Hɛsekiɛle 22

Nombia kedi lee Yerusalɛm dukum dɔɔ

1Degbeŋgyoo yako maŋ nyiaa,

2<Deniwalaŋ bu, nyaŋ ke di ɔ nombia? Nyaŋ ke di donɔɔ dinaa kei keŋ bɔɔ koe balaŋ ke man nɛ nombia? Kenaŋ na yela waa gyeŋ wa ayɛɛsa anekɔlaŋ ŋan pou, 3na n ke yako nyiaa, <<Nnɛ yaa Degbeŋgyoo Doŋ Pou Nyee ne yako, nyaŋ donɔɔ dinaa keŋ n debaŋ be lii, lee keŋ n ba koe balaŋ te n ba mo n bɛɛneŋ do n wose ayimɛɛ, 4n te di fɔɔ lee balaŋ baŋ n ba koe, te n be yɛɛ bɛɛneŋ mo do n wose ayimɛɛ nɛ dɔɔ. N te yele n weeya ɔto ta benaa, te n kulutooneŋ ɔto te lii. Mena dɔɔ maa yela tɛɛlese ke kulu neŋ, na donɔɔse pou ka boŋo neŋ. 5Baŋ ba benaa na baŋ be kyaa lem baa kulu neŋ, nyaŋ donɔɔ dinaa keŋ n yele be wɔlɛɛ, te kekolosi doo n man nɛ.

6< <<Kɛɛ mena keŋ Iserae kegyiise baŋ be doo n man nɛ, na mo be doŋ koe balaŋ. 7Baale doo n man keŋ bɔɔ na mo be kya na be naa yɛɛ kolo ya, bɛɛ ŋere ŋɔɔla do te be naase yoyolobia na liala diyem. 8Ɛ ta mo ma abɔɔ fereŋkyeŋ ŋan yɛɛ kolo ya, te ɛ waalaa ma kefɛɛfoweeya ŋan. 9Balaŋ wɔlɛɛra doo n man keŋ bɛɛ gyae baa koe balaŋ, na bee dii dakoreese ŋan man, te bɛɛ yɛɛ desɛŋ nombia. 10Baale doo n man keŋ bɛɛ gyae be kyaɔ wɛɛla, na bee doona ala baŋ bɔɔ gyɔ baam, keŋ ba wose dana ayimɛɛ ba amanberɛ gbɛɛ nɛ. 11Baale doo n man keŋ bɛɛ gyae be tebia wɛɛla keŋ bɛɛ kɔle, baale mɔ ne doona be bia ala keŋ yɛɛ desɛŋ nombii ke, te baale mɔ ne doona be deesina, baŋ be yɛɛ baŋ gbagba be kya biawɔ. 12Balaŋ doo n man keŋ bɛɛ yoo lɛɛ abɔɔ na baa koe balaŋ. N ne gyakaa loŋ kɔba dɔɔ fa ayematena na n ke nyiŋ tɔnɔɔ lee be gyaŋ. N na ŋere n tebia nyiŋ abɔɔ lee gbɛɛkum man. Te n wolee maŋ, Degbeŋgyoo Doŋ Pou Nyee torola yako.

13< <<De yɛɛ senaa maa kpiisi me nyiŋmaase lee n wosekenyiŋ lee gbɛɛkum man, na balaŋ baŋ n ba koe n man dɔɔ. 14Wee keŋ daa na neŋ dee di nɛ, nyaŋ ke nyiŋ konɔɔ yaa nyaŋ ke tale seŋ keŋkeŋ? Maŋ Degbeŋgyoo kolosila, te maa yɛɛ ke mɔ. 15Maa gegi ŋon gyu tɛɛlese man, na maa yaasee ŋon do donɔɔse man, na maa yela ya ayimɛɛ ŋan ke kɔŋ ɔto. 16Akpaa ba mo ayimɛɛ wuu neŋ tɛɛlese siaman nɛ, nyaŋ ka gyeŋ nyi maŋ yɛna Degbeŋgyoo.

