Hɛsekiɛle 17

Otolokuse bala na woŋ keŋ

1Degbeŋgyoo yako maŋ nyiaa, 2<<Deniwalaŋ bu, yako deboloo na n ka mo ke gyɔ dudu fa Iseraetena. 3Yako wɔ nyiaa, <Nnɛ yaa Degbeŋgyoo Doŋ Pou Nyee ne yako, Otoloku dinaa ŋon ɔ dana beŋkelɛɛ dinaana te ɔ wona dana dɔɔloŋ te ŋa loŋse yɛɛ kpookpoo nɛ te kɔŋ Lebanɔn. Ɔ te kaa kyaa sida daŋ daale nyeeman. 4Ɔ tekeri ka nyeeman tombii wɔle keŋ, te ɔ moo ke baŋ kebudiira baale tɛɛle man, te ɔ ke duu ke kebudiira donɔɔ dinaa man.

5< <<Ɔ moo tɛɛle kenaŋ man daŋbii daale ke duu tɛɛle kpaakpaa daale man. Ɔ duu ke ŋgba daŋ keŋ bee duu loŋse burum gyaŋ nɛ, 6te ka beewɔ bese woŋ keŋ be fɛlɛɛ wuu tɛɛle dɔɔ nɛ. Ke tombia teneewɔ gyu ɔ gyaŋ, mɔna ke lila gyoowɔ ka ateta. Ka bese gerepo woŋ te ka lese tombia te ŋa potee faareŋse.

7< <<Mɔna otoloku dinaa ŋolo mɔ kyaa keŋ ɔ dana beŋkelɛɛ dinaana na wona burum. Gerepo woŋ keŋ tenee ke lila gyu ɔ gyaŋ lee botɔɔ keŋ bɔɔ duu ke nɛ, te ke fɛlɛɛ ke tombia tee e nyi waa do e loŋ. 8Be duu ke tɛɛle kpaakpaa keŋ doo loŋse burum gyaŋ, na kenyiŋ lese tombia na ka se bia na kabese gerepo woŋ kpaakpaa.>>

9<Yako wɔ nyiaa, <<Nnɛ yaa Degbeŋgyoo Doŋ Pou Nyee ne yako, ke gyae ke de? Bɔɔ gyae baa kulu ke na baa kperee ke bia na ke ka boto yee? Ke tombia wɔlɛɛ ŋan pou gyae ka boto. Na baam yuŋte yaa balaŋ burum te baa mo kulu ke na ke lila ya. 10Be te duu ke, mɔna ke gyae ka seŋ? Nyi akpaa weese dɛɛlee feliŋ de gyɔ ke na, ka be gyae ka yeŋ lee botɔɔ keŋ bɔɔ duu ke nɛ yee?>> >

11Te Degbeŋgyoo yako maŋ nyiaa, 12<Yako balaŋ deŋeledoŋtena kɛwɔ nyiaa, <<Ɛ ba gyeŋ kpene keŋ deboloo kei nawolo yee?>> Yako wɔ nyi, <<Babilɔn gyoo gyuu Yerusalɛm, te ɔ ka moo be gyoo na be kegyiise te ɔ moo wɔ kɔŋ ɔ gyaŋ Babilɔn. 13Keŋte ɔ lese walaŋ dokoloŋ lee gyooro dekpaŋalaŋ man te ŋon na e bake nɔɔ, te ɔ yelaa ɔ kaŋa ntam. Ɔ moo tɛɛle kenaŋ man siamantena baale mɔ laŋ, 14na waa yɔkɔse gyoorideedii kenaŋ, keŋ ɔ ba koro bela ya, na akpaa be di ɔ kebakesee dɔɔ na te baa tale seŋ be nae dɔɔ. 15Mɔna Yuda gyoo seŋawɔ tia Babilɔn gyoo, te ɔ kpila balaŋ gyu Igyipite nyi baa mo dɛɛkyɔŋse na yoonɔɔtena burum kɔna e. Ke gyae ke de fa e? Ŋon ɔ ne yɛɛ mena ayɛɛsa kɛŋa nɛ waa tale yeu lɛɛ ɔ nyee? Waa tale lee nɔɔkebakesee keŋ wɔle, na waa yeu lɛɛ ɔ nyee?

16< <<Degbeŋgyoo Doŋ Pou Nyee ta toro yako nyiaa, < <<Maŋ nyiŋaa me kyaa nɛ, waa yeŋ Babilɔn botɔɔ keŋ gyoo ŋon ɔ ba see e gyoori kyaa, ŋon ɔ be yala ɔ ntam na ŋon ɔ ba lee ɔ nɔɔkebakesee keŋ wɔle nɛ. 17Nyi akpaa be kaa tɔ wɔ do te be baŋee akagyase nyi baa wɔlɛɛ balaŋ burum nɛ, Faaro na ɔ yoonɔɔtena doŋ nyibaŋ na ɔ balaŋ burum baŋ koraŋ be gyae baa tale kyɔ e yooman ya. 18Ɔ ta mo ntam keŋ yɛɛ kolo ya, te ɔ lee nɔɔkebakesee keŋ wɔle. Nawolo nyi ɔ sɛɛ kom, mɔna ɔ yɛɛ abɔɔ kɛŋa pou. Mena dɔɔ ɔ be gyae waa nyiŋ yeu lɛɛ ɔ nyee ya.

19< <<Mena dɔɔ nnɛ yaa Degbeŋgyoo Doŋ Pou Nyee ne yako, maŋ nyiŋaa me kyaa nɛ, maa tɔ e kom lee keŋ ɔ be yala maŋ ntam, te ɔ ba lee me nɔɔkebakesee keŋ wɔle dɔɔ. 20Maa fɛlɛɛ ma asawu wuu ɔ dɔɔ, na maa kyaŋ e me kɔta man. Maa mo e kɔŋ Babilɔn na maa di ɔ nombia botɔɔ, lee keŋ ɔ te di anokoare fa maŋ ya dɔɔ. 21Ɔ yoonɔɔtena kpaakpaa nyibaŋ baa yala yoosila nɔɔman, na baŋ bɔɔ nyiŋ nyeedoŋ nɛ ke yaasee gyu yenaŋ kamasɛ. Botɔɔ te ɛ ka gyeŋ nyi maŋ Degbeŋgyoo kolosila.

22< <<Nnɛ yaa Degbeŋgyoo Doŋ Pou Nyee ne yako, Maŋ gbagba maa tekeri sida daŋ dɔɔloŋte keŋ lee nyeeman na maa mo ke kebaŋ. Maa tekeri ka nyee keŋ ba potee nɛ, na maa mo ke kebaŋ bula dɔɔloŋ dɔɔloŋ keŋ ka korɛɛ nɛ nyee man. 23Maa baŋ ke Iserae bula keŋ ka korɛɛ nɛ nyeeman, ke gyae ka lese tombia na ka se bia na ke ka bese sida daŋ kpaakpaa. Gyebuse kpookpoo baa loo asaase do ke man. Baa kaa kyaa ke tombia wuluŋ man. 24Ŋale man daase pou baa gyeŋ nyi maŋ Degbeŋgyoo ne tisinaana daŋ dɔɔloŋte, na ma te yele daŋ duguŋte te yɛɛ dɔɔloŋ. Mee yele daŋ laŋte na wolo, te daŋ dowolo ne nyiŋ faareŋse.

< <<Maŋ Degbeŋgyoo te kolosi, te maa yɛɛ ke.>> >