Hɛsekiɛle 16

Yerusalɛm ŋgba alo ŋon ɔ ba lee ɔ baale wɔle

1Degbeŋgyoo yako maŋ nyiaa, 2<Deniwalaŋ bu, toro Yerusalɛm ayɛɛsa anekɔlaŋ yako e, 3na n ke yako nyiaa, <Nnɛ yaa Degbeŋgyoo Doŋ Pou Nyee ne yako Yerusalɛm. N duuluŋ na n kalola man lee Kaana tɛɛle man. N kya yɛɛ Amori baale e, te n naa yɛɛ Hiti alo e. 4Wee keŋ bɔɔ lola neŋ nɛ, ba te kara n wulu, yaa baa sɔ neŋ na n ka lee, yaa baa mo yabia loŋ feefo neŋ, yaa baa mo kakyeŋgbelaa milii neŋ ya. 5Ŋolo te wii neŋ yaa waa wii n waraŋase na waa yɛɛ mena abɔɔ kɛŋa fa neŋ ya. Mɔna be fuŋa neŋ kelɔ ŋale man, nawolo nyi leenaŋ wee keŋ bɔɔ lola neŋ nɛ, te be bɛɛ neŋ.

6< <<Keŋte me kaa laŋawɔ botɔɔ te me naa neŋ n doo fatabo man n ne fiti, te n ke doo n fatabo man nɛ me yako neŋ nyiaa, <Nyiŋ nyeedoŋ!> 7Me yelaa n beewɔ ŋgba ŋale man apoŋfase nɛ. N beewɔ te n nyiŋa n wose. N gyɔɔ ade te n nyeenyɔɔse tuuwɔ nideli, mɔna n doo deteŋteli na yakaa.

8< <<Wɔle nɛ, ma besewɔ kɔŋ kaa laŋ te ma ke gɛɛse kɛɛ na me naawɔ nyi n ta beena kegyae. Me fɛlɛɛ ma kegba nɔɔ wuu neŋ, te ke wuu n deteŋteli. Me kaŋa maŋ ntam fa neŋ te daana neŋ bake nɔɔ see te n bese me wui, Degbeŋgyoo Doŋ Pou Nyee torola yako.

9< <<Me sɔɔ neŋ te me faafo fatabo keŋ lee n wose man te me tiu neŋ nuŋ ofoŋte. 10Ma moo kegba aloosa do neŋ, te ma doo neŋ wonembu tɔne nkyokotase kpaakpaa nyiŋan. Ma moo akaralɛɛ kpaakpaate mia neŋ, te ma moo kanyaŋ koyadoŋte wuu neŋ. 11Ma moo agbaraagbaraase mia neŋ. Ma moo baam man kɔlase do neŋ te ma moo wɔŋe man kegyaŋase do n wɔŋe man, 12te ma moo kɔla do n memɔɔ man, te ma doo neŋ asomdɛɛse te ma moo gyooro kotɔtɔɔ kyeote wuu neŋ. 13Te ba moo kɔba yayam na kɔba wolom mia neŋ. N kegbase yɛɛ akaralɛɛ kpaakpaa na koyadoŋ kanyaŋ na kanyaŋ keŋ bɔɔ loo ke. Teebɔɔ na oliifi nuŋ na biliŋ kpaakpaate te n ne dii. N beewɔ lee alebiri te n kaa bese alagyoo. 14N lɛɛ yele tɛɛlese man lee n kyeo dɔɔ, nawolo nyi obuo keŋ mɔɔ mo fa neŋ yelaa n lee alebiri, Degbeŋgyoo Doŋ Pou Nyee torola yako.

