Hɛsekiɛle 27

Katoroŋ fa Tiro

1Degbeŋgyoo yako man nyiaa, 2<Deniwalaŋ bu, toroŋ fa Tiro, 3yako Tiro keŋ ke kyaa ɛpo keŋ gbɛɛ, na kebudiira burum baŋ be kyaa ɛpo nɔɔman nɛ nyiaa, <<Nnɛ yaa Degbeŋgyoo Doŋ Pou Nyee ne yako,

<<<Tiro, n ne yako nyi,

<Me dana kyeo nideli.>

4N te fɛlɛɛ n wulu gyu ɛpose dɔɔ,

baŋ bɔɔ baŋ neŋ nɛ yɛɛ neŋ kyeo kyeo.

5Senire te ba moo n yunipa taabɔɔ daase lee

kaa yae n daase pou1,

ba moo sida daase lee Lebanɔn

kaa yae daŋ dɔɔloŋ dɔɔloŋ fa neŋ.

6Basan te ba moo kpeli daase lee

kaa yae n daase ŋan bɛɛ mo saa degbele nɛ,

Kipero te ba moo kateenaa daase lee

kaa yɛɛ dɛɛtɛese, te ba moo tuukela desina ke.

7Ba moo kanyaŋ kpaakpaate keŋ bɔɔ gbili ke lee Igyipite kaa yɛɛ n feliŋ kanyaŋ

keŋ gyae ke yɛɛ n felage,

ba mo kanyaŋ buluu na amɔla loŋ lee Ɛlisa keŋ ke kyaa ɛpo nɔɔman nɛ

kaa yɛɛ wuluŋ fa n dekyae keŋ.

8Sidon na Arefade baala yɛna n degbele saara,

Tirotena baŋ ba gyeŋ adao tomse keyɛɛ nɛ, ne saana neŋ.

9Gebal kegyiise baŋ ba gyeŋ nyiŋmaa man tomse nɛ, ne yɛɛna tom n pantuu keŋ man.

na akpaa ka de wɔlɛɛ na baa desina ke.

Ɛpo keŋ Pantuuse na baŋ bɛɛ kaŋ ŋa nɛ pou

ne kɔŋ kaa lɛɛ nya abɔɔ.

10<<<Pesia, na Lidiya na Pute baala,

yɛna yoonɔɔtena n yoonɔɔ dikpii man.

Bɛɛ mo ba nyeele pampasaŋse na nyeela kotɔtɔɔse wuluŋu nya akyaŋse dɔɔ,

keŋ na mo obuo kɔna neŋ.

11Arefade na Heleke baala

ne gyeena nya akyaŋse yenaŋ kamasɛ,

Gamade baala,

kyaala nya akagyase dɔɔ.

Ba moo ba nyeela pampasaŋse wuluŋu nya akyaŋse gyaŋee,

baŋ yelela n yɛɛ kyeo nideli.

12< <<Ɛmɛɛ na Taresisitena dii kebu lee nya abɔɔ kpaakpaa ŋan n dana dɔɔ. Ba moo kɔba wolom, na nyeele bibiini, na nyeele, na sumpi kaa kyɛɛkeena nya abɔɔ.

13< <<Ɛmɛɛ na Gerisetena na Tubaletena na Mesɛketena dii kebu. Ba moo balaŋ na kɔbere abɔɔ kaa kyɛɛkeena nya abɔɔ.

14< <<Bɛte Togarema baala moo dɛɛkyɔŋse na yoo dɛɛkyɔŋse na afurumse kyɛɛkeena nya abɔɔ.

15<<<Ɛmɛɛ na Dedanetena2 dii kebu, te baŋ be kyaa ɛpo nɔɔman nɛ yɛna n kebudiira. Ba moo tuukela na daŋ bibiini keŋ bɛɛ bake nyi eboni nɛ tɔ neŋ kom.

16Ɛmɛɛ na Arametena dii kebu lee nya abɔɔ burum ŋan n be yɛɛ nɛ dɔɔ, ba moo boe Tekuose na kanyaŋ amɔla loŋ, na kanyaŋ keŋ bɔɔ mo ŋmeeseŋ kpookpoo loo, na akaralɛɛ na boe keŋ bɛɛ bake ke korale na kegyaŋase kpaakpaa nyiŋan kaa kyɛɛkeena nya abɔɔ.

17<<<Ɛmɛɛ na Yuda na Iserae dii kebu, ba moo ba aboŋ lee Minite na aboŋ weenɛɛ na teebɔɔ na oliifi nuŋ na nuŋtee kaa kyɛɛkeena nya abɔɔ.

