ዮሃንሳ ሳፃ 19

1ሄዋፐ ጉይያን፥ ሳሉዋን ጮራ አሳ ኮሻዳን ኮሹምያ ዎልቃማ ኮሻይ ሀዋዳን ያግያዋ ታን ስሳድ፤

“ጾሳ ጋላታይ ጋኮ።

አቶተይ፥ ቦንቹነ ዎልቃይ፥

ኑ ጾሳሳ።

2አ ፕርዳይ ቱሙዋነ ጽሉዋ።

ጫራታደ ሳኣ ቱንሴዳ፥

ዎልቃማ ጫራቶ ጾሳይ ፕርዴዳ፤

ጾሳ ኦሳንቻቱዋ እዛ ዎዳ ድራዉ፥

ጾሳይ እዞ ሙሬዳ”

ያጌዳ።1

3አሳይ ላኤንዋ ባረ ኮሻ ቁ ኦደ፥

“ጾሳ ጋላታይ ጋኮ።

ሄ ካታማታ መ መናዉ ጩዋታና”

ያጌድኖ።2

4ላታማነ ኦይዱ ጭማቱነ ሸምፑዋና ደእያ ኦይዱ መታቱ ካዉተ ኦይድያን ኡቴዳ ጾሳዉ ጉፋኒደ፥ “አመንእ። ጾሳ ጋላታይ ጋኮ” ያጊደ ጎይኔድኖ።

ዶርሳ ቡላቻዉ ጼስያ ጼሳ

5ሄዋፐ ጉይያን፥

“ጾሳ አይላቱ ኡባይ፥

ጾሳዉ ያይያ ጉይ፥

ዳሩ ኡባይ ኑ ጾሳ ጋላትተ”

ያግያ ኮሻይ ካዉተ ኦይድያፐ ከሴዳ።3

6ሄዋፐ ጉይያን፥ ጮራ አሳዳን ኮሹምያ፥ ዎልቃማ ሻፋዳን ጉምያ፥ ዎልቃማ ጉጉንዳን ጉጉምያ ኮሻ ታን ስሳድ። ሄ ኮሻይ፥

“ጾሳ ጋላታይ ጋኮ።

አያዉ ጎፐ፥ ኑ ጎዳይ፥

ኡባፐ ዎልቃማ ጾሳይ ካዉቴዳ።4

7ዶርሳ ቡላቻ ጋላሳይ ጋኬዳ ድራዉነ፥

ገለዉናካ ቡላቻዉ ባረና ጊግሴዳ ድራዉ፥

ኑን ፓሽኮይተነ ናሸቶይተ፤

ቃይ ዶርሳ ቦንቾይተ።

8ገለዉንዉ ማያናዉ፥

ሱፍያ ጌተትያ ክርያን ዳደቴዳ፥

ጶልያ ቦ ማዩ እመቴዳ።

ሱፍያ ጌተትያ ክርያን ዳደቴዳ ማዩ፥

ጌሻቱዋ ጽሎ ኦሱዋ”

ያግያዋ፥ ታን ስሳድ።

9ሄዋፐ ጉይያን፥ ኪታንቻይ ታና፥ “ ‘ዶርሳ ቡላቻዉ ጼሰቴዳዋንቱ አንጀቴዳዋንታ’ ያጋደ ጻፋ” ያጌዳ። ሄ ኪታንቻይ ቃይካ ታና፥ “ሀዌ ጾሳ ቱሙ ቃላ” ያጌዳ።

10ሄዋፐ ጉየ ታን አዉ ጎይናናዉ አ ገድያን ኩንዳድ። ሽን እ ታና፥ “ሄዋ ኦፓ። ታን ነ ማላነ የሱስ ኡንቱንቶ ቆንጭሴዳ ቱማተ ኦይቄዳ ነ እሻቱዋ ኡባ ማላ አይልያ። ጾሳዉ ጎይና። አያዉ ጎፐ፥ የሱስ ቆንጭሴዳ ቱማተይ ትምቢትያ ኦድያዎ ደንያዋ” ያጌዳ።