15< <<Mɔna n moo n wose lɔ nya alebiri dɔɔ, te n yele kelɛɛ kaa bese futooli alo. Nya alebiri dɔɔ n ne tina n wose yela fa walaŋ kamasɛ ŋon ɔ ne lam nɛ, na n te gyu ke doona e na n kyeo ta bese ɔ wui. 16N moo n kanyaŋse ŋaale gyu ke desina dakoreese ŋan dɔɔ ɛ na som, botɔɔ keŋ n ne yɛɛ n futooli nombia nɛ. N gyuuwɔ ɔ gyaŋ te n kyeo dii ɔ nyee. 17N moo me kɔba yayam na kɔba wolom agbaraagbaraase ŋan mɔɔ fa neŋ nɛ, ke yɛɛ bɛɛneŋ baala fa n wose te n som wɔ. 18N moo n kanyaŋse aloosa ŋan wuu ŋa, te n moo me nuŋ na mɔ oliifi see ŋe siaman. 19N besewɔ mo weenɛɛ, biliŋ na oliifi nuŋ na teebɔɔ ŋan mɔɔ fa neŋ nyi nyaa di nɛ, ke deesi ŋgba oliifi ofoŋte nɛ. Kei yɛna keŋ be kɔŋ. Degbeŋgyoo Doŋ Pou Nyee torola yako.

20< <<Te n moo n bia alebia na n bia tewulɛɛ baŋ n ba lolo fa maŋ nɛ deesi ŋgba weenɛɛ nɛ fa bɛɛneŋ baŋ. N futooli keyɛɛ keŋ tekaboe mena yee? 21N koo me bia te n moo wɔ deesi fa bɛɛneŋ baŋ. 22Lee nya ayɛɛsa anekɔlaŋ na n futooli keyɛɛ pou nɛ, n te tɔɔse n biatɛɛ keŋ n doo deteŋteli te n ne fiti n fatabo man nɛ ya.

23Degbeŋgyoo Doŋ Pou Nyee ta toro yako nyiaa, < <<Laako, Mɛɛ fa neŋ laako. Mo kpuna nya akpanyanyaŋ keyɛɛ wɔle nɛ, 24n baŋa dekpeki fa n wose te n baŋee bane denɛɛ abɔntere kamasɛ man. 25N baŋee n bɛɛneŋ denɛɛ abɔntere kebɔtala kamasɛ man, mo do nya alebiri keŋ ayimɛɛ. N fɛlɛɛ n nawɔɔ fa walaŋ kamasɛ ŋon ɔ ne lam nɛ, te n yelaa n futooli keyɛɛ boowɔ kpu. 26N doowɔna na Igyipitetena, n dɔɔna baŋ be baalawose kerɛɛ nɛ, te n moo n futooli beiŋ do maŋ baŋ. 27Mena dɔɔ me gyinaa me nyiŋmaa tia neŋ te me kɔɔkee n tɛɛle, te ma moo neŋ do n kɔlara baŋ kolo bɛɛ baa wɔ ya, Filisitena alebia baŋ n kewɔlɛɛ nombia be doo be nɔɔ nɛ nyiŋmaa man. 28N yɛɛ futooli na Asiriyatena mɔ, nawolo nyi bɛɛ yee neŋ ya, te kenaŋ wɔle koraŋ na ke ta yee neŋ ya. 29N yelaa n futooli keyɛɛ boowɔ kelii Babilɔn keŋ ke yɛɛ kebudiira tɛɛle ke nɛ, mɔna keŋ koraŋ ta yee neŋ ya.

30Degbeŋgyoo Doŋ Pou Nyee ta toro yako nyiaa, < <<Me ta gyeŋ baŋ nideli do neŋ, lee keŋ n be yɛɛ abɔɔ kɛŋa pou ŋgba futooli alo ŋon ɔ ba gyeŋ desɛŋ ya nɛ dɔɔ! 31N ke baŋee nya akpeki abɔntere kebɔtala kamasɛ man, na n bɛɛneŋ denɛɛ abɔntere kamasɛ man nɛ, n be yɛɛ ŋgba futooli alo ya, nawolo nyi n bɛɛ kɔba kelɛɛ.

32< <<Nyaŋ alo yale wɔlɛɛre! N ne gyae ŋɔɔla kela nyaŋ gbagba n baale. 33Futooli ala pou ne lɛɛ abɔɔ kefa, mɔna nyaŋ ne faana baŋ n ne gyae wɔ nɛ abɔɔ mo beo wɔ nyi baa lee yenaŋ kamasɛ kɔŋ kaa yɛɛ kafoŋ na neŋ. 34Mena dɔɔ n futooli keyɛɛ yɛɛ kpoo lee ala akaŋ baŋ wui man. Ŋolo bɛɛ kɔŋ kaa gyae neŋ ya, nyaŋ na besela fa wɔ abɔɔ na baa gyae neŋ. Mena dɔɔ nyaŋ wui futooli keyɛɛ yɛɛ kpoo.

