Hɛsekiɛle 18

Ŋon ɔ yɛɛ dukum waa yeŋ

1Degbeŋgyoo yako maŋ nyiaa, 2Woŋ yaa ɛmɛɛ balaŋ kɛwɔ na wolo keŋ ɛ ne gyɔ dudu kei Iserae tɛɛle man nyi,

< <<Kyaɔ te di gerepo bia adendelɛɛ,

te bia kela yesi wɔ>>?

3Degbeŋgyoo Doŋ Pou Nyee ta toro yako nyiaa, <Maŋ nyiŋaa me kyaa nɛ, ɛ be gyae ɛ ke gyɔ dudu kei Iserae bela ya. 4Nawolo nyi walaŋ kamasɛ yɛɛ me wui. Lolare na bu, be popou yɛɛ me wui. Ŋon ɔ yɛɛ dukum na, ŋon ne gyaela waa yeŋ.

5Dɛɛ mo ke nyi walaŋ ŋon ɔ tenɛɛ nɛ kyaa,

ŋon ɔ ne yɛɛ keŋ doo kegbɛɛ dɔɔ na keŋ tenɛɛ.

6Ɔ bee dii botɔɔ keŋ bɛɛ som dakoreese dɔɔ nɛ,

yaa waa som Iserae bɛɛneŋ ya.

Ɔ bɛɛ gyae ɔ dɔɔ wɛɛle,

yaa waa doona alo ŋon ɔ doo gyaaku man ya.

7Ɔ bɛɛ ŋere ŋolo do ya,

mɔna ɔ na besena kpene keŋ bɔɔ mo kaa see awoba ɔ gyaŋ nɛ fa.

Ɔ bɛɛ ŋmɛɛle ya,

mɔna ɔ ne fa ŋon tanam na ko e nɛ weenɛɛ,

te ɔ ne wuu ŋon ɔ dɔŋ deteŋteli nɛ kanyaŋ.

8Ɔ bɛɛ pakee balaŋ kɔba lɛɛ loŋ gyakaa,

yaa waa lɛɛ kolo lee be gyaŋ ya.

Ɔ ne wɔŋ ɔ wose lee nombiikum keyɛɛ man,

te ɔ ne di walaŋ na ɔ dɔɔ nombia kegbɛɛ dɔɔ.

9Ɔ ne di me kawolase dɔɔ,

te ɔ ne di maŋ mmaraase dɔɔ anokoare man.

Mena walaŋ ŋonaŋ tenɛɛ,

de yɛɛ senaa waa nyiŋ nyeedoŋ,

Degbeŋgyoo Doŋ Pou Nyee torola yako.

10Mo ke nyi ɔ dana bu nyeeman doŋte, ŋon ɔ na koe balaŋ yaa ɔ ne yɛɛ mena abɔɔ kɛŋa ŋaale, 11(keŋ ɔ kya te yɛɛ ŋe man daale ya)

Ɔ ne dii dakoreese ŋan man.

Ɔ ne gyae ɔ dɔɔ wɛɛle.

12Ɔ na ŋere ayematena na baŋ bɔɔ dana kolo ya nɛ do,

Ɔ ne ŋmɛɛle doŋ man.

Ɔ bɛɛ besena keŋ bɔɔ mo kaa see awoba ɔ gyaŋ ya.

Ɔ na som bɛɛneŋ.

Ɔ ne yɛɛ abɔɔ anekɔlaŋ.

13Ɔ ne pakee balaŋ kɔba lɛɛ loŋ gyakaa na waa nyiŋ kolo.

Mena walaŋ kei waa nyiŋ nyeedoŋ? Ɔ be nyim ya! Lee keŋ ɔ be yɛɛ mena ayɛɛsa anekɔlaŋ kɛŋa dɔɔ, kaboena nyi baa ko e. Ɔ fatabo gyae ka seele ŋon gbagba.

14Te akpaa kei mɔ dana bu ŋon ɔ ne naa dukum ŋan pou ɔ kya be yɛɛ, mɔna ŋon te yɛɛ mena abɔɔ ŋenaŋ ŋaale ya.

15<Ɔ bee dii weenɛɛ dakoreese ŋan man,

yaa waa som Iserae bɛɛneŋ ya.

Ɔ bɛɛ gyae ɔ dɔɔ wɛɛle ya.

16Ɔ bɛɛ ŋere ŋolo do,

yaa waa fa kɔba lɛɛ kolo see awoba ya.

Ɔ bɛɛ ŋmɛɛle ya

mɔna ɔ ne fa ŋon tanam na ko e nɛ weenɛɛ,

te ɔ ne wuu ŋon ɔ dɔŋ deteŋteli nɛ kanyaŋ.

17Ɔ ne wɔŋ ɔ wose lee ayematena diyem kenaase man,

te ɔ bɛɛ lɛɛ loŋ gyakaa yaa kolo lee be gyaŋ ya.

Ɔ ne di maŋ mmaraase dɔɔ te ɔ ne di me kawolase dɔɔ.

De yɛɛ senaa waa nyiŋ nyeedoŋ, ɔ be gyae waa yeŋ lee ɔ kya dukum dɔɔ ya. 18Mɔna ɔ kya waa yeŋ lee ŋon gbagba dukum dɔɔ, nawolo nyi ɔ ŋere balaŋ do, te ɔ ŋmɛɛle ɔ dɔɔ te ɔ yɛɛ nombiakumɛɛ ɔ balaŋ man.