ቦ ፓራ ቶጌዳዋ

11ያትና፥ ሳሉ ዶየቴዳዋ ታን በኣድ። ሄዋን ቦ ፓራይ ደኤ፤ ሄ ፓራ ቶጌዳዌ አማነትያዋነ ቱማንቻ ጊደ ጼሰቴ። ቶጌዳዌ ጽሎተን ፕርዴነ ባረ ኦላካ ኦለቴ።5 12አ አይፊ ታማ ላጩዋ ማላቴ፤ ቃይ እ ባረ ሁጲያን ዳሮ ካላቻ ዎዳ። አ ቦላ ጻፈት ኡቴዳ ሱንይ ደኤ፤ ሽን ሄ ሱንይ አየንቶነ አፐ አትን፥ ኦንነ ኤረና።6 13እ ማዬዳ ማዩ ሱን ናቂ ከሴዳዋ። አ ሱንይካ ጾሳ ቃላ። 14ሳሉዋ ዎታዳራቱ ቦ ጌሻ ሱፍያ ጌተትያ ክርያን ዳደቴዳ ማዩዋ ማዪደ፥ ቦ ፓራቱዋ ቶጊደ፥ አ ጌዱዋ ካሊኖ። 15አሳ ዘረ እ ይስያ ኩሳ ማሻይ አ ዶናፐ ከሴ። ብራታ ጻምኣን አሳ እ ሞዳና። ኡባፐ ዎልቃማ ጾሳይ ባረ ሀንቁዋ ዎይንያ ኤሳይ ጉምኤትያሳን፥ ጉምኢደ በሳና።7 16አ ማዩዋ ቦላነ አ ዎድርያ ቦላ፥ “ካታቱዋ ካትያነ ጎዳቱዋ ጎዳ” ያግያ ሱንይ ጻፈት ኡቴዳ።

17ሄዋፐ ጉይያን፥ ታን እት ኪታንቻይ አዋን ኤቄዳዋ በኣድ። ሄ ኪታንቻይ ሳሉዋን ቂደ ፓልያ ካፉዋ ኡባቶ ባረ ኮሻ ቁ ኦደ፥ “ሃ ዪተ። ጾሳ ካዎ እትሳ ሺቅተ።8 18ዪደ ካታቱዋ አሹዋ፥ ሻላቃቱዋ አሹዋካ ዎታዳራቱዋ አሹዋ ሚተ፤ ፓራቱዋ አሹዋካ ፓራቱዋ ቶጌዳዋንቱ አሹዋካ ሚተ፤ ቃይ አሳ ኡባ አሹዋ አይልያዋነ ዎማኑዋ፥ ቃዋነ ሆካዋ ሚተ” ያጌዳ።

19ፓራ ቶጌዳዋናነ አ ዎታዳራቱዋና ኦለታናዉ፥ ዶአይነ ሳኣ ካታቱ ቃይ ኡንቱንቱ ዎታዳራቱ እት ሳኣ ሺቅ ኡቴዳዋንታ ታን በኣድ። 20ሄ ዶአይ አ ስንን ማላታ ኦዳ ዎርዶ ናብያና እትፐ ኦይቀቴዳ። ዶኣ ማላይ ደእያዋንታነ ዶኣ ምስለዉ ጎይኔዳዋንታ እ ባለዳዌ ሄ ኦያ ማላታቱዋና። ዶአይነ ዎርዱዋ ትምቢትያ ኦድያዌ ላአቱካ ዲንያን ኤጽያ ታማ አባን ፓጻ የገቴድኖ። 21ኡንቱንቱ ዎታዳራቱ ፓራ ቶጌዳዋ ዶናፐ ከስያ ማሻን ሀይቄድኖ። ካፋቱ ኡባቱ ኡንቱንቱ አሹዋፐ ባረንቶ ዳንዳዬዳዋ ኬና ሜድኖ።