35Mena dɔɔ nyaŋ futooli alo, nyii Degbeŋgyoo nombii. 36Nnɛ yaa Degbeŋgyoo Doŋ Pou Nyee ne yako, keŋ n ba lese n kafoŋ debɔɔ te n ba lese n wose deteŋteli debɔɔ n futooli keyɛɛ man n diidɔɔna siaman, na n bɛɛneŋ anekɔlaŋ baŋ na keŋ n ba mo n bia fatabo fa wɔ dɔɔ nɛ, 37maa yilaa n diidɔɔna baŋ pou ɛmɛɛ na wɔ be di gyoŋ, baŋ n ne gyae wɔ na baŋ n ne kɔla wɔ nɛ. Maa yilaa wɔ lee yenaŋ kamasɛ tia neŋ, maa kpee nya abɔɔ be siaman na baa naa n deteŋteli. 38Maa wɔŋ n deŋele ŋgba ala baŋ bɛɛ lee be baala wɔle na baŋ bɛɛ koe balaŋ nɛ. Maa tɔ neŋ balaŋ kako kom, lee me baŋ nedoŋ na me nuŋkurili baŋ man. 39Botɔɔ te maa mo neŋ do n diidɔɔna nyiŋmaa man, na baa yɛlɛɛ nya akpekise ŋan na baa wɔlɛɛ n dakoreese ŋan. Baa kpee nya abɔɔ na baa mo nya agbaraagbaraase kpaakpaa ŋan, na baa tina neŋ yela deteŋteli na n ke doo yakaa. 40Baa mo balaŋ dikpii kaa tia neŋ, na baa fuŋii neŋ boya na baa mo be yoosilase keretii neŋ kpetekpete. 41Baa too n denɛɛ na baa wɔŋ n deŋele ala burum siaman. Maa yela n ke tina futooli keyɛɛ yela, te n be gyae n ka tekaa tɔ n diidɔɔna kom ya. 42Kenaŋ na, maa yela me baŋ nedoŋ keŋ ne tia neŋ nɛ ke yɔkɔse, na maa lese me nuŋkurili baŋ lee n dɔɔ. Me wɔe gyae ke fɛɛ keŋ mɔɔ gyeŋ baŋ bela ya.

43< <<Nawolo nyi n te tɔɔse nya alebiiritɛɛ ya, mɔna n moo mena abɔɔ kɛŋa pou do maŋ baŋ. De yɛɛ senaa maa yela ŋan pou n be yɛɛ nɛ ke busaana neŋ. N ta mo n desɛŋ nombia kpuna nya ayɛɛsa anekɔlaŋ ŋan yee? Degbeŋgyoo Doŋ Pou Nyee torola yako.

44< <<Ɔkamasɛ ŋon waa gyɔ dudu na, waa gyɔ dudu kei nyiaa, <Mena keŋ naa doo nɛ, mena te bu alebu mɔ doo.> 45N yɛɛ n naa ŋon ɔ be bɛɛ ɔ baale na ɔ bia nɛ bu gbagba e, te n yɛɛ n kɔɔna baŋ bɔɔ bɛɛ be baala na be bia nɛ be naabu gbagba e. N naa yɛɛ Hiti alo e, te n kya yɛɛ Amori baale e. 46N kɔɔ yɛna Samaria, ŋon ŋon na ɔ bia alebia kyaa nya adoyenaŋ, te n naabu yɛna Sodom, ŋon ŋon na ɔ bia alebia kyaa nya atayenaŋ nɛ. 47Na be gbɛɛneŋ ŋaageŋ te n silawɔ yɛɛ ba abɔɔ anekɔlaŋ ya, mɔna lee n gbɛɛneŋ pou man na n kaa yɛɛ nombia akaraŋkaraŋ kela wɔ. 48Degbeŋgyoo Doŋ Pou Nyee ta toro yako nyiaa, <Me nyiŋaa me kyaa nɛ, n naabu Sodom na ɔ bia alebia, te yɛɛ keŋ ɛmɛɛ na n bia alebia be yɛɛ nɛ korakora ya.

