɔn gyoo baameŋse doŋ, mɔna maa yela Faaro baameŋse ka yeŋ. Akpaa ma mo me yoosila do Babilɔn gyoo nyiŋmaa man, te ɔ tenee ke tia Igyipite nɛ, botɔɔ te baa gyeŋ nyi maŋ yɛna Degbeŋgyoo. 26Maa gegi Igyipitetena do tɛɛlese man, na maa yaasee wɔ gyu donɔɔse man. Botɔɔ te baa gyeŋ nyi maŋ yɛna Degbeŋgyoo.>