Skip to content
BibleKenya

Dawro Full Bible Ethiopic

ማዝሙርያ 42

ላኤን ማጻፋ

(ማዝ. 42—72)

የደሳ ዎደ ዎሳ

ዛማረቱዋ ካፖ የጸቴዳ፥ ቆረ ናናቱዋ አኬካ ግንጹዋ

ጋራይ ጎግያ ሃ ላሞትያዋዳን፥

አቤት ጾሳዉ፥ ሄዋዳን ታንካ ኔና ላሞታይ።

“ታን ባደ፥ ጾሳ ስን

በአናዌ አዉዴሻ?” ጋደ፥

ጾሳ፥ ደኡዋ ጾሳ በአናዉ ሳመታይ።

አሳቱ ኡባ ገደ፥ “ነ ጾሳይ ሀቃን ደኢ?”

ያግያ ዎደ፥ ታዉ ጋላስነ ቃማ ታ አፎይ ቁማ ግዴዳ።

ታን ኡንቱንቱ ባላ ቦንቻናዉ፥

ሺቄዳ ዳሮ አሳ ግዱዋና

ሳልፕያን ሆምቦጭሺናነ

ጋላታ የ የጽሽን፥

ጾሳ ጎለ ካለዳዋ ቆፕያ ዎደ፥

ታ ዎዛናይ ካዮቲደ፥ ግዶን ሴሬዳ።

ታ ሸምፓቴ፥ ታን አያዉ ካዮታይታ?

ቃይ አያዉ ጃባካታይታ?

ታን ጾሳን ህዶታ ዎና።

አያዉ ጎፐ፥ ታን ብሮ

ታና አሽያዋነ ታ ጾሳ ጋላታና።

ታ ዎዛናይ ካዮቴዳ፤ ሄዋ ድራዉ፥

ታን ዮርዳኖሳ ቢታን፥ ሄርሞነ ቃን፥

ሚዛረ ደርያን ኤቃደ ኔና ሀሳያይ።

ነ ሶሱዋ ጉንን ጪሙ ጪማዉ ጼሴ፤

ቃይ ነ ቤታይነ ነ ሆቢ ኡባይ

ታ ቦላና ጎጌዳ።

ጋላስ መና ጎዳይ አገና ባረ ሲቁዋ ታዉ ኪቴ።

ቃማካ አ የይ ታናና ደኤ፤

ሄ የይካ ታን ታ ደኡዋ ጾሳ ዎስያ ዎሳ።

ጾሳ፥ ታ ዎጋ ዛላ ታን፥

“አያዉ ታና ዶጋዲ?

ታን አያዉ ታ ሞርክያን ናቀታደ ካዮታደ ሀመቶ?” ያጋይ።

ታ ሞርከቱ ታና፥

“ነ ጾሳይ ሀቃን ደኢ?” ያጊደ፥

ታ መቀ መንደ ቦሪኖ።

ታ ሸምፓቴ፥ ታን አያዉ ካዮታይታ?

ቃይ አያዉ ጃባካታይታ?

ጾሳን ህዶታ ዎና።

አያዉ ጎፐ፥ ታን ሀእካ

ታና አሽያዋነ ታ ጾሳ ጋላታና።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.