Hɛsekiɛle 24

Yerusalɛm ŋgba saabu nɛ

1Kulutooneŋ kadaalete ŋon ɔ gyaalaŋna kufute ŋon wee kufute nɛ, Degbeŋgyoo yako maŋ nyiaa, 2<Deniwalaŋ bu, ŋmarase gyɛŋ wee kei, gyɛŋ wee kei gbagba see, nawolo nyi Babilɔn gyoo te kaa tɔ Yerusalɛm do gyɛŋ wee kei. 3Gyɔ dudu fa deŋeledoŋtena kɛwɔ na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ne yako,

< <<Mo saabu keŋ gyakaa boalaŋ dɔɔ, mo ke gyakaa,

na n ke kyee loŋ do ke man.

4Mo naane akeretiiŋ ŋan do ke man,

naane kpaakpaa nyiŋan, dekpalatee na baam.

Mo ŋɔɔ kpaakpaa ŋan wulu ke man,

5mo nam kpaakpaate.

Mo daase do boalaŋ keŋ man,

yela ke ke fiu,

na ŋɔɔ ŋan ka bee ke man.

6< <<Nawolo nyi nnɛ yaa Degbeŋgyoo Doŋ Pou Nyee ne yako,

< <<Donɔɔ dinaa keŋ bɛɛ koe balaŋ,

saabu keŋ be doo kandorɔse,

te ŋe bɛɛ lee ya nɛ, baa laako.

Lese naane ŋan dokoloŋ dokoloŋ,

naa tɔɔsee ŋe man ya.

7Nawolo nyi balaŋ baŋ ɔ ba koe ɔ man nɛ,

ɔ kyɛɛkee be fatabo leki kpanaŋ dɔɔ,

ɔ te kyɛɛkee ke leki tɛɛle man,

na aŋasa ke wuu ke dɔɔ ya.

8Keŋ gyae ke yɛɛ na me baŋ nedoŋ ka koro na maa tɔ kom dɔɔ,

me yelaa ɔ fatabo keŋ dɔɔwɔ kpanaŋ dɔɔ,

na aŋasa be nyiŋ wuu ke dɔɔ ya.

9Mena dɔɔ nnɛ yaa Degbeŋgyoo Doŋ Pou Nyee ne yako,

< <<Donɔɔ dinaa keŋ ɔ na koe balaŋ nɛ, waa laako

Maŋ mɔ maa yilaa daase see ka koro.

10Mena dɔɔ yilaa daase ŋan,

na n ka do boalaŋ keŋ.

Gyakaa naane keŋ nideli,

na n ka mo abɔɔ do ke man nideli,

na ŋɔɔ ŋan ke nyakee.

11Nɛnɛɛ mo saabu wolo keŋ gyakaa nyewalaŋ dɔɔ,

kelii debaŋ keŋ ke gyae laŋe na nyeele keŋ ke yase,

na ayimɛɛ ŋan doo ke man nɛ ke yalakee,

na ke kandorɔse ŋan ke nyakee pou.

12Ŋan pou mɔɔ yɛɛ te yɛɛ yakaa,

boalaŋ gba te tale nyakee ke kandorɔse ŋan ya.

13Nya ayimɛɛ yɛna desɛŋ nombia ŋan. Nawolo nyi me yɛɛ kakyeŋ maa faafo neŋ, mɔna ma te tale faafo neŋ lee nya ayimɛɛ man ya. N be gyae n ka lee nya ayimɛɛ man bela ya, kelii debaŋ keŋ me baŋ nedoŋ gyae ka lee n dɔɔ.

14Maŋ Degbeŋgyoo te kolosi. Debaŋ te lii fa maŋ keŋ maa yɛɛ kolo. Mɔɔ gyae maa tina ka keyɛɛ yela ya, mɔɔ gyae maa wii waraŋase yaa maa kyɛɛkee ma nyeempɔ ya. Maa di n nombia ŋgba mena keŋ nya ayɛɛsa na n dinɔɔ doo nɛ. Degbeŋgyoo Doŋ Pou Nyee torola yako.>> >

Hɛsɛkiɛle wɛɛle yeŋ

15Degbeŋgyoo yako maŋ nyiaa, 16Deniwalaŋ bu, maa lese ŋon ɔ na gyoo n sia nɛ karatetee dokoloŋ. Mɔna naa toroŋ yaa n ke wii yaa n ka lese siasaraŋ ya. 17Muutii diiŋ, naa wii fa ŋon ɔ ba yem nɛ ya. Mo nyee kebake kanyaŋbii bake n nyee na n ka do nkyokotase. Naa wuu n siagbɛɛ yaa n ke di liatɛɛ weenɛɛ ya.>

18Mena dɔɔ me kolosiwɔ fa balaŋ baŋ nebo, ke balinɔɔ na te me wɛɛle yeŋawɔ. Ke tɛɛkena nebo nɛ, me yɛɛwɔ ŋgba mena keŋ Degbeŋgyoo be faedo maŋ nɛ.

19Keŋte balaŋ baŋ bɔɔse maŋ nyaa, <Woŋ yaa n ne gyae n ke yako daa? Weera dɔɔ te n ne yɛɛ abɔɔ nnɛ?>

20Te me yako wɔ nyiaa, <Degbeŋgyoo yako maŋ nyi, 21yako Iseraetena nyiaa, <<Nnɛ yaa Degbeŋgyoo Doŋ Pou Nyee ne yako, maa waalaa ma fereŋkyeŋ keŋ, keyeu kagyoo keŋ dɔɔ ɛ ne gate ɛ wose, kpene keŋ na gyoo ɛ sia na keŋ ne gyɔ ŋon loo nɛ. Ɛ bia alebia na tewulɛɛ baŋ ɛ be tina yela wɔle nɛ baa yala yoosila nɔɔman. 22Ɛ ke yɛɛ ŋgba mena keŋ mɔɔ yɛɛ nɛ. Ɛ be gyae ɛ ka mo kolo wuu ɛ siagbɛɛ yaa ɛ ke di liatɛɛ weenɛɛ ya. 23Ɛ nyeeya dɔɔ kanyaŋbii keŋ gyae ke bake ɛ nyeeya dɔɔ, na ya nkyokotase ke doo ɛ naawɔɔ man. Ɛ be gyae ɛ ke di waraŋsa yaa ɛ ke wii ya, mɔna ɛ ke ka lee ɛ dukum dɔɔ na ɛ ka keketee ɛ wose man. 24Hɛsɛkiɛle ne gyaela waa yɛɛ kagyene fa ŋon, ɛ ke yɛɛ ŋgba mena keŋ ŋon mɔ be yɛɛ nɛ. Akpaa dekɔŋ mena nɛ, ɛ ka gyeŋ nyi maŋ yɛna Degbeŋgyoo Doŋ Pou Nyee.>>

25Te nyaŋ deniwalaŋ bu, wee keŋ maa lɛo ba keyeu kagyoo keŋ, ba kenyaŋee na gyoorobiiri na keŋ na gyoo be sia na keŋ be konɔɔ ne gyae na be bia alebia na bia tewulɛɛ nɛ, 26wee kenaŋ ŋon ɔ be nyiŋ gbɛɛ yeu lee waa kaa yako neŋ nombia ŋan. 27Mena wee kenaŋ n nɔɔ gyae ke gyuusu, nyaŋ ke kolosina e keŋ n be wuu n nɔɔ ya. Nyaŋ ke yɛɛ kagyene fa wɔ na baa gyeŋ nyi maŋ yɛna Degbeŋgyoo.>