Hɛsekiɛle 20

Be kalese Iserae deŋeledoŋtena baŋ

1Kulutooneŋ nyetoorote ŋon ɔ gyaalaŋna banoŋte ŋon weeya kufute nɛ, Iserae kegyiise baale kɔŋawɔ be kaa gbala me gyaŋ lee Degbeŋgyoo wose man, te be kaa tisiwɔ kyaa me siaman.

2Keŋte Degbeŋgyoo yako maŋ nyiaa: 3<Deniwalaŋ bu, kolosi fa Iserae kegyiise na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, me gyaŋ yaa ɛ kɔŋa gbale? Maŋ nyiŋaa me kyaa nɛ, mɔɔ sɛɛ ɛ ke kɔŋ me gyaŋ gbale ya. Degbeŋgyoo Doŋ Pou Nyee torola yako.>>

4Nyaŋ ke di be nombia? Deniwalaŋ bu, nyaŋ ke di be nombia? Kenaŋ na yela baa gyeŋ be naanaɔ ayɛɛsa anekɔlaŋ ŋan, 5na n ke yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, wee kenaŋ keŋ mɔɔ lese Iserae nɛ, me gyinaa me nyiŋmaa kaŋ ntam fa Yakɔbe duuluŋmantena, te ma lese ma wose wola wɔ Igyipite. Me gyinaa me nyiŋmaa adido yako wɔ nyiaa, <Maŋ yɛna Degbeŋgyoo ɛ Wurubuarɛ.> 6Mena wee kenaŋ nɛ, me kaŋa ntam fa wɔ nyi maa mo wɔ lee Igyipite kɔŋ tɛɛle keŋ mɔɔ gyae see wɔ nɛ man, tɛɛle kpaakpaa keŋ kee de abɔɔ nideli nɛ man, tɛɛle kpaakpaa keŋ ke dana kyeo kela tɛɛlese pou. 7Te me yako wɔ nyiaa, <Ɛ man ɔkamasɛ waa lese ɛ duwaare bɛɛneŋ baŋ ɛ ba mo ɛ sia gyakaa be dɔɔ nɛ, ɛ naa mo Igyipite bɛɛneŋ waalaa ɛ wose ya. Maŋ yɛna Degbeŋgyoo ɛ Wurubuarɛ.>

8< <<Mɔna ba korowɔ seŋ tia maŋ keŋ be te nyii maŋ ya. Ba te bɛɛ be duwaare bɛɛneŋ baŋ bɔɔ mo be sia gyakaa be dɔɔ nɛ, yaa baa bɛɛ Igyipite bɛɛneŋ baŋ ya. Mena dɔɔ me yakowɔ nyi maa lese me baŋ nedoŋ wola wɔ, na maa lese me baŋ tia wɔ Igyipite. 9Mɔna lee ma yele dɔɔ ma lese wɔ lee Igyipite. Me yɛɛ ke mena na ma yele be nyiŋ wɔlɛɛ lee tɛɛlese baŋ man be kyaa, na baŋ mɔɔ lese ma wose wola Iseraetena be siaman nɛ ya. 10Mena dɔɔ ma moo wɔ lee Igyipite kɔŋ depampaa man. 11Ma moo me kawolase fa wɔ te me yelaa ba gyeŋa maŋ mmaraase, ŋan ŋon ɔ di ŋe dɔɔ na waa nyiŋ nyeedoŋ nɛ. 12Ma besewɔ fa wɔ ma kefɛɛfoweeya ŋgba kagyene nɛ daana wɔ nsana, na baa gyeŋ nyi maŋ Degbeŋgyoo yɛɛna wɔ fereŋkyeŋ.

