Hɛsekiɛle 28

Kegbala tia Tiro gyoo

1Degbeŋgyoo yako maŋ nyiaa, 2< Deniwalaŋ bu, yako Tiro gyoo nyiaa, <<Nnɛ yaa Degbeŋgyoo Doŋ Pou Nyee ne yako,

<<N yakowɔ wose kegate man

te n yakowɔ nyiaa, <Me yɛɛ wurubuarɛ e,

Me kyaa wurubuarɛ ŋolo gyoorogbeli dɔɔ

ɛpose nsana.>

Doo nyi n na gyueŋ nyi n sia te kare ŋgba wurubuarɛ nɛ,

mɔna n yɛɛ deniwalaŋ e, te na wurubuarɛ ya,

3N sia te kare kela Daniɛle?

kolo ba weesɛɛ neŋ yee?

4N moo n nyansa na nombia man kenyii

mo nyiŋ kɔba fa n wose,

te n yilaa kɔba yayam na kɔba wolom

see nya abɔɔ dɛɛweesee.

5Nyansa keŋ n dana kebu kedi man,

te n moowɔ nyiŋ kɔba burum,

te n kɔba kenyiŋ dɔɔ,

n ne gate n wose adido.

6< <<Mena dɔɔ nnɛ yaa Degbeŋgyoo Doŋ Pou Nyee ne yako,

<<<Keŋ n na gyueŋ nyi n sia te kare,

n sia te kare ŋgba wurubuarɛ dɔɔ nɛ,

7kɛɛ, maa mo ŋɔɔla kɔŋ kaa tia neŋ,

tɛɛlese baŋ ba nyeeman dana doŋ,

baa wɔŋ be yoosila tia n kyeo na n nyansa.

na baa wɔlɛɛ nyɔ obuo keŋ ne ŋalakee nɛ.

8Baa mo neŋ gyu yeŋdɛɛ,

te nyaŋ ke yoo yala

ɛpose nsana.

9N ke yako botɔɔ kenaŋ nyi,<Me yɛɛ wurubuarɛ e,>

baŋ bɛɛ ko neŋ nɛ sia man?

N yɛɛ walaŋ e mɔna n te yɛɛ wurubuarɛ e

baŋ bɛɛ ko neŋ nɛ nyiŋmaa man ya.

10N ka yeŋ ŋgba baŋ ba te kara be baalawose ya

ŋɔɔla nyiŋmaase man.

Maŋ kolosila, Degbeŋgyoo Doŋ Pou Nyee torola yako.>> >

11Degbeŋgyoo yako maŋ nyiaa, 12<Deniwalaŋ bu, toroŋ fa Tiro gyoo na n ke yako e nyiaa, <<Nnɛ yaa Degbeŋgyoo Doŋ Pou Nyee ne yako,

Abɔɔ pou man na, (Degbeŋgyoo yɛɛ neŋ nideli,

nyansa te wulu neŋ, te n dana kyeo nideli.

13N kyaa Edɛn,

Wurubuarɛ wɔɔbii keŋ man,

n na mo boe koya doŋte kamasɛ desina n wose,

boya ŋenaŋ yɛna Kaneliya na Kirisolite, na emeralede, na

topase, na onisi, na yasipa, na

lapise lasure, na tekuose na bereli.

be kɔba yayam te ba moowɔ yɛɛ keŋ baa mo ŋa do nɛ,

be yɛɛ ŋa fa neŋ wee keŋ bɔɔ yɛɛ neŋ nɛ. 14Be tiu neŋ nuŋ ŋgba Kerubi ŋon ɔ ne gyee balaŋ nɛ,

nawolo nyi maŋ seena neŋ.

N kyaawɔ Wurubuarɛ bula fereŋkyeŋ keŋ dɔɔ,

n tɛɛwɔ boya ŋan ŋɛɛ ŋalakee nɛ man.

