Hɛsekiɛle 25

Kegbala Tia Amonitena

1Degbeŋgyoo yako maŋ nyiaa, 2<Deniwalaŋ bu, mo n sia tee Amoritena na n ke gbala tia wɔ 3Yako wɔ nyiaa, <<Nyii Degbeŋgyoo Doŋ Pou Nyee nombii. Nnɛ yaa Degbeŋgyoo Doŋ Pou Nyee ne yako, keŋ n be yako nyi <Mbo> debaŋ keŋ bɔɔ waalaa ma fereŋkyeŋ keŋ te Iserae doo yakaa, na debaŋ keŋ bɔɔ yoo kyaŋ Yudatena gyu gbeŋiri man dɔɔ, 4kɛɛ, maa mo neŋ fa balaŋ baŋ be kyaa weese dɛɛlee ŋgba be dedii nɛ. Baa lese deyilae kyaa na baa baŋee kanyaŋ denɛɛ n man, baa di n daasebia na baa nyɔɔ n miliki. 5Maa besena Raba yɛɛ wonembia deedii fa kurumɔɔse, na Amon ka bese namense defɛɛfoe. Botɔɔ te ɛ ka gyeŋ nyi maŋ yɛna Degbeŋgyoo. 6Nnɛ yaa Degbeŋgyoo Doŋ Pou Nyee ne yako, keŋ n be gyɔ n nyiŋmaase te n ba mo n nae too tɛɛle, te n be nyaŋee kpuna nombiakumɛɛ ŋan pou doo n konɔɔ man tia Iserae tɛɛle dɔɔ nɛ, 7maa gyina me nyiŋmaa tia neŋ na maa mo neŋ fa tɛɛlese ŋgba yooman abɔɔ nɛ. Maa munu neŋ lee tɛɛlese man na maa lese neŋ lee tɛɛlese ŋan dɔɔ. Maa wɔlɛɛ neŋ na n ka gyeŋ nyi maŋ yɛna Degbeŋgyoo.

Kegbala tia Moabe

8<Nnɛ yaa Degbeŋgyoo Doŋ Pou Nyee ne yako, <<Keŋ Moabe na Seire be yako nyi, <Kɛɛ, Yuda te yɛɛ ŋgba tɛɛlese akaŋ ŋan pou dɔɔ nɛ,> 9maa wɔlɛɛ Moabe wuluse, maa mo lee donɔɔse ŋan doo ɔ wuluse man, ŋgba Bete Yesimote na Baal Meone na Kireyatayim. Ŋan yɛna tɛɛle kenaŋ gyoorobiiri. 10Maa mo Moabe kpuna Amoritena fa baŋ be kyaa weese dɛɛlee ŋgba be dedii nɛ, na bɔɔ tekaa tɔɔse Amonitena tɛɛlese man ya, 11te maa wɔŋ Moabe deŋele. Botɔɔ te baa gyeŋ nyi maŋ yɛna Degbeŋgyoo.>> >

Kegbala tia Ɛdom

12<Nnɛ yaa Degbeŋgyoo Doŋ Pou Nyee ne yako, <<Keŋ Ɛdom ba mo dukum tɔ Yuda kom te bɔɔ di fɔɔ lee keŋ bɔɔ yɛɛ nɛ dɔɔ, 13mena dɔɔ nnɛ yaa Degbeŋgyoo Doŋ Pou Nyee ne yako, maa gyina me nyiŋmaa tia Ɛdom na maa koe balaŋ na wonembia pou. Maa yela ka ke doo yakaa, te lee Teman kelii Dedane baa yala yoosila nɔɔman. 14Maa ta me balaŋ Iseraetena dɔɔ tɔ Ɛdom kom, baa lese me baŋ na me baŋ nedoŋ wola Ɛdom, te baa naa ma komketɔ. Degbeŋgyoo Doŋ Pou Nyee torola yako.

Kegbala tia Filisitena

15<Nnɛ yaa Degbeŋgyoo Doŋ Pou Nyee ne yako, <<Keŋ Filisitena be yoo tɔ kom lee nombiakumɛɛ ŋan doo be konɔɔ man dɔɔ, te leenaŋ beneŋ beneŋ kekɔla dɔɔ bɛɛ gyae baa wɔlɛɛ Yuda, 16mena dɔɔ nnɛ yaa Degbeŋgyoo Doŋ Pou Nyee ne yako, mɛɛ gyae maa gyina me nyiŋmaa tia Filisitena baŋ, na maa feefo Keretitena yela na maa wɔlɛɛ baŋ bɔɔ kaa Ɛpo nɔɔman nɛ. 17Maa tɔ wɔ kom nideli na maa wɔŋ ba deŋele me baŋ nedoŋ dɔɔ. Nyi me tɔ wɔ kom nɛ, botɔɔ te baa gyeŋ nyi maŋ yɛna Degbeŋgyoo,>> >