Mazimuriyaa 122

Yerusaalamiw Shiik'eedda Sabaa

Pudetsaa kesiidde yes's'eedda yetsaa, Daawite s'aafeeddawaa

1Unttunttu taana, «Ane Med'inaa Godaa golliyaa boytte» yaagina,

taani nashetaad.

2Neenoo Yerusaalame katamatee,

nuuni ne penggetuwaanna geliide ek'k'eeddo!

3Yerusaalame katamay,

dantsetiide minni kees'etteedda katamaa.

4Med'inaa Godaa awaayuwaadan,

Israa'eeliyaa zaratuu,

Med'inaa Godaa galatanaw yiyaa katamay hawaa.

5Daawita zeretsaappe kaateteeddawanttu

barenttu asaw pirddanaw yaan utteeddino.

6Yerusaalame sarotetsaw

hawaadan yaagiide woossite;

«Neena siik'iyaawanttoo

unttunttu ootsiyaawe ubbay suuro!

7Ne gimbbetuwaa giddon saruu de'o!

Ne geesatuwaakka bochchiyaabay d'ayo!» yaagiide woossite.

8Ta ishatuwaanne ta dabbotuwaa diraw gaade,

«Ne giddon saruu de'o!» yaagay.

9Med'inaa Godaa nu S'oossaa golliyaa diraw gaade,

taani Yerusaalame durettanaw woosana.