17Keŋte Degbeŋgyoo yako maŋ nyiaa, 18<Deniwalaŋ bu, Iseraetena ta bese nyeele pena fa maŋ, be popou yɛɛ nyeele yayam, na nyeele, na nyeele bibiini, na sumpi keŋ be dɔɔ boalaŋ degyapaa ateta nɛ. Be yɛɛ ŋgba kɔba wolom pena nɛ. 19Mena dɔɔ nnɛ yaa Degbeŋgyoo Doŋ Pou Nyee ne yako, <<Keŋ ɛ popou ba bese nyeele pena dɔɔ, maa yilaa ŋon gyu Yerusalɛm.>> 20Mena keŋ bee yilaa kɔba wolom na nyeele yayam na nyeele bibiini na sumpi na nyeele do boalaŋ degyapaa man na ke yalakee nɛ, mena te maa mo me baŋ na me baŋ nedoŋ yilaa ŋon ka do donɔɔ dinaa keŋ man na maa yalakee ŋon. 21Maa yilaa ŋon na maa mo me baŋ nedoŋ feefu ŋon na ɛ ke yalakee ɔ man. 22Mena keŋ bɛɛ yalakee kɔba wolom boalaŋ degyapaa man nɛ, mena te maa yalakee ŋon ɔ man, na ɛ ka gyeŋ nyi maŋ Degbeŋgyoo ta lese me baŋ nedoŋ wola ŋon.>> >

23Degbeŋgyoo besewɔ yako maŋ nyiaa, 24<Deniwalaŋ bu, yako tɛɛle keŋ nyi, <<N yɛɛ tɛɛle keŋ ba te gberaa neŋ yaa ɔga ke ŋɛɛ woli neŋ me baŋ nedoŋ wee keŋ ya.>> 25Ɔ kegyiise ne bake dukum ɔ man ŋgba dinaate kemuusu debaŋ keŋ ɔ ne tirii wonembu ŋon ɔ be kyam nɛ. Bɛɛ koe balaŋ, mo ba abɔɔ kpaakpaa na ba abɔɔ koyadoŋ nyiŋan, na ba te yele liala ta boo ɔ man. 26Ɔ saese bee di maŋ mmaraase dɔɔ ya te bɛɛ waalaa ma abɔɔ fereŋkyeŋ ŋan. Bɔɔ ne kpase fereŋkyeŋ lee ŋan ŋa te yɛɛ fereŋkyeŋ ya nɛ man ya. Bɛɛ wolo nyi kekpase be doo abɔɔ ŋan faafoɛ na ŋan ŋɔɔ faafoɛ ya nɛ man ya. Be ta lese be sia keŋ bɔɔ ne di ma kefɛɛfoweeya dɔɔ ya, te ba doo maŋ ayimɛɛ be man. 27Kyaarabia baŋ be kyaa ɔ man nɛ yɛɛ ŋgba gbougbouse baŋ bee tirii wonembia baŋ bɔɔ kyam nɛ. Bɛɛ koe balaŋ kyɛɛkee be fatabo leki na baa mo gbɛɛkum man nyiŋ ba wose. 28Ɔ gbalara ta mo akɛrɛɛ kalesewola, na akɛrɛɛ gbale mo wuu ba ayɛɛsa dɔɔ. Bɛɛ yako nyiaa, <<Nnɛ yaa Degbeŋgyoo Doŋ Pou Nyee ne yako,>> keŋ Degbeŋgyoo te yako kolo ya. 29Tɛɛle keŋ man balaŋ na ŋere balaŋ do te bɛɛ mo doŋ ŋmɛɛle balaŋ abɔɔ, bɛɛ ŋere ayematena na baŋ bɔɔ dana kolo ya nɛ do, te bɛɛ naase ŋɔɔla diyem keŋ bɔɔ ne di nombia kegbɛɛ dɔɔ fa wɔ ya.

30<Me kɛowɔ be man nyi maa nyiŋ ŋon waa baŋ dekyaŋ keŋ, na waa seŋ dekyaŋ keŋ be tekerii nɛ nsana me siaman tɛɛle keŋ nawɔɔ man na mɔɔ nyiŋ wɔlɛɛ ke ya, mɔna me te nyiŋ ŋolo ya. 31Mena dɔɔ maa lese me baŋ nedoŋ wola wɔ, na maa mo me baŋ too wɔ kerekere, na maa yela ŋan pou bɔɔ yɛɛ nɛ ke busaana wɔ. Degbeŋgyoo Doŋ Pou Nyee torola yako.>