15Be te nyiŋ nombiikum kamasɛ n man,

leenaŋ wee keŋ bɔɔ yɛɛ neŋ nɛ ya

kelii wee keŋ bɔɔ naa akpanyanyaŋ n man.

16N kebu kedi burum dɔɔ te

akaraŋkaraŋ wulu neŋ

te n yɛɛ dukum.

Mena dɔɔ me gegi neŋ lee Wurubuarɛ bula keŋ dɔɔ na n desɛŋ,

te me tuu nyaŋ kerubi gyeere

lee boya ŋan ŋɛɛ ŋalakee nɛ man.

17N kyeo dɔɔ

n gate n wose adido,

obuo keŋ n dana dɔɔ

n wɔlɛɛ n nyansa,

Mena dɔɔ te me fuŋa neŋ lɔ tɛɛleman nɛ,

me yɛɛ neŋ nyi gyooneŋ de naa neŋ na, bee kulu neŋ.

18N nombiakumɛɛ na anokoare keŋ n te dii kebu kedi man ya dɔɔ,

n ta do n deni fereŋkyeŋse ŋan ayimɛɛ.

Mena dɔɔ me yelaa boalaŋ leewɔ n man

kaa kpaa neŋ kerekere,

te ma besenaa neŋ yɛɛ tɔŋ tɛɛle dɔɔ

baŋ pou bɛɛ kɛɛ neŋ nɛ siaman.

19Tɛɛlese baŋ pou ba gyeŋ neŋ

nɔɔse te doo wɔ,

nyɔ ɔto dana gyakoloŋ,

te n ba tekaa kyaa bela ya.

Kegbala tia Sidon

20Degbeŋgyoo yako maŋ nyiaa, 21<Deniwalaŋ bu mo n sia tee Sidon na n ke gbala tia e. 22Na n ke yako nyiaa, <<Nnɛ yaa Degbeŋgyoo Doŋ Pou Nyee ne yako,

Mɛɛ seŋ tia nyaŋ Sidon,

te maa lese me gyoorobiiri wola neŋ.

Me wɔŋ n deŋele

te ma lese wola neŋ nyi me yɛɛ fereŋkyeŋ nɛ,

nyaŋ ka gyeŋ nyi maŋ yɛna Degbeŋgyoo.

23Maa yela kaweekum kekɔŋ n dɔɔ,

na n balaŋ burum ka yeŋ doo nya abɔnterese man,

baa koe wɔ lɔ n donɔɔ man,

te yoosila gyae ke yoo tia neŋ yenaŋ kamasɛ.

Botɔɔ te n ka gyeŋ nyi maŋ yɛna Degbeŋgyoo

24< <<Na Iseraetena ba tekaa nyiŋ dɔɔna kumɛɛ baŋ bɛɛ sɔkee ŋgba kpalamse na kpaŋkpaŋkorolose nɛ bela ya. Botɔɔ te baa gyeŋ nyi maŋ yɛna Degbeŋgyoo.

25Nnɛ yaa Degbeŋgyoo Doŋ Pou Nyee ne yako, akpaa me yilaa Iserae lee tɛɛlese ŋan man bɔɔ yaasee gyu nɛ, maa ta be dɔɔ lese ma fereŋkyeŋ wola tɛɛlese ŋan siaman. Na nɛnɛɛ baa kyaa baŋ gbagba be tɛɛle keŋ mɔɔ mo fa ma somre Yakɔbe nɛ dɔɔ. 26Baa kyaa botɔɔ wɔekefɛɛ man na baa baŋee denɛɛ na baa fara gerepo wɔɔse. Akpaa me wɔŋ be dɔɔna baŋ bɔɔ kulu wɔ nɛ deŋele na, baŋ baa kyaa wosefɛɛreŋ man. Botɔɔ te baa gyeŋ nyi maŋ yɛna Degbeŋgyoo be Wurubuarɛ.>> >