Dawro Full Bible Ethiopic
ማዝሙርያ 96
ጾሳይ ኡባፐ ቦላ ካትያ
መና ጎዳዉ ኦራ የ የጽተ፤
ሳኣን ደእያ አሳይ፥ ኡባይ መና ጎዳዉ የጽተ።
መና ጎዳዉ የጽተ፤ አ ሱን ሳቢተ፤
እ አሽያ ምሽራቹዋ ጋላሳን ጋላሳን ኦድተ።
ካዉተ ግዶን አ ቦንቹዋ፥
አሳ ኡባ ግዶን አ ማላልስያ ኦሱዋባ አዋይተ።
አያዉ ጎፐ፥ መና ጎዳይ ዎልቃማ፤
ግታ ጋላታይ አዉ በሴ።
ጾሳቱዋ ኡባፐ አደ እ ያየታናዉ በሴ።
ሀራ አሳ ጾሳቱ ኡባይ ኤቃቱዋ፤
ሽን መና ጎዳይ ሳሎቱዋ መዳ ጾሳ።
ቦንቹነ አንጋይ አ ዩሹዋን ደኤ፤
ምኖተይነ ፑላይ አ ጌሻ ጎልያን ደኤ።
ህንተኖ፥ አሳ ዛረቶ ኡባቶ፥
መና ጎዳባ ኦድተ፤1
“ቦንቹነ ዎልቃይ መና ጎዳሳ” ጊደ ኦድተ።
“ቦንቹ አ ሱንሳ”
ጊደ መና ጎዳባ ኦድተ።
ያርሹዋ አኪደ፥ አ ዳባባ ገልተ።
አ ጌሻተ ፑላን መና ጎዳዉ ጎይንተ፤
ቢታን ደእያ አሳ ኡባዉ፥ አ ስንን ኮኮርተ።
ካዉተቱዋ ግዶን፥ “መና ጎዳይ ካተቴዳ!
ሳአይ ምን ኤቄዳ፤ ኡባካ ቃጸና።
እ አሳ ቦላ ሱረተን ፕርዳና” ያግተ።
ሳሎቱ ናሸትኖ፤ ሳአይካ ሀሹ ጎ፤
አባይነ አ ግዶን ኩሜዳዌ ጉሞ።
ሾይቃይነ ሾይቃን ደእያ ኡባይ ናሸቶ!
ዎራን ደእያ ም ኡባይካ ናሸቻን አ ስንን የጻና።
አያዉ ጎፐ፥ መና ጎዳይ ዬ፤
እ ሳኣ ቦላን ፕርዳናዉ ዬ፤
እ ሀ ሳኣ ቦላ ጽሎተን፥
አሳ ቦላካ ቱማተን ፕርዳና።
Source notes (1)
- Cross-reference ማዝ. 29:1-2
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.