19Mɔna ɛ ne bɔɔse nyi, <<Weera te bu ŋon be naa diyem lee ɔ kya dukum dɔɔ ya?>> Keŋ bu ŋon be yɛɛ keŋ doona ke gbɛɛ na keŋ tenɛɛ te ɔ be di me kawolase dɔɔ nideli nɛ dɔɔ, de yɛɛ senaa waa nyiŋ nyeedoŋ. 20Ŋon ɔ yɛɛ dukum na, ŋon ne gyaela waa yeŋ. Bu be gyae waa naa diyem lee ɔ kya dukum dɔɔ, yaa kya ke naa diyem lee bu dukum dɔɔ ya. Baŋ ba tenɛɛ nɛ nombia katenee te baa mo tɔ wɔ kom, na baa mo akpanyanyaŋtena akpanyanyaŋ keyɛɛ tɔ wɔ kom.

21<Mɔna akpaa akpanyanyaŋte de kyɛɛkee lee ɔ nombiakumɛɛ ŋan ɔ be yɛɛ nɛ man, te ɔ di me kawolase dɔɔ te ɔ yɛɛ keŋ doona kegbɛɛ na keŋ tenɛɛ nɛ, de yɛɛ senaa walaŋ ŋonaŋ waa nyiŋ nyeedoŋ, ɔ be gyae waa yeŋ ya 22Bɔɔ gyae baa tɔɔse be nombiakumɛɛ ŋan bɔɔ yɛɛ nɛ mo tia wɔ ya. Mɔna be katenee nombia ŋan bɔɔ yɛɛ dɔɔ baa nyiŋ nyeedoŋ. 23Degbeŋgyoo Doŋ Pou Nyee ta toro yako nyiaa, Akpanyanyaŋte yeŋ bɛɛ gyoo me sia ya. Mɔna keŋ na gyoo me sia yɛna nyi, baa kyɛɛkee lee be gbɛɛneŋ kumɛɛ man na baa nyiŋ nyeedoŋ.

24Mɔna akpaa walaŋ ŋon ɔ tenɛɛ de tina ɔ katenee nombia keyɛɛ yela, gyu ke yɛɛ dukum na abɔɔ anekɔlaŋ ŋan akpanyanyaŋte be yɛɛ na, baa nyiŋ nyeedoŋ? Bɔɔ gyae baa tɔɔse walaŋ ŋonaŋ katenee nombia ŋan ɔ be yɛɛ nɛ ya. Lee keŋ ɔ te di anokoare ya dɔɔ ɔ te di fɔɔ, te lee dukum keŋ ɔ be yɛɛ dɔɔ waa yeŋ.

25Mɔna ɛ ne yako nyi, <<Degbeŋgyoo nombia be doo kegbɛɛ dɔɔ ya.>> Iseraetena, ɛ nyii, me nombia be doo kegbɛɛ dɔɔ yee? Na ɛmɛɛ nombia be doola na kegbɛɛ yee? 26Nyi akpaa ŋon ɔ tenɛɛ de tina ɔ katenee nombia keyɛɛ yela ke yɛɛ dukum nɛ, baa yeŋ lee ke dɔɔ. Baa yeŋ lee dukum keŋ bɔɔ yɛɛ nɛ dɔɔ. 27Mɔna akpaa akpanyanyaŋte de tina wa akpanyanyaŋ nombia keyɛɛ yela, te ɔ yɛɛ keŋ doona kegbɛɛ na keŋ tenɛɛ na, waa lɛɛ ɔ nyee. 28Nawolo nyi ɔ ta gyene ɔ nombiakumɛɛ ŋan pou ɔ be yɛɛ te ɔ wɔŋa ɔ wose lee ŋe man. De yɛɛ senaa mena walaŋ ŋonaŋ waa nyiŋ nyeedoŋ, ɔ be gyae waa yeŋ ya. 29Mɔna Iseraetena ne yako nyi, <<Degbeŋgyoo nombia be doo kegbɛɛ dɔɔ ya.>> Iseraetena, me nombia be doo kegbɛɛ dɔɔ yee? Na ɛmɛɛ nombia be doola kegbɛɛ dɔɔ yee?

30<<Mena dɔɔ Degbeŋgyoo Doŋ Pou Nyee ta toro yako nyiaa, ɛmɛɛ Iseraetena, maa di ɛ man ɔkamasɛ nombia lee ɛmɛɛ gbagba ayɛɛsa dɔɔ. Ɛ kyɛɛkee! Ɛ bese lee ɛ gbɛɛneŋ kumɛɛ pou man, kenaŋ na dukum be gyae ke di ɛ dɔɔ ya. 31Ɛ lese nombiakumɛɛ ŋan ɛ be yɛɛ nɛ pou lee ɛ wose man, na ɛ ke nyiŋ konɔɔ wɔle na feliŋ wɔle. Iseraetena, woŋ dɔɔ te ɛ ka yeŋ? 32Degbeŋgyoo Doŋ Pou Nyee ta toro yako nyiaa, ɔkamasɛ yeŋ be dana maŋ gyoŋ ya. Ɛ kyɛɛkee na ɛ ke nyiŋ nyeedoŋ.