Hɛsekiɛle 23

Futooli ala bala baŋ

1Degbeŋgyoo yako maŋ nyiaa, 2<Deniwalaŋ bu, ala bala baale kyaawɔ keŋ be yɛɛ naa dokoloŋ biawɔ. 3Leenaŋ ba alebiiritɛɛ te ba bese futooli ala, te be yɛɛ baala nombia Egyipite. Tɛɛle kenaŋ man te be yelaa baala kyaŋa ba ade te baa kyekpaa wɔ. 4Kegyia ŋon yele yɛna Ohola te kemaasa ŋon yele yɛna Oholiba. Be yɛɛ me wui te ba lolee bia alebia na tewulɛɛ. Ohola yɛna Samaria te Oholiba yɛna Yerusalɛm.

5< Ohola yɛɛ kafoŋ debaŋ keŋ ɔ saŋgba ɔ yɛɛ me wui, te Asiriya baala baŋ be yɛɛ yoonɔɔtenawɔ nɛ gyɔɔ e loo, 6Ba doona kegbase buluu, te be yɛɛ Asiriyatena kegyiise na yoonɔɔ siamantenawɔ, be popou mɔ yɛɛ bia tewulɛɛ baŋ be dana kyeo te be kyaa dɛɛkyɔŋse dɔɔ. 7Ɔ doowɔna Asiriyatena kegyiise baŋ pou, te ɔ som ɔkamasɛ ŋon ɔ be gyɔ e loo nɛ bɛɛneŋ. 8Ɔ te tina futooli keŋ ɔ be yɛɛ lee Igyipite debaŋ keŋ ɔ yɛɛ alebu e te tewulɛɛ be doona e te bɔɔ kyaŋ wa ade te bɔɔ mo e lese be lookum nɛ yela ya.

9<Mena dɔɔ me ta mo e do ɔ diidɔɔna Asiriyatena baŋ, bɛɛ gyɔ e loo nɛ nyiŋmaa man. 10Ba kpee e deteŋteli, te ba moo ɔ bia alebia na tewulɛɛ laŋ te ba moo yoosila ko e. Ala ne kolosi ɔ nombia yenaŋ kamasɛ, lee deŋele kewɔŋ keŋ be kɔŋ ɔ dɔɔ nɛ dɔɔ.

11< Ɔ naabu Oholiba naa keŋ ɔ kɔɔ ne yɛɛ, mɔna ɔ lookum na ɔ futooli kela ɔ kɔɔ wui. 12Ŋon mɔ doowɔna Asiriya kegyiise na yoonɔɔtena siamantena, na yoonɔɔtena baŋ ba doona be yoo abɔɔ te be kyaa dɛɛkyɔŋse dɔɔ na tewulɛɛ baŋ pou be dana kyeo nɛ. 13Me naawɔ nyi ŋon mɔ ta do ɔ wose ayimɛɛ, te be popou tɛɛwɔ gbɛɛ dokoloŋ dɔɔ.

14<Te ɔ gyakaa ɔ baala kegyae dɔɔ. Ɔ naa baala wɔŋtaase akyaŋse dɔɔ, Kalediyatena yoonɔɔtena baŋ ba doona abɔɔ yayama, 15na be kpaŋana bɛlɛte ba teŋase man be wɔŋe man. Be popou wɔɛ ŋgba Babilɔntena 16Ɔ ka betaa naa wɔ pɛ, te be gyɔɔ e loo te ɔ kpilawɔ gyu be gyaŋ Kaledeya. 17Botɔɔ te Babilɔntena baŋ kɔŋawɔ kaa doona e, te ba moo ba lookum do e ayimɛɛ. Be ka do e ayimɛɛ taŋ nɛ, takaa maŋ te ɔ wɔŋa ɔ wose lee be man. 18Ɔ ka lese ɔ futooli ayɛɛsa debɔɔ, na ɔ ka lese ɔ wose deteŋteli nɛ, takaa maŋ te me wɔŋa ma wose lee ɔ gyaŋ, ŋgba mena keŋ mɔɔ wɔŋ ma wose lee ɔ kɔɔ gyaŋ nɛ. 19Mɔna ɔ gyakaa ɔ ne yɛɛ baala nombia beiŋ kela wa alebiiritɛɛ keŋ ɔ yɛɛ futooli e Igyipite nɛ. 20Botɔɔ te ɔ gyae ɔ baala baŋ be baala wose wɔɛ ŋgba afurumse wui, te bee doona ala beiŋ nɛ. 21Te n desɛŋ nombia ŋan n be yɛɛ nya alebiiritɛɛ debaŋ keŋ n kyaa Igyipite, keŋ bɔɔ doona neŋ te bɔɔ posaa nya ade nɛ gyɔɔ neŋ loo.

