ማዝሙርያ 62

ህዶታይ ጾሳ ቦላ ጻላላን

ዳዊተ ዛማረቱዋ ካፑዋ ጁዱቶ የጼዳ ማዝሙርያ።

(1 ኦዱዋ 25:3)

1ጾሳ ጻላላን ታን ሸምፑዋ ደማድ፤

ታ አቶተይ አፐ ዬ።

2አ ጻላላይ ታ ዛላነ ታ አቶተ፤

እ ታን ቆሰታ አትያ ሳኣ ግድያ ድራዉ፥

አይነ ህርግከ።

3ዎድያ ጎዳነ ቃጽያ ድርሳ ማላትያ አሳ ዎናዉ፥

ህንተ አዉደ ጋካናዉ ደንዲቴ?

4ኡንቱንቱ አ ቦንቾ ሳኣፐ

አ ዎናዋ ጻላላ ኮዪኖ፤

ኡንቱንቱ ዎርዱዋን ናሸቲኖ።

ባረንቱ ዶናን አንጂኖ፤

ሽን ባረንቱ ዎዛናን ሸቂኖ።

5ታ ሸምፓታ ጾሳ ጻላላን ሸምፑዋ ደማዱ፤

ታን ህዶታን ናግያዌ አፐ ዬ።

6አ ጻላላይ ታ ዛላነ ታ አቶተ፤

እ ታን ቆሰታ አትያ ሳኣ ግድያ ድራዉ፥

አይነ ህርግከ።

7ታ አቶተይነ ታ ቦንቹ ጾሳና፤

እ ታ ምኖ ዛላነ ታ ጌሱዋ።

8አሳዉ፥ ኡባ ዎደ ጾሳን አማነትተ፤

እ ኑዉ ጌሱዋ ግድያ ድራዉ፥

ህንተ ዎዛና ቆፋ አዉ ኦድተ።

9አሳይ ኡባይ እት ገደ ሸምፕያ ጫርኩዋ ማላ፤

ቂና ዝቂና፥ አሳይ መላ።

ሚዛንያን ዎናካ ኡንቱንቱ አይነ ዴጽክኖ፤

ኡንቱንቱ እት ገደ ሸምፕያ ጫርኩዋፐካ ካዉሺኖ።

10ማካላን ሺሾዋን አማነቶፕተ፤

ዉእ ሺሺደ ዱረታናዉ ሀልቾፕተ።

ህንተ ዱረተይ ዳሮፐካ፥

ህንተ ዎዛና አ ቦላ ዎፕተ።

11ጾሳይ እት ገደ ኦዴዳ፥ ታን

ላኡ የዉዋ ስሳድ፤ “ዎልቃይ ጾሳሳ።

12አገና ሲቁ ጎዳዋ” ያጌዳ።1

አቤት ጾሳዉ፥ ኔን አሳ ኡባዉ

አ ኦሱዋዳን ኦሱዋዳን ዛራና።2