13< <<Mɔna Iseraetena seŋawɔ tia maŋ depampaa keŋ man. Be te di me kawolase dɔɔ ya, mɔna be bɛɛ maŋ mmaraase ŋan, ŋolo de di ŋe dɔɔ na waa nyiŋ nyeedoŋ nɛ, te be waalaa ma kefɛɛfoweeya ŋan. Mena dɔɔ me yakowɔ nyi maa lese me baŋ nedoŋ wola, na maa wɔlɛɛ wɔ depampaa keŋ man. 14Mɔna lee ma yele keŋ dɔɔ me yɛɛ ke, na bɔɔ nyiŋ do ke ayimɛɛ tɛɛlese baŋ mɔɔ lese wɔ be siaman nɛ ya. 15Me gyinaa me nyiŋmaa kaŋ ntam fa wɔ depampaa keŋ man nyi, mɔɔ gyae maa mo wɔ kɔŋ tɛɛle keŋ mɔɔ mo fa wɔ nɛ man ya. Tɛɛle kpaakpaa keŋ kee de abɔɔ nideli, te ke dana kyeo kela tɛɛlese pou nɛ. 16Nawolo nyi be bɛɛ maŋ mmaraase keŋ be te di me kawolase dɔɔ ya te be waalaa ma kefɛɛfoweeya. Nawolo nyi be konɔɔse gyakaa be bɛɛneŋ baŋ dɔɔ. 17Mɔna me wii be waraŋase, te ma te wɔlɛɛ wɔ yaa munu wɔ depampaa keŋ man ya. 18Me yako be bia depampaa keŋ man nyiaa, <Ɛ naa sila ɛ naanaɔ kawolase yaa ɛ ke di ba mmaraase dɔɔ yaa ɛ ka mo be bɛɛneŋ baŋ do ɛ wose ayimɛɛ ya. 19Maŋ yɛna Degbeŋgyoo ɛ Wurubuarɛ, ɛ di me kawolase dɔɔ, na ɛ ke kɛɛ nideli nyi ɛ ke di maŋ mmaraase dɔɔ. 20Ɛ yɛɛ ma kefɛɛfoweeya ŋan fereŋkyeŋ, na ŋa ke yɛɛ kagyene daa na ŋon nsana. Botɔɔ te ɛ ka gyeŋ nyi maŋ yɛna Degbeŋgyoo ɛ Wurubuarɛ.>

21< <<Mɔna bia baŋ korowɔ seŋ tia maŋ, be te di me kawolase dɔɔ ya, ba te kɛɛ nideli nyi baa di maŋ mmaraase ŋan mɔɔ yako nyi, <Walaŋ ŋon ɔ di ŋe dɔɔ na waa nyiŋ nyeedoŋ lee ŋe dɔɔ nɛ ya, te be waalaa ma kefɛɛfoweeya ŋan. Mena dɔɔ me yakowɔ nyi maa lese me baŋ nedoŋ wola wɔ, na maa gyeŋ me baŋ tia wɔ depampaa keŋ man. 22Mɔna me wɔŋa me nyiŋmaa lee wɔle, te lee ma yele dɔɔ me yɛɛ keŋ gyae ke yela na bɔɔ do ke ayimɛɛ tɛɛlese baŋ mɔɔ lese wɔ lee be man nɛ siaman ya. 23Ma besewɔ gyina me nyiŋmaa kaŋ ntam fa wɔ depampaa man nyi, maa gegi wɔ do tɛɛlese man, na maa yaasee wɔ gyu donɔɔse man, 24nawolo nyi be te di maŋ mmaraase dɔɔ ya, mɔna be bɛɛ me kawolase te be waalaa ma kefɛɛfoweeya, te be yase be sia do be naanaɔ bɛɛneŋ dɔɔ. 25Mena dɔɔ me faa wɔ mmaraase ŋan be dei ya, na mmaraase ŋan bɔɔ tale di ŋe dɔɔ ya. 26Ma doo wɔ ayimɛɛ ba abɔɔkefa man, lee keŋ bɛɛ mo be bia gyaŋgba nyibaŋ deesi dɔɔ, na maa yela gyakoloŋ ka gyoo wɔ na baa gyeŋ nyi maŋ yɛna Degbeŋgyoo.>>

