ማዝሙርያ 55

ላገይ ካዴዳ አሳ ዎሳ

ዛማረቱዋ ካፖ የጸቴዳ፥ ዳዊተ አኬካን ዲጼዳ ዲ.

1አቤት ጾሳዉ፥ ታ ዎሳ ስሳ፤

ታ ማጋና አይ መቴ ጎፓ።

2ሀይዛ፤ ታ ዎሳ ስሳ፤

ታ ቆፋይ ታና ዋይስና፥

ታን ሻባረታድ።

3ሄዌነ፥ ታ ሞርከቱዋ ኮሻፐነ፥

ኢታቱዋ ናቁዋፐ ደንዴዳዋና።

ኡንቱንቱ ታ ቦላ መቱዋ አሂኖነ

ባረንቱ ሀንቁዋን ታና ሞርኪኖ።

4ታ ዎዛና አይፍያን ድድቄ፤

ሀይቁዋ ህርጋይ ታና ማሽሴዳ።

5ታና ያሻይነ ኮኮርሳይ ኦይቄዳ፤

ዳጋማይ ታና ዎ ድጌዳ።

6ታን፥ “ታዉ ሀራጵያዳን ቀፊ ደኤረኔሻ።

ያንንቶ ታን ፓላ ባደ ሸምፓና ሽን፤

7ታን ሃካደ ባና ሽን፤

ባዙዋን ደአና ሽን።

8ታን ጎትያፐነ ኡሹዋፐ፥

አትያሳ ኤሌላደ ጋካና ሽን” ያጋድ።

9አቤት ጾሳዉ፥ ታን ካታማ ግዶን

ዋላሳነ ዋታ በኤዳ ድራዉ፥

ኢታቱዋ ሃሳያ ቡሉቃ።

10ኢታቱ ጋላስነ ቃማ፥

ግምቢያ ዩዪኖ፤

ኢታተይነ ኮባይ ካታማ ግዶን ደኤ።

11ባሻይ አ ግዶን ደኤ፤

ናቁካ ጭሙካ አ ጉታራፐ ሻከተና።

12ታና ቦርያዌ ታ ሞርክያ ግደና፤

ግድንቶ ታን ዳንዳያና።

ታ ቦላ ጬቀትያዌ ታና እጽያዋ ግደና፤

ግድንቶ ታን አፐ ቆሰታና።

13ሽን ሀዋ ኡባ ኦያዌ አሳ፥

ታ ላግያ፥

ታ ዳቡዋነ ታ ሲቁዋ።

14ኑን እቱ እቱዋና ኡሎባ ሃሳዬዶ፤

ኑን ጾሳ ጎልያን አሳና እትፐ ስመረቴዶ።

15ታ ሞርከቱ ዎዲ ጋከናን ሀይቂኖ፤

ኡንቱንቱ ፓጻ ሞገትኖ።

አያዉ ጎፐ፥ ኢታተይ

ኡንቱንቱ ግዶንነ ኡንቱንቱ ደእያ ሳን ደኤ።

16ሽን ታን ጾሳ ጼሳይ፤

መና ጎዳይ ታና አሼ።

17ዎንታ፥ ጋላስነ ኦማርስ

ታን ዋሳናነ ታ መቱዋ አዉ ኦዳና፤

እ ታና ስሳና።

18ዳሮቱ ታና ሞርኮፐካ፥

እ ታና ኦላ ቶራፐ አሼ።

19በንፐ ካዉተ አራታን ኡቴዳ ጾሳይ፥

ታ ዎሳ ስሲደ ባረንቱ ኦግያ ላመናዋንታነ

ባረዉ ያየናዋንታ፥

እ ካዉሻና።

20ታ ላጊ ባረ ዳቦቱዋ ቆሀናዉ፥

ባረ ኩሽያ ደንዳ፤

ኡንቱንቱና ጫቀቴዳ ጫቁዋ ኮሌዳ።

21አ ሃሳያይ ኦይሳፐካ አዳ ሹጋ፤

ሽን ባረ ዎዛናን ሞርኬዳ።

አ ቃላቱ ዛይትያፐካ አደ ዎሎላቲኖ፤

ሽን ኩሳ ማሻዳን ቃንጼድኖ።

22ነ ቶኩዋ መና ጎዳን ዎ፤

እ ኔና ዘምፕሳና።

ጾሳይ አዉደነ ጽሎቱ

ሻባረታናዳን ኦና።

23ሽን አቤት ጾሳዉ፥ ኔን

ኢታ አሳቱዋ ጪሞ ኦላን ዱገ ኦላና።

ሱ ጉስያዋንቱነ ጭምያዋንቱ፥

ባረንቱ ደአና ላይዉ ባጋነ ደእክኖ፤

ሽን ታን ኔናን አማነታና።1