49< <<Kɛɛ, dukum keŋ n naabu Sodom na ɔ bia alebia be yɛɛ yɛna nyi, be dana agaŋtaŋ na kedikum te ba te famenɛna walaŋ ya. Ba te kyɔ ayematena na baŋ bɔɔ dana kolo ya nɛ. 50Bɛɛ gate ba wose te be yɛɛ abɔɔ anekɔlaŋ me siaman. Mena dɔɔ me bɛɛ wɔ ŋgba mena keŋ n be naa nɛ. 51Samaria te yɛɛ dukum keŋ n be yɛɛ nɛ yaale ya. N yɛɛ abɔɔ anekɔlaŋ burum kela wɔ, te nya ayɛɛsa yelaa n naabia wui kaa yɛɛwɔ ŋgba be gbɛɛneŋ tenɛɛ nɛ. 52Mena dɔɔ seele n desɛŋ, nya ayɛɛsa nawolo baa nyi n kɔɔ na n naabu nombia dei. Nawolo nyi n dukum keŋ n be yɛɛ nɛ kela wɔ, ta lese wola nyi be gbɛɛneŋ tenɛɛ kela neŋ. Mena dɔɔ yela desɛŋ kekyaŋ neŋ na n ka seele n desɛŋ, nawolo nyi n te yele n naabia yɛɛ ŋgba be gbɛɛneŋ tenɛɛ nɛ.

53Mɔna maa yela Sodom na ɔ bia alebia, na Samaria na ɔ bia alebia ka bese kyaa ba beneŋ man. Mɔna maa yela nyaŋ mɔ ka bese kyaa n beneŋ man kpuna wɔ, 54na n ke nyiŋ seele n desɛŋ, na n sia ke yeŋ lee ŋan pou n be yɛɛ nɛ dɔɔ, na ke fɛɛ be wɔɛ. 55Na n kɔɔ Sodom na ɔ bia alebia, na n naabu Samaria na ɔ bia alebia ka bese seŋ ba beneŋ man, na ɛmɛɛ na n bia alebia mɔ ka bese seŋ ɛ beneŋ man. 56N be gyae n ke baake n kɔɔ Sodom yele n wose kegate wee keŋ man, 57pɛte nya akpanyanyaŋ nombia kaa lee debɔɔ ya. Nɛnɛɛ Ɛdom bia alebia na baŋ bɔɔ kilisi wɔ na Filisitena bia alebia na baŋ bɔɔ kilisi neŋ pou be gyae baa kala neŋ do kolo man ya. 58Nyaŋ ke nyiŋ deŋele kewɔŋ lee n desɛŋ nombia na nya ayɛɛsa anekɔlaŋ dɔɔ. Degbeŋgyoo torola yako.

59< <<Nnɛ yaa Degbeŋgyoo Doŋ Pou Nyee ne yako, Maa wɔŋ n deŋele ŋgba mena keŋ kaboena neŋ nɛ. Nawolo nyi n te yala maŋ ntam lee keŋ n ba lee me nɔɔkebakesee keŋ wɔle dɔɔ. 60Mɔna maa tɔɔse nɔɔkebakesee keŋ daa na neŋ be bake lee nya alebiiritɛɛ nɛ, na maa bake nɔɔkebakesee kekpaakekpaa fa neŋ. 61Akpaa ma mo n kɔɔna na n naabia fa neŋ ŋgba n bia alebia nɛ, kenaŋ na nyaŋ ke tɔɔse nya ayɛɛsa na desɛŋ kekyaŋ neŋ. Mɔna te yɛɛ nɔɔkebakesee keŋ mɔɔ bake fa neŋ dɔɔ ya. 62Maa yela me nɔɔkebakesee keŋ daa na neŋ be yɛɛ nɛ ka seŋ, na n ka gyeŋ nyi maŋ yɛna Degbeŋgyoo. 63Te akpaa me pataa fa neŋ lee nya ayɛɛsa pou dɔɔ na, nyaŋ ke tɔɔse ŋa na desɛŋ kekyaŋ neŋ keŋ n be tale gyuusu n nɔɔ bela ya lee n desɛŋ dɔɔ. Degbeŋgyoo Doŋ Pou Nyee torola yako.