27<Mena dɔɔ deniwalaŋ bu, kolosi fa Iseraetena na n ke yako wɔ nyiaa,<<Nnɛ yaa Degbeŋgyoo Doŋ Pou Nyee ne yako, kei mɔ man nɛ ɛ naanaɔ wɔlɛɛ ma yele keŋ be te di anokoare fa maŋ ya. 28Me ka mo wɔ kɔŋ tɛɛle keŋ mɔɔ kaŋ ntam nyi maa mo fa wɔ dɔɔ nɛ, be naa dakoree kamasɛ yaa daŋ keŋ ke dana wuluŋ nɛ, bee gyu ke deesi botɔɔ na ba te yɛɛ kedeesase ŋan na do maŋ baŋ. Bɛɛ too oliifise ofoŋnyiŋan na ba te woli ba soloŋ botɔɔ. 29Keŋte me bɔɔse wɔ nyi, woŋ yɛna dakoreese ŋan dɔɔ ɛ ne gyu nɛ?>> > (Mena dɔɔ bɛɛ baake ke Bama kaalii gyɛŋ)

Ba ke desina Iserae deŋeledoŋtena baŋ

30Mena dɔɔ yako Iseraetena nyiaa: <<Nnɛ yaa Degbeŋgyoo Doŋ Pou Nyee ne yako: ɛ ka do ɛ wose ayimɛɛ ŋgba mena keŋ ɛ naanaɔ be yɛɛ nɛ, na ɛ ke sila be duwaare bɛɛneŋ baŋ? 31Akpaa ɛ mo ya abɔɔkefa fa te ɛ mo ɛ bia yɛɛ katoo kedeesa nɛ, na ɛ gyakaa ɛ na mo ɛ bɛɛneŋ baŋ pou do ɛ wose ayimɛɛ baa kaalii gyɛŋ. Iseraetena, maa yela ɛ kaa bɔɔse kolo lee me gyaŋ? Degbeŋgyoo Doŋ Pou Nyee ta toro yako nyiaa, Maŋ nyiŋaa me kyaa nɛ, mɔɔ gyae maa yela ɛ kaa bɔɔse kolo lee me gyaŋ ya.

32< <<Ɛmɛɛ kpa, <Dɛɛ gyae dɛɛ yɛɛ ŋgba tɛɛlese baŋ, ŋgba tɛɛle kei dɔɔ balaŋ baŋ bɛɛ som daŋ na boe nɛ.> Mɔna kpene keŋ ɛ na gyueŋ nɛ, be gyae kekɔŋ mena korakora ya. 33Degbeŋgyoo Doŋ Pou Nyee ta toro yako nyiaa, <<Maŋ nyiŋaa me kyaa nɛ, maa mo me nyiŋmaa doŋte na me baam keŋ mɔɔ tenee na baŋ nedoŋ di ɛ dɔɔ. 34Maa mo me nyiŋmaa doŋte na me baam keŋ mɔɔ tenee na me baŋ nedoŋ mo ŋon lee tɛɛlese man, na maa yilaa ŋon lee donɔɔse ŋan man ɛ be yaasee gyu nɛ man kɔŋ. 35Maa mo ŋon kɔŋ tɛɛlese baŋ depampaa man, na maa di ɛ nombia sia na sia botɔɔ. 36Mena keŋ mɔɔ di ɛ naanaɔ nombia Igyipite depampaa man nɛ, mena te maa di ɛ nombia. Degbeŋgyoo Doŋ Pou Nyee torola yako. 37Nyi n kaa mo me gbutu keŋ tɛɛ na maa gyene neŋ, na maa yela n ke di nɔɔkebakesee keŋ dɔɔ bake see nɛ dɔɔ. 38Maa lese baŋ bɛɛ yɛɛ deŋeledoŋ te bɛɛ seŋ tia maŋ ɛ man nɛ. Doo nyi maa lese wɔ lee tɛɛle keŋ man be kyaa nɛ, mɔna bɔɔ gyae baa gyoo Iserae tɛɛle keŋ man ya. Botɔɔ te ɛ ka gyeŋ nyi maŋ yɛna Degbeŋgyoo.

