ማዝሙርያ 91

ጾሳይ ኑና ናግያዋ

1ኡባፐ ቂያ ጾሳን ናገቲደ ደእያዌ፥

ኡባፐ ዎልቃማ ጾሳ ኩዋ ግዶን አቄ፤

2መና ጎዳዉ፥

“ኔን ታዉ ጌሱዋነ ባቃታ አትያ ሳኣ፤

ኔን ታን አማንያ ታ ጾሳ” ያጋና።

3እ ኔና ሻንካንቻቱዋ ግትያፐካ፥

ዎ ዉርስያ ኢታ ሀርግያፐካ አሻና።

4እ ባረ ባለቱዋን ኔና ካማና፤

አ ቀፈቱዋ ጋርሳ ኔን ባቃታደ ቆሰታ አታና።

አ አማነቱሳይ ነዉ ጎንዳለ።

5ኔን ቃማ ዳጋንያባዉ፥

ዎይ ጋላስ ጾንገትያባዉ ያያካ፤

6ዎይ ማን ኦይቂያ ሀርግያዉ፥

ዎይ ጋላሳ ሴታን ዉርስያ ኢታ ሀርግያ ህርጋካ።

7ሻአይ ነ ምይያን፥

ቃይ ታሙ ሻአይ ኔፐ ኡሸቻ ባጋና ኩንዳና፤

ሽን ኔና አያይነ ቦቼና።

8ኔን ነ አይፍያ ጻላላን ጼላና፤

ኢታቱ ሙረትያዋካ በአና።

9መና ጎዳ ኔን ነዉ ባቃታ አትያ ሳኣ ኦዳ ድራዉነ፥

ኡባፐ ቂያ ጾሳ ነዉ፥

ደእያ ሳኣ ኦዳ ድራዉ፥

10ኢታባይ ኔና ቦቼና፤

ቦሻይካ ነ ጎልያ ሺቀና።

11አያዉ ጎፐ፥ ነ ኦግያን ኡባን

ኔና ናጋና ማላ፥1

ጾሳይ ባረ ኪታንቻቱዋ አዛዛና።

12ነ ገዲ ሹቻን በተና ማላ፥2

ኪታንቻቱ ባረንቱ ኩሽያን ኔና ደንና።

13ኔን ጋሙዋነ ሾሻ ቦላን ሄመታና፤3

ቃይ ዎዳላ ጋሙዋነ ዎያ ሾሻ ኔን የና።

14መና ጎዳይ ሀዋዳን ያጌ፤

“እ ታና ሲቄዳ ድራዉ፥

ታን አ አሻና።

እ ታ ሱን ኤሬዳ ድራዉ፥

ታን አ ናጋና።

15እ ታና ጼግያ ዎደ፥

ታን አዉ ኮያና።

መቱዋን ታን አናና እትፐ ግዳና፤

ታን አ አሻናነ ቦንቻና።

16ታን አ ላይ አዱሳደ ካልሳና፤

ታ አቶተ አ በሳና” ያጌ።