Hɛsekiɛle 21

Babilɔn wɔɛ ŋgba Degbeŋgyoo nombiakedi yoosila

1Degbeŋgyoo yako maŋ nyiaa, 2Deniwalaŋ bu, mo n sia tee Yerusalɛm na n ke kolosi nombii tia ka fereŋkyeŋ keŋ. Gbala tia Iserae tɛɛle keŋ, 3na n ke yako e nyiaa, <<Nnɛ yaa Degbeŋgyoo ne yako: Me ta seŋ tia neŋ. Maa wɔŋ me yoosila lee ke bɔɔlee man na maa keretii neŋ lee baŋ ba tenɛɛ nɛ dɔɔ kelii akpanyanyaŋtena dɔɔ. 4Keŋ maa keretii baŋ ba tenɛɛ na akpanyanyaŋtena dɔɔ nɛ, me yoosila gyae ka lee ke bɔɔlee man tia ɔkamasɛ lee atayenaŋ kelii adoyenaŋ. 5Kenaŋ na balaŋ pou baa naa nyi maŋ Degbeŋgyoo wɔŋana me yoosila lee ke bɔɔlee man, ka be gyae ka bese ka gyoo ke bɔɔlee man bela ya.>>

6<<Mena dɔɔ deniwalaŋ bu, keketee! Mo kayeyɛɛ na weeleŋ keketee be siaman. 7Te akpaa be bɔɔse neŋ nyi, <<Weera te n na keketee?>> na, yako wɔ nyiaa, <Lee nombia ŋan ŋɛɛ kɔŋ nɛ dɔɔ. Gyakoloŋ gyae ka gyoo konɔɔ kamasɛ, na nyiŋmaa kamasɛ ka yeŋ. Ɔkamasɛ woo waa yeu na doono kamasɛ ke yɔkɔse ŋgba loŋ nɛ. Kɛɛ, kɛɛ kɔŋ! De yɛɛ senaa ke gyae ke kɔŋ. Degbeŋgyoo Doŋ Pou Nyee torola yako.>

8Degbeŋgyoo yako maŋ nyiaa, 9<<Deniwalaŋ bu, gbala na n ke yako nyiaa, <<Nnɛ yaa Degbeŋgyoo ne yako.

< <<Yoosila, yoosila,

ba te sara ke tiu ke nuŋ.

10ba te sara ke fa kako,

be te tiu ke nuŋ nyi ke dɛɛ ŋalakee ŋgba ɔga keŋmaale nɛ!

<< <Dɛɛ nyaŋee lee me gyoorobu gbutu dɔɔ? Yoosila keŋ na bee kela gyooro gbutu keŋ.

11< <<Be ta lese yoosila keŋ see nyi baa tiu ke nuŋ,

na baa kyaŋ ke,

Ba te sara ke te be tiu ke nuŋ,

na baa mo do ŋon waa ko nɛ nyiŋmaa man.

12Deniwalaŋ bu, wii na n ke lɔ nɔɔ,

nawolo nyi kee tia me balaŋ,

kee tia Iserae kegyiise pou.

Be ta mo baŋ na me balaŋ,

see fa yoosila.

Mena dɔɔ mo n nyiŋmaa gyakaa n nyee dɔɔ.

13< <<De yɛɛ senaa kekɛɛsekɛɛ gyae ke kɔŋ. Te akpaa yoosila keŋ ta mo gyooro gbutu keŋ koraŋ yɛɛ kolo ya na, woŋ ne gyaela ke kɔŋ? Degbeŋgyoo Doŋ Pou Nyee torola yako. 14<<Mena dɔɔ deniwalaŋ bu, gbala

na n ke gyɔ n nyiŋmaase.

Yoosila keŋ dɛɛ keretii betabola

yaa betabotooro gba.

Ke yɛɛ yoosila keŋ gyae ka ko,

yoosila keŋ gyae ka koe balaŋ burum,

ke gyae ke tɔ wɔ do yenaŋ kamasɛ.

15Na balaŋ ke yala koyololo na gyakoloŋ ka gyoo wɔ,

lee balaŋ burum baŋ bɔɔ koe nɛ dɔɔ,

Ma te desina yoosila keŋ seŋ fa balaŋ kako,

ba anaanɔɔse ŋan pou man.

Kɛɛ! Ba te yɛɛ ke nyi ke dɛɛ ŋalakee ŋgba ɔga keŋmaale nɛ,

be dana ke keŋkeŋ fa kako.

16Nyaŋ yoosila, koe gyu dunoluŋ dɔɔ,

na n ka koe gyu demena dɔɔ,

yenaŋ kamasɛ keŋ n sia teena nɛ.

17Maŋ mɔ maa gyɔ me nyiŋmaase,

na me baŋ nedoŋ ke fɛɛ,

Maŋ Degbeŋgyoo te kolosi.