39< <<Mɔ ɛmɛɛ Iseraetena dɔɔ, nnɛ yaa Degbeŋgyoo Doŋ Pou Nyee ne yako, ɛ man ɔkamasɛ waa gyu ka som ɔ bɛɛneŋ. Mɔ kenaŋ wɔle de yɛɛ senaa ɛ ke tei maŋ, te ɛ be gyae ɛ ka tekaa mo ya abɔɔkefa na ɛ bɛɛneŋ wɔlɛɛ ma yele fereŋkyeŋ keŋ ya. 40Degbeŋgyoo Doŋ Pou Nyee ta toro yako nyiaa, me bula fereŋkyeŋ, Iserae bula keŋ korɛɛ nɛ dɔɔ te Iseraetena pou baa som maŋ, te maa lɛɛ wɔ do botɔɔ. Botɔɔ te maa lɛɛ ɛ kedeesase na ya abɔɔ kpaakpaa kefa na ɛ weenɛɛ gyaŋgba nyiŋan na ɛ kedeesase fereŋkyeŋ ŋan pou. 41Akpaa ma mo ŋon lee tɛɛlese ŋan man kɔŋ te me yilaa ŋon lee donɔɔse ŋan man bɔɔ yaasee ŋon gyu nɛ, maa lɛɛ ŋon do ŋgba oliifi ofoŋte nɛ, na maa ta ɛ dɔɔ yela tɛɛlese kena nyi me yɛɛ fereŋkyeŋ. 42Akpaa ma mo ŋon kɔŋ Iseraetena tɛɛle man, tɛɛle keŋ mɔɔ gyina me nyiŋmaa kaŋ ntam nyi maa mo fa ɛ naanaɔ nɛ, botɔɔ te ɛ ka gyeŋ nyi maŋ yɛna Degbeŋgyoo. 43Botɔɔ te ɛ ke tɔɔse ya ayɛɛsa na abɔɔ ŋan pou ɛ be yɛɛ mo do ɛ wose ayimɛɛ nɛ. Na ka wee ŋon lee nombiakumɛɛ ŋan pou ɛ be yɛɛ kaalaŋ nɛ dɔɔ. 44Akpaa me wɔŋ ɛ deŋele lee ma yele dɔɔ, mɔna te yɛɛ nyi ɛ gbɛɛneŋ kumɛɛ na ɛ nombiakumɛɛ keyɛɛ dɔɔ ya nɛ, botɔɔ te ɛ ka gyeŋ nyi maŋ yɛna Degbeŋgyoo. Degbeŋgyoo Doŋ Pou Nyee torola yako.

Kegbela tia atayenaŋ

45Degbeŋgyoo yako maŋ nyiaa, 46<Deniwalaŋ bu, <Mo n sia tee atayenaŋ, kolosi tia atayenaŋ na n ke gbala tia atayenaŋ laa keŋ. 47Yako atayenaŋ laa keŋ nyi, <<Ɛ nyii Degbeŋgyoo nombii. <Nnɛ yaa Degbeŋgyoo Doŋ Pou Nyee ne yako, Mɛɛ gyae maa too neŋ, te ke gyae ke kpa n daase nalaŋ na awolɛɛ pou. Boalaŋ laakemse ŋan be gyae ka yeŋ ya, Ke gyae ke koolii ɔkamasɛ ŋon waa lee atayenaŋ kaalaŋ gyu adoyenaŋ nɛ siagbɛɛ. 48Walaŋ kamasɛ waa naa nyi maŋ Degbeŋgyoo kyaŋeena ke, kɔɔ gyae ke ka yeŋ ya.>> >

49Keŋte me yakowɔ nyi, <Degbeŋgyoo Doŋ Pou Nyee, bɛɛ yako lee ma wose man nyiaa, <<Na aduya yaa ɔ ne gyɔɔ yee?>>1