22<Mena dɔɔ Oholiba, nnɛ yaa Degbeŋgyoo Doŋ Pou Nyee ne yako, Maa yela baŋ n ne gyae nɛ ka koro seŋ tia neŋ, baŋ n be wɔŋ n wose lee be gyaŋ nɛ, te maa yela baa lee yenaŋ kamasɛ koro seŋ tia neŋ. 23Baŋ yɛna Babilɔntena na Kalediyatena pou, Pekode na Soa na Koa baala, na Asiriyatena baŋ pou be kpuɛna wɔ, na tewulɛɛ baŋ be dana kyeo, na kegyiise na yoonɔɔ siamantena, na kegyiise baŋ bɛɛ kyaa anebiliŋiŋse na baala baŋ be dana obuo, be popou kyaa anebiliŋiŋse dɔɔ. 24Baŋ ne gyaela baa mo yoo abɔɔ na yookɔtase na kɔta keŋ bɛɛ wɔŋee ke, na yoonɔɔtena burum kaa tia neŋ. Baa yilaa yoo nyeele pampasaŋse dinaana na buruburu kpuna yoo kotɔtɔɔ kaa tia neŋ yenaŋ kamasɛ. Maa lese neŋ fa wɔ na baa wɔŋ n deŋele, te baa wɔŋ n deŋele mena keŋ bɛɛ gyae. 25Maa mo me nuŋkurili baŋ kɔŋ n dɔɔ, te baŋ baa mo baŋ nedoŋ wɔŋ n deŋele. Baa kɛrɛɛ n memɔɔse na deŋela na baa mo yoosila koe n balaŋ baŋ bɔɔ kaa nɛ. Baa mo n bia alebia na tewulɛɛ laŋ, na boalaŋ ke kpa baŋ bɔɔ kaa nɛ kerekere. 26Baa kpee n woseman abɔɔ, na baa mo n kegyaŋase kyeo kyeo ŋan. 27Na maa yela n desɛŋ nombia na futooli keŋ n be yɛɛ lee Igyipite nɛ ke kɔŋ ɔto. N ba tekaa gɛɛse kɛɛ abɔɔ ŋan ne gyɔ neŋ loo, yaa n ke tɔɔse Igyipite bela ya.

28<Nawolo nyi nnɛ yaa Degbeŋgyoo Doŋ Pou Nyee ne yako, Mɛɛ gyae maa mo neŋ do baŋ n ne kɔle nɛ nyiŋmaa man, fa baŋ be takaa neŋ te n be wɔŋ n wose lee be gyaŋ nɛ. 29Baa wɔŋ n deŋele nideli lee keŋ bɛɛ kɔla neŋ dɔɔ, te baa lɛo kpene kamasɛ keŋ n be yɛɛ tom nyiŋ nɛ. Baa lese neŋ deteŋteli, na baa lese n desɛŋ nombia na n futooli keŋ debɔɔ. N futooli nombia ayɛɛsa na n baala kegyae 30moona kei kɔŋ n dɔɔ, nawolo nyi n moo n kewɔlɛɛ sila tɛɛlese te n som be bɛɛneŋ. 31N te sila n kɔɔ, mena dɔɔ maa mo ɔ leenɔɔ do n nyiŋmaa man.

32<Nnɛ yaa Degbeŋgyoo Doŋ Pou Nyee ne yako,

<N ke nyɔɔ lee n kɔɔ leenɔɔ man,

leenɔɔ keŋ ka kerɛɛ te ke dana siiliŋ,

ke gyae ka mo tuubia na kekulu kɔŋ n dɔɔ

nawolo nyi keŋ doo ke man nɛ boe.

33Kedɛɛse na waraŋsa kedi gyae ke wulu neŋ,

N kɔɔ Samaria leenɔɔ,

leenɔɔ keŋ gyae ke wɔlɛɛ neŋ na n ka bese tɛɛle yakaa. 34N ke nyɔɔ ke man na ke taŋ kerekere

na n ke tao ke nɔɔse

te nyaŋ ka do nya ade gyamɛɛ

Maŋ kolosila, Degbeŋgyoo Doŋ Pou Nyee torola yako.

