Hɛsekiɛle 19

Katoroŋ fa Iserae kegyiise

1Toroŋ fa Iserae kegyiise, 2na n ke yako nyiaa,

< <<Kɛɛ, n naa yɛɛ dinaate woŋti e,

te ɔ doo dinaate baala man!

Ɔ te tisi doo be man

ɔ ne kɛɛle ɔ bia.

3Ɔ kɛɛle ɔ bia baŋ man ŋolo

te ɔ kaa bese dinaate doŋte.

Ɔ kasee wonembia kekyaŋ

te ɔ kaa gyeŋa balaŋ kekyaŋ ketao

4Tɛɛlese nyii ɔ wose man nombia,

te be nyɔɔ e dowokom kyaŋ e.

Ba doo e dokɔŋ wɔŋee e

gyu Igyipite tɛɛle man.

5< <<Ɔ naa kena nyi ɔ loo kegyakaa te kɔŋ mena ya,

te keŋ ɔ be kɛɛ gbɛɛ te kɔŋ mena ya nɛ,

ɔ besewɔ mo ɔ bu ŋolo bela,

te ɔ yɛɛ e dinaate doŋte.

6Ɔ dɔŋ dinaatese baŋ man,

nawolo nyi nɛnɛɛ ɔ yɛɛ dinaate doŋte e.

Ɔ kasee wonembia kekyaŋ

te ɔ kaa gyeŋa balaŋ kekyaŋ ketao.

7Ɔ yɛlɛɛ ba akagyase

te ɔ wɔlɛɛ be donɔɔse.

Tɛɛle keŋ na baŋ pou be kyaa ke man nɛ,

wose seree wɔ lee ɔ kemuusu dɔɔ.

8Keŋte tɛɛlese korowɔ kaa seŋ tia e,

baŋ bɔɔ lee yenaase ŋan be kilisi wɔ nɛ.

Be fɛlɛɛ ba asawu lɔ e,

te be kyaŋa e ba dowokom man.

9Ba moo dokɔŋse wɔŋee e kaa do denkeri man,

te ba moo e kɔna Babilɔn gyoo.

Ba moo e ketɔ deni,

na bɔɔ tekaa nyii ɔ kemuusu,

Iserae bulase dɔɔ bela ya.

10< <<N naa wɔɛ ŋgba gerepo woŋ gerepo wɔɔman,

keŋ bɔɔ duu boo nɔɔman nɛ.

ka lese tombia burum te ka see bia nideli,

nawolo nyi ke nyiŋa loŋ burum.

11Ke tombia dana doŋ,

keŋ kaboena baa mo yɛɛ siamante gbutu.

Ka korowɔ gyu adido,

kela faareŋ kusuu ŋan,

ke yɛɛ kyeo nideli lee kɔ ɔkooroŋ,

na ke tombia burum dɔɔ.

12Mɔna be kulu ke baŋ man,

fuŋ ke lɔ tɛɛle man.

Weese dɛɛlee feliŋ yelaa ka botowɔ,

ke bia luusuwɔ yala,

ke tombia doŋ nyiŋan yeŋawɔ

te boalaŋ kpaa ŋa.

13Nɛnɛɛ ba te baŋ ke depampaa man,

tɛɛle dowolo keŋ loŋ be doo ke man ya.

14Boalaŋ kpaawɔ lee ke tombii dinaa daale man,

te kpaa ke bia.

Tombii doŋte daale te kaa ke man,

keŋ kaboena baa mo yɛɛ siamante gbutu ya.>>

Kei yɛna katoroŋ, te kaboena nyi baa mo ke yɛɛ katoroŋ.>