Hɛsekiɛle 29

Kegbala tia Igyipite

Be kedi Faaro nombia

1Kulutooneŋ kufute ŋon ɔ gyaalaŋna kufute ŋon wee kufualate nɛ, Degbeŋgyoo yako maŋ nyiaa, 2<Deniwalaŋ bu, besena n sia tee Igyipite gyoo Faaro na n ke gbala tia ŋon na Igyipite pou. 3Kolosi na n ke yako e nyiaa, <<Nnɛ yaa Degbeŋgyoo Doŋ Pou Nyee ne yako,

< <<Igyipite gyoo Faaro, me ta koro seŋ tia neŋ,

nyaŋ wonembukum ŋon n doo n boŋobiise man.

N ne yako nyi, <Naele yɛɛ me wui,

maŋ yɛɛna ke fa ma wose.>

4Maa mo darawaase do n kedaa man

na maa yela kpebia baŋ be doo n boŋobiise man nɛ ke mataa n bɔɔlɛɛ.

Maa wɔŋ neŋ lee n boŋobiise man,

mo kpuna kpebia baŋ pou be mataana n bɔɔlɛɛ nɛ.

5Maa tina neŋ yela depampaa keŋ man,

ɛmɛɛ na kpebia baŋ pou be doo n boŋobiise man nɛ.

Nyaŋ ka lee yala peŋteŋpereiŋ man,

te bɔɔ gyae baa gate neŋ yaa ba yilaa neŋ ya.

Maa mo neŋ fa ŋale man wonembia na adido gyebuse,

ŋgba weenɛɛ nɛ.

6Botɔɔ te baŋ pou be kyaa Igyipite nɛ, baa gyeŋ nyi maŋ yɛna Degbeŋgyoo.

< <<N yɛɛ ŋgba moro daŋ nɛ fa Igyipitetena. 7Be ka mo be nyiŋmaase kyaŋ neŋ nɛ, n tekeriwɔ te n kɛrɛɛ ba degbaŋgbaŋse. Ba ke teelina neŋ te n tekeriwɔ te n kɛrɛɛ be maamase.

8< <<Mena dɔɔ nnɛ yaa Degbeŋgyoo Doŋ Pou Nyee ne yako, Maa mo yoosila kaa tia neŋ, na maa koe balaŋ na wonembia pou. 9Igyipite gyae ke doo yakaa. Botɔɔ te baa gyeŋ nyi maŋ yɛna Degbeŋgyoo.

< <<Nawolo nyi nyaŋ kpa, <Naele yɛɛ me wui, maŋ yɛɛna ke.> 10Mena dɔɔ kɛɛ, mee tia ɛmɛɛ na n boŋobiise. Maa yela Igyipite tɛɛle ke wɔlɛɛ na ke doo yakaa lee Migedole kelii Asewan mo kelii naŋ Kusi wulu man. 11Walaŋ yaa wonembu nae be gyae ke laŋ botɔɔ ya, ŋolo be gyae waa kyaa botɔɔ ya kulutooneŋ sɔŋola (40). 12Maa yela Igyipite tɛɛle ke doo yakaa tɛɛlese ŋan ŋɔɔ wɔlɛɛ nɛ man, na ke donɔɔse dinaana ke doo yakaa kulutooneŋ sɔŋola (40) donɔɔse dinaana ŋan ŋɔɔ wɔlɛɛ nɛ man. Maa gegi Igyipitetena do tɛɛlese man, na maa yaasee wɔ do donɔɔse man.

13< <<Mɔna nnɛ yaa Degbeŋgyoo Doŋ Pou Nyee ne yako, kulutooneŋ sɔŋola ŋan wɔle nɛ, maa yilaa Igyipitetena lee tɛɛlese ŋan man mɔɔ yaasee wɔ do nɛ. 14Maa besena wɔ lee yoogbeŋiri man kɔŋ, na maa besena wɔ gyu Igyipite ado yenaŋ, be naanaɔ tɛɛle man. Baa yɛɛ gyoorideedii keŋ ke taŋ doŋ ya nɛ botɔɔ. 15Ke gyae ke yɛɛ gyoorideedii keŋ ke taŋ doŋ ya, te ka be gyae ke gate ka wose tɛɛlese ŋan dɔɔ bela ya. Maa yɔkɔse ke nideli keŋ nyi, ka be gyae ka tekaa di tɛɛlese dɔɔ bela ya. 16Iseraetena be gyae baa tekaa mo ba wose lɔ Igyipitetena dɔɔ bela ya. Mɔna baa tɔɔse be dukum keyɛɛ ŋgba bɔɔ gyu be gyaŋ nyi baa kyɔ wɔ nɛ. Botɔɔ te baa gyeŋ nyi maŋ yɛna Degbeŋgyoo Doŋ Pou Nyee.>> >

Nebukadenɛsa komketɔ

17Kulutooneŋ sao nyetoorote ŋon ɔ gyaalaŋ gyaŋgbate ŋon wee gyaŋgbate nɛ, Degbeŋgyoo yako maŋ nyiaa, 18<Deniwalaŋ bu, Babilɔn gyoo Nebukadenɛsa moo ɔ yoonɔɔtena gyu ke wuu Tirotena dɔɔ nideli. Nyee kamasɛ gbeewɔ te degbaŋgbaŋ kamasɛ kpeowɔ. Mɔna ŋon na ɔ yoonɔɔtena baŋ te nyiŋ tɔnɔɔ daale lee be ke gyu ke wuu Tiro dɔɔ ya. 19Mena dɔɔ nnɛ yaa Degbeŋgyoo Doŋ Pou Nyee ne yako, maa mo Igyipite do Babilɔn gyoo Nebukadenɛsa nyiŋmaa man, na waa kuu ɔ wose kenyiŋ laŋ. Waa ŋmaa na waa kuu tɛɛle keŋ man abɔɔ ŋgba komketɔ nɛ fa ɔ yoonɔɔtena. 20Me ta mo Igyipite fa e ŋgba komketɔ nɛ lee ɔ kakyeŋ kado dɔɔ, nawolo nyi ŋon na ɔ yoonɔɔtena yɛɛ ke bo fa maŋ. Degbeŋgyoo Doŋ Pou Nyee torola yako.

21<<Mena wee kenaŋ maa do 1 Iseraetena doŋ, na maa gyuusu n nɔɔ be man. Botɔɔ te baa gyeŋ nyi maŋ yɛna Degbeŋgyoo.>