Hɛsekiɛle 26

Kegbala tia Tiro

1Kulutooneŋ kufu alate ŋon ɔ gyaalaŋna kufudaalete ŋon wee gyaŋgbate nɛ, Degbeŋgyoo yako maŋ nyiaa, 2<Deniwalaŋ bu, keŋ Tiro be yako lee Yerusalɛm wose man nyi, <<Mbo, ba te tekerii tɛɛlese denaanɔɔ keŋ te ba toro ka asima see maŋ, nɛnɛɛ keŋ ɔ be yɛlɛɛ dɔɔ maa nyiŋ ma wose>> dɔɔ nɛ, 3nnɛ yaa Degbeŋgyoo Doŋ Pou Nyee ne yako, me te tia nyaŋ Tiro, te maa mo tɛɛlese burum kaa tia neŋ, ŋgba mena keŋ ɛpo kegyɔ na koro. 4Baa tekerii Tiro akyaŋse na baa yɛlɛɛ wa akagyase ŋan. Maa gbee ka agbaŋtalɛɛ pou na ke ka bese kpanaŋ wolo. 5Ke gyae ka bese botɔɔ keŋ baa leŋ asawuse ɛpo nɔɔman, nawolo nyi ma te kolosi. Waa bese botɔɔ keŋ tɛɛlese baa kuu yooman abɔɔ. Degbeŋgyoo Doŋ Pou Nyee torola yako. 6Baa mo yoosila koe balaŋ baŋ be kyaa donɔɔse ŋan kyaa ɔ tɛɛle keŋ dɔɔ nɛ, na baa gyeŋ nyi maŋ yɛna Degbeŋgyoo.

7Nawolo nyi nnɛ yaa Degbeŋgyoo Doŋ Pou Nyee ne yako, maa mo Babilɔn gyoo Nebukadenɛsa ŋon ɔ yɛɛ gyooneŋ man gyoo e nɛ, na dɛɛkyɔŋse na anebiliŋiŋse na dɛɛkyɔŋ kyaara na yoonɔɔtena dikpii dinaa daale lee adoyenaŋ kaa tia Tiro. 8Waa mo yoosila koe balaŋ baŋ be kyaa donɔɔse ŋan kyaa tɛɛle keŋ dɔɔ nɛ, na waa tɔ ŋon do na waa baŋee akyaŋse kilisi ŋon na waa gyina ɔ nyeele pampasaŋse tia ŋon. 9Waa mo ɔ daŋ keŋ tee nya akyaŋse ŋan, na waa mo ɔ yoo abɔɔ yɛlɛɛ nya akagyase ŋan. 10Ɔ dɛɛkyɔŋse baa bo nideli keŋ nyi ba akuŋkuŋ gyae ke wuu n dɔɔ. Yoo dɛɛkyɔŋse na kɔtase ŋan bɛɛ wɔŋee na anebiliŋiŋse da gyoo n denaanɔɔ man na, be yeesa gyae ke yela nya akyaŋse ke seree, ŋgba mena keŋ baala na gyoo donɔɔ dinaa keŋ bɔɔ tekerii ka akyaŋse man nɛ. 11Ɔ dɛɛkyɔŋse awɔkatese gyae ke sakatee nya abɔnterese pou man. Waa mo yoosila koe n balaŋ na n piilase doŋ nyiŋan ke tekerii yala. 12Baa kuu nya dedii na baa ŋmɛɛle n kebu abɔɔ, baa tekerii nya akyaŋse na baa yɛlɛɛ n denɛɛ kpaakpaa nyiŋan na baa fuŋii n boya na n deni daase na nya agbaŋtalɛɛ ka do ɛpo man. 13Maa yela ɛ nɔɔneŋ yeesa ke kɔŋ ɔto, te ŋolo ba tekaa nyii ya adolɛɛse mɔ kewii ya. 14Maa yɛɛ neŋ kpanaŋ, na n ka bese botɔɔ keŋ baa leŋ asawuse. Bɔɔ gyae baa bese baŋ neŋ bela ya, nawolo nyi maŋ Degbeŋgyoo te kolosi, Degbeŋgyoo Doŋ Pou Nyee torola yako.

15Nnɛ yaa Degbeŋgyoo Doŋ Pou Nyee ne yako Tiro, akpaa boonɔɔ tɛɛlese de nyii baŋ bɔɔ gooli wɔ kakeŋee, na baŋ bɔɔ koe n man yeesa na, bɔɔ gyae baa seree lee n keyala dɔɔ yee? 16Kenaŋ na ɛpo nɔɔman kegyiise pou baa koro lee be gyoorogbelɛɛ dɔɔ, na baa kpee be gyooro kegbase see na baa lese ba abɔɔ ŋan bɔɔ gbili ŋa nɛ see. Gyakoloŋ gyae ka gyoo wɔ na baa tisi kyaa tɛɛle man, na baa seree debaŋ kamasɛ na n nombia ke doo be nɔɔ. 17Baa toroŋ lee nyaŋ dɔɔ na baa yako neŋ nyiaa,

< <<Donɔɔ keŋ n be lɛɛ yele, kɛɛ n kewɔlɛɛ,

nyaŋ ŋon ɛpo nɔɔman balaŋ be kyaa n man.

Nyaŋ ŋon n be nyiŋ doŋ ɛpo dɔɔ,

ɛmɛɛ na n donɔɔmantena,

n moo n gyakoloŋ

do baŋ pou be kyaa botɔɔ nɛ man.

18Nɛnɛɛ ɛpo nɔɔmantena ne seree,

n keyala wee keŋ,

tɛɛlese ŋan loŋ be kilisi ŋa ɛpo man nɛ,

wose te gbirisi wɔ lee n kewɔlɛɛ dɔɔ.>>

19Nnɛ yaa Degbeŋgyoo Doŋ Pou Nyee ne yako, akpaa me yele n bese donɔɔ keŋ doo yakaa, ŋgba donɔɔse dinaana ŋan man balaŋ be kyaa ya, te me yele n gyoo ɛpo tɔɔman te loŋse de kaa wuu n dɔɔ nɛ, 20maa tisina neŋ do tɛɛle man kpuna baŋ be doo yebɔɔ man, kpuna baŋ bɔɔ wulaa yeŋ nɛ. Maa yela n ke doo tɛɛle tɔɔman, ŋgba gyaŋgba donɔɔse ŋan be wɔlɛɛ nɛ, kpuna baŋ bɔɔ gyoo yebɔɔ man nɛ. N be gyae n ka bese kɔŋ yaa n kaa mo n dekyae baŋ be kyaa nɛ man ya. 21Maa yela nyɔ ɔto ke yɛɛ gyakoloŋ keŋ n be gyae n ke kyaa bela ya. Baa kɛo neŋ mɔna bɔɔ gyae baa naa neŋ korakora ya. Degbeŋgyoo Doŋ Pou Nyee torola yako.>