Mazimuriyaa 55

Laggetsay Kaddeedda Asaa Woosaa

Zammaaretuwaa Kaappoo Yes'etteedda, Daawite Akeekan Diis's'eedda Diitsaa.

1Abeet S'oossaw, ta woosaa sisa;

ta maganaa ay metee gooppa.

2Hayzza; ta woosaa sisa;

Ta k'ofay taana waayissina,

taani shabbarettaad.

3Hewenne, ta morkkatuwaa kooshshaappenne,

iitatuwaa naak'uwaappe denddeeddawaana.

Unttunttu ta bolla metuwaa ahiinonne

barenttu hank'k'uwaan taana morkkiino.

4Ta wozana ayifiyaan diddik'ee;

hayk'k'uwaa hirggay taana maashiseedda.

5Taana yashshaynne kokkorssay oyk'k'eedda;

dagamay taana wod'i diggeedda.

6Taani, «Taw harap'p'iyaadan k'efii de'eerenneeshsha.

Yaanintto taani paalla baade shemppana shin;

7taani haakkaade baana shin;

Bazzuwaan de'ana shin.

8Taani gotiyaappenne uushuwaappe,

attiyaasaa elleellaade gakkana shin» yaagaad.

9Abeet S'oossaw, taani katamaa giddon

walassaanne wad'etaa be'eedda diraw,

Iitatuwaa haasayaa bulluuk'k'a.

10Iitatuu gallassinne k'amma,

gimbbiyaa yuuyyiino;

Iitatetsaynne kobay katamaa giddon de'ee.

11Bashshay Aa giddon de'ee;

naak'uukka c'imuukka Aa gutaraappe shaakkettenna.

12Taana boriyaawe ta morkkiyaa gidenna;

gidintto taani danddayana.

Ta bolla c'eek'ettiyaawe taana is's'iyaawaa gidenna;

gidintto taani aappe k'osettana.

13Shin hawaa ubbaa ootsiyaawe asaa,

ta laggiyaa,

Ta dabbuwaanne ta siik'uwaa.

14Nuuni ittuu ittuwaanna ulobaa haasayeeddo;

nuuni S'oossaa golliyaan asaana ittippe simeretteeddo.

15Ta morkketuu wodii gakkennan hayk'k'ino;

unttunttu pas'a moogettino.

Ayaw gooppe, iitatetsay

unttunttu giddoninne unttunttu de'iyaa saan de'ee.

16Shin taani S'oossaa s'eesay;

Med'inaa Goday taana ashshee.

17Wontta, gallassinne omarssi

taani waassananne ta metuwaa aw odana;

I taana sisana.

18Darotuu taana morkkooppekka,

I taana olaa tooraappe ashshee.

19Benippe kawutetsaa araatan utteedda S'oossay,

ta woosaa sisiide barenttu ogiyaa laammennawanttanne

barew yayyenawantta,

I kawushshana.

20Ta laggii bare dabbotuwaa k'ohanaw,

bare kushiyaa dentseedda;

unttunttunna c'aak'k'eteedda c'aak'uwaa koleedda.

21Aa haasayay oyssaappekka aad'd'eeda shuga;

shin bare wozanaan morkkeedda.

Aa k'aalatuu zayitiyaappekka aad'd'iide wololatiino;

shin kuussa mashshaadan k'ans's'eeddino.

22Ne tookuwaa Med'inaa Godaan wotsa;

I neena zemppissana.

S'oossay awudenne s'illotuu

shabbarettanaadan ootsenna.

23Shin Abeet S'oossaw, neeni

iita asatuwaa c'iimmo ollaan duge olana.

Suutsaa gussiyaawanttunne c'immiyaawanttu,

barenttu de'ana laytsaw baggaanne de'ikkino;

Shin taani neenan ammanettana.1