Mazimuriyaa 54

Morkkiyaa Kushiyaappe Attanaw Shiik'eedda Woosaa

Zammaaretuwaa Kaappoo Yes'etteedda, Ziifan de'iyaa asatuu Saa'oolakko biide, «Daawite nu biittan k'osetteedda» yaagiide odiide simmina Daawite Akeekan Diis's'eedda Timirttiyaa.

1Abeet S'oossaw, ne suntsan taana ashsha;

ne wolk'k'an taana shatintsaa.

2Abeet S'oossaw, ta woosaa sisa;

ta doonaa haasayaa hayzza.

3Otoranchchatuu ta bolla denddiino;

dagantsiyaa asatuu taana wod'anaw koyiino.

Unttunttu S'oossaa alaalle giikkino.

4Hekko S'oossay taana maaddiyaawaa;

Goday taana zemppissiyaawaa.

5Abeet S'oossaw, ta morkketoo unttunttu iitatetsaa zaara.

Neeni ammanettiyaawaa gidiyaawaadan,

unttuntta d'ayissa.

6Abeet Med'inaa Godaw, taani ta sheniyaan new yarshshana;

neeni keeka gidiyaa diraw,

Taani ne suntsaa galatana.

7Ayaw gooppe, neeni taana

ta metuwaa ubbaappe ashshaadda;

Ta morkketuu s'oonettiyaawaa ta ayifiyaan be'aad.