18< <<Abɔɔ burum ŋan n be yɛɛ na n wose kenyiŋ beiŋ dɔɔ ɛmɛɛ na Damasekuse dii kebu. Ba moo waen lee Hɛlebon na nam wona lee Sahare 19na waen osuŋ dinaa lee Isale na nyeele bibiini keŋ bɔɔ tuku na abɔɔ ofoŋ nyiŋan kaa kyɛɛkeena nya abɔɔ.

20< <<Dedane yɔɔ kuŋtuŋse ŋan bɛɛ mo gyakaa dɛɛkyɔŋ dɔɔ fa neŋ.

21< << Arabiya na Kedare kegyiise pou ne di kebu fa neŋ, bɛɛ kɔŋ kaa yɔɔ namense bia, na namense baala na asoose fa neŋ.

22< <<Ɛmɛɛ na Seba na Rama dii kebu, n kebudiira dɔɔ bɛɛ mo abɔɔ ofoŋ nyiŋan na boya kpaakpaa na kɔba yayam kaa kyɛɛkeena nya abɔɔ.

23< <<Ɛmɛɛ na Haran, na Kane, na Ɛdɛn na Seba kebudiira, na Asure na Kilimade dii kebu. 24Be yɔɔ kegbase, na kanyaŋ buluu, na kanyaŋse ŋan bɔɔ mo ŋmeeseŋ kpookpoo loo, na kapɛte keŋ bɔɔ mo ŋmeleŋ loo, te bɔɔ gbili ke nɔɔse kyaŋ nɛ n kebu man.

25< <<Taresisi pantuuse baŋ

na moona nya abɔɔ.

Nya abɔɔ boe te ŋe dana yuŋ

ɛpo keŋ dɔɔ.

26N degbele saara na mo neŋ

gyu ɛpose burum dɔɔ lemlem.

Mɔna weese dɛɛlee feliŋ gyae ke yɛlɛɛ neŋ bogobogo

ɛpo keŋ nsana nsana.

27Wee keŋ n pantuu waa yɛlɛɛ nɛ,

n wose kenyiŋ, na n kebu abɔɔ, na nya abɔɔ kpaakpaa,

na n pantuu kaŋara, na baŋ bɛɛ wola pantuu keŋ gbɛɛ na baŋ bɛɛ desina pantuu keŋ,

na n kebudiira, na n yoonɔɔtena,

na ɔkamasɛ ŋon ɔ kyaa ke man nɛ

waa munu gyoo ɛpo keŋ tɔɔman

28Pantuu kaŋara baŋ yeesa

gyae ke yela ɛpo nɔɔman tɛɛle keŋ ke wosi.

29Baŋ pou be dana daase ŋan bɛɛ mo saa degbele nɛ

baa tina be pantuuse yela,

baŋ bɛɛ wola pantuu keŋ gbɛɛ na pantuu kaŋara baŋ pou

baa gyu ka seŋ dekeŋkeŋ dɔɔ.

30Ba lɔ nɔɔ

na baa mo dekɔkɔrɔkɔɔ wii fa neŋ,

baa mo aŋasa woli baa nyeeya

na baa biliŋi tɔŋ man.

31Lee nyaŋ dɔɔ baa gbee ba nyeeya

na baa wuu titire kotokuse.

Baa mo dekɔkɔrɔkɔɔ wii fa neŋ

na baa mo weeleŋ di waraŋsa fa neŋ.

32Be lɔ nɔɔ bɛɛ di waraŋsa fa neŋ nɛ,

baa toroŋ fa neŋ nyiaa,

<Amɔte yɛɛla yididi ŋgba Tiro,

ŋon ɛpo be kilisi e nɛ?>

33N kebudiira de gyu boo diŋgyiŋ kɔŋ na,

tɛɛlese burum ne nyaŋee

lee n wose kenyiŋ na nya abɔɔ ŋan

n ba mo mia tɛɛle kei dɔɔ gyooneŋ nɛ dɔɔ.

34Nɛnɛɛ ɛpo keŋ te yele n te yɛlɛɛ,

loŋse ŋan tɔɔman

nya abɔɔ na n balaŋ pou

te munu kpuna neŋ.

35Baŋ pou be kyaa ɛpo nɔɔman tɛɛlese man,

wose te gbirisi wɔ lee nyaŋ dɔɔ,

be gyooneŋ te yala koyololo,

be siagbɛɛ te kyɛɛkee lee gyakoloŋ dɔɔ.

36Kebudiira baŋ be kyaa tɛɛlese ŋan man na boŋo neŋ,

nyɔ ɔto dana gyakoloŋ,

te n ba tekaa kyaa bela ya.>> >