ማዝሙርያ 41

ሀርጋንቻ አሳ ዎሳ

ዛማረቱዋ ካፖ የጸቴዳ፥ ዳዊታ ማዝሙርያ

1ህዬሳዉ ቆፕያ አሳይ አንጀቴዳዋ፤

መቱዋ ጋላስ መና ጎዳይ አ አሼ።

2መና ጎዳይ አ ናጊደ፥ ፓጻ ዎ።

እነ ቢታ ቦላን አንጀቴዳዋ ግዴ፤

ጾሳይ አ አ ሞርከቱዋ አሞ አደ እመና።

3መና ጎዳይ አ ሀርግያ ሂን ደእሺናካ ማዴ፤

እ ሳከትናካ፥ አ ፓ።

4ታና ግዶፐ፥ ታን፥ “አቤት መና ጎዳዉ፥

ታን ኔና ናቄዳ ድራዉ፥ ታና ማራ፤

ሀርግያፐካ ታና ፓ” ያጋድ።

5ታ ሞርከቱ ኢታባን ታና ሃሳዪደ፥

“እ አዉደ ሀይቃንዴሻ?

ቃይ አ ሱንይካ አዉደ ያንዴሻ?” ያጊኖ።

6ታና በአናዉ ይያ ኦንነ ታዉ ዎርዶባ ኦዴ፤

ባረ ዎዛናን ታና ዝግርያዋ ብዴ።

ሄዋፐ ጉይያን፥ ካረ ከሲደ፥

ያነ ሃነ ኦዱዋ ላሌ።

7ታና እጽያ ኡባቱ

እትፐ ታ ቦላን ሳሱኪኖ፤

“ኢታባይ አ ቦላ ጋኬ” ጊደ ቆፒኖ።

8ኡንቱንቱ “አ ኢታ ሀርጊ ኦይቄዳ፤

እ ሄ ግሴዳሳፐ ኡባካ ደንደና” ያጊኖ።

9ሀራይ አትና፥ ታን አማነትያ ታ ሲቆ ላጊ፥1

ታን ባርሴዳዌ ታ ኩሽያ ሳኤዳ።

10ሽን አቤት መና ጎዳዉ፥ ኔን ታና ማራ፤

ታን ኡንቱንቱ ኩሽያ ከሳናዳን፥

ታና ሀርግያ ሂፐ ደን።

11ኔን ታናን ናሸታናዋ ታን ኤራይ፤

አያዉ ጎፐ፥ ታ ሞርኪ ታና፥

ጾኒደ ጋይረና።

12ኔን ታና ታ ሱረተ ድራዉ ዘምፕሳዳ፤

ነ ስንን ታና መናዉ ዎዳ።

13መና ጎዳይ፥ እስራኤልያ ጾሳይ፥

መናፐ መና ጋካናዉ ጋላተቶ።2

አመንእ። አመንእ።