18Degbeŋgyoo yako maŋ nyiaa, 19Deniwalaŋ bu, gyene gbɛɛneŋ ala na Babilɔn gyoo yoosila ka mo. Ŋe popou dɛɛ mo lee donɔɔ dokoloŋ kenaŋ man. Yɛɛ kagyene gbutu see botɔɔ keŋ gbɛɛ keŋ be kpase gyu donɔɔ dinaa keŋ man nɛ. 20Gyene gbɛɛ dokoloŋ fa yoosila keŋ na ka seŋ tia Amonitena donɔɔ Raba, na daale mɔ ka seŋ tia Yuda na Yerusalɛm dekagya keŋ. 21Nawolo nyi Babilɔn gyoo waa kaa seŋ gbaŋgbase keŋ man, gbɛɛneŋ ala ŋan dekpasee man nyi waa bɔɔse kolo. Waa mo baŋdaŋ nyeela lɔ boe, waa bɔɔse ɔ bɛɛneŋ na waa gyene wonembu wɔɔsa. 22Boe keŋ ɔ be lɔɔ fa Yerusalɛm nɛ yalaa ɔ dunoluŋ dɔɔ, botɔɔ te waa baŋee daase ŋan baa mo tekerii dekyaŋ keŋ na waa ma akagyase ŋan baa mo tɔ wɔ do. 23Gyae ke yɛɛ baŋ bɔɔ kaŋ ntam fa e ŋgba dekara gbale nɛ, mɔna waa tɔɔse wɔ be fɔɔkedi na waa mo wɔ gyu yoogbeŋiri man.

24Mena dɔɔ nnɛ yaa Degbeŋgyoo Doŋ Pou Nyee ŋon ne yako: <<Keŋ ɛ be yele ɛ fɔɔkedi ba lee debɔɔ ɛ ka koroseŋ tia maŋ, te ba lese ɛ dukum wola ya ayɛɛsa pou man dɔɔ nɛ, keŋ ɛ be yɛɛ kɛŋa pou dɔɔ baa kyaŋ ŋon gyu yoogbeŋiri man.

25Nyaŋ Iserae kegyia akpanyanyaŋte ŋon n wee be lii, ŋon n deŋele kewɔŋ debaŋ be kɔŋ kɔ ɔto, 26nnɛ yaa Degbeŋgyoo Doŋ Pou Nyee ne yako: lese kanyaŋ keŋ n na mo bake n nyee nɛ, gyuusu n gyooro kotɔtɔɔ keŋ. Be gyae ke doo ŋgba ŋa kedoo keŋ ya. Baa gyina baŋ bɔɔ yɔkɔse wɔ nɛ, na baa yɔkɔse baŋ bɔɔ gyina ba wose nɛ. 27Kewɔlɛɛ! Kewɔlɛɛ! Maa yɛɛ ke kewɔlɛɛ! Bɔɔ gyae baa mo gyooro kotɔtɔɔ keŋ wuu e bela ya, kelii debaŋ keŋ ŋon ɔ kaboena ke nɛ waa kɔŋ na maa mo ke fa e.>>

28<Nyaŋ deniwalaŋ bu, gbala na n ke yako nyiaa, <Nnɛ yaa Degbeŋgyoo Doŋ Pou Nyee ne yako lee Amonitena na be tuubia wose man:

< << Yoosila, yoosila,

ba te wɔŋ ke fa kako,

be te tiu ke nuŋ fa kewɔlɛɛ

na ka ke ŋalakee ŋgba ɔga keŋmaale nɛ.

29Keŋ na akɛrɛɛ kalesewola lee n wose man,

na akɛrɛɛ gbale lee n wose man koraŋ nɛ,

baa mo ŋa gyakaa akpanyanyaŋtena baŋ,

baa koo wɔ nɛ wɔŋese dɔɔ,

ba wee te lii,

debaŋ keŋ baa wɔŋ ba deŋele nɛ te lii kɔ ɔto.

30< <<Besena n yoosila keŋ do ke bɔɔlee man.

Botɔɔ keŋ bɔɔ yɛɛ neŋ nɛ,

tɛɛle keŋ man n ba lee nɛ,

man te maa di n nombia.

31Maa lese me baŋ nedoŋ wola neŋ,

na maa lee me baŋ weesɛɛ tia neŋ,

maa mo neŋ do nyeeman doŋtena nyiŋmaa man,

balaŋ baŋ ba gyeŋ kewɔlɛɛ nideli nɛ. 32Nyaŋ ka bese daase fa boalaŋ kado,

baa ko neŋ n tɛɛle man,

bɔɔ gyae baa tɔɔse neŋ bela ya,

nawolo nyi maŋ Degbeŋgyoo kolosila.>> >