35<Mena dɔɔ, nnɛ yaa Degbeŋgyoo Doŋ Pou Nyee ne yako, Keŋ n be wolee maŋ te n ba besena n wɔle tee maŋ dɔɔ, n desɛŋ nombia na n futooli keŋ n be yɛɛ nɛ deŋele kewɔŋ gyae kɔŋ n dɔɔ.

36Degbeŋgyoo yako maŋ nyiaa, <Deniwalaŋ bu, n ke di Ohola na Oholiba nombia? Kenaŋ na, yako wɔ nombia anekɔlaŋ ŋan bɛɛ yɛɛ nɛ, 37nawolo nyi be ta lee be baala wɔle, te fatabo doo be nyiŋmaase man. Ba som be bɛɛneŋ, te ba moo be bia baŋ bɔɔ lolee fa maŋ koraŋ deesi ŋgba weenɛɛ nɛ fa wɔ. 38Be ta bese yɛɛ maŋ kei bela. Debaŋ kenaŋ ke, te ba doo ma fereŋkyeŋ keŋ ayimɛɛ te be waalaa ma kefɛɛfo weeya ŋan. 39Wee kenaŋ keŋ bɔɔ mo be bia ke deesi fa be bɛɛneŋ nɛ, baa gyoo ma fereŋkyeŋ keŋ man te be waalaa ke. Keŋ bɔɔ yɛɛ ma dekpaŋalaŋ man nɛ yaa.

40<Ba besewɔ kpila gyu baala baŋ be kyaa naŋ lem nɛ gyaŋ, ba ke kɔŋ nɛ ɛ sɔɔwɔ fa wɔ, te ɛ doo kyeloo te ɛ doo agbaraagbaraase kpaakpaa nyiŋan. 41Ɛ kyaawɔ gbeli kpaakpaate keŋ tebulu doo ke siaman nɛ dɔɔ, te ɛ moo abɔɔ ofoŋnyiŋan na oliifi nuŋ keŋ yɛɛ me wui nɛ gyakaa ke dɔɔ.

42<Balaŋ burum yeesa te kilisi e, te ba moo soloŋ nyɔɔra lee depampaa man kɔŋ kpuna baala baale te ba moo kegyaŋase do alo ŋon na ɔ naabu nyiŋmaase man, te ba moo gyooro kotɔtɔɔse ŋan ŋe dana kyeo nɛ wuu wɔ. 43Te me kolosiwɔ lee ŋolo ŋon ɔ gyakaa ɔ na lee ɔ baale wɔle nɛ wose man nyiaa, <<Nɛnɛɛ ɛ yela baa doona e ŋgba futooli alo nɛ, nawolo nyi mena te ɔ wɔɛ.>> 44Te be doowɔna e. Mena keŋ baala ne doona futooli alo nɛ, mena te be doowɔna ala desɛŋ nombia yɛɛra Ohola na Oholiba. 45Mɔna nombiadiiri ŋon ɔ tenɛɛ nɛ ne gyaela waa wɔŋ wɔ deŋele keŋ bɛɛ mo wɔŋ ala baŋ bɛɛ lee be baala wɔle te bɛɛ koe balaŋ nɛ, nawolo nyi bɛɛ lee be baala wɔle te bɛɛ koe balaŋ.

46<Nnɛ yaa Degbeŋgyoo Doŋ Pou Nyee ne yako, maa mo dikpii daale kaa tia wɔ na maa mo wɔ fa gyakoloŋ na baa kuu ba abɔɔ. 47Dikpii keŋ gyae ke fuŋii wɔ boya na baa mo yoosila koe wɔ. Baa ko be bia alebia na tewulɛɛ na baa too ba akpaŋalaŋse.

48<Na maa yela desɛŋ nombia keyɛɛ ke kɔŋ ɔto tɛɛle keŋ dɔɔ, na ka ke yɛɛ kefaaree fa ala pou na bɔɔ kasee ŋon ya. 49Ɛ ke ka lee ɛ desɛŋ nombia ŋan ɛ be yɛɛ nɛ dɔɔ, te baa wɔŋ ɛ deŋele lee bɛɛneŋ baŋ ɛ ba som nɛ dɔɔ. Botɔɔ te ɛ ka gyeŋ nyi maŋ yɛna Degbeŋgyoo Doŋ Pou Nyee.>