Dawro Full Bible Ethiopic
ማዝሙርያ 39
መቱ ጋካ አሳ ፓጸ
ዳዊተ ዛማረቱዋ ካፑዋ ጁዱቶ የጼዳ አማኑዋ ቃላ (1 ኦዱዋ 25:3)
ታን፥ “ታ እንጻርሳን ናጋራ ኦናዳን፥
ታ ኦግያ ናጋና።
ኢታ አሳቱ ታ ስንን ደእያ ዎደ፥
ታ ዶና ባራና” ያጋድ።
ሽን ታን ዱድያዳን ጮኡ ጋድ፤
ታን ሀራይ አቶ ሎኦባ ሃሳይያዋካ አግና፥
ታ ዋዪ ያ ዳሬዳ።
ታ ዎዛናይ ታ ጋርሳን ሴሌዳ፤
ታ ቆፋይ ፖዱ ጊደ፥ ኤጽ ከሴዳ።
ያትና፥ ታ እንጻርሳን ሀዋዳን ያጋድ፤
“አቤት መና ጎዳዉ፥ ታ ደኡዋ ዉርሰነ
ታ ደአናዉ አቴዳ ጋላሳ ታና በሳ።
ቃይ ታ ደኡ ዉራናዉ አይ ኬሻ ኤሌልንቶ፥ ታና ኤርሳ።
ኔን ታ ላይ ጺ ታካ ኬሻ ከሳዳ።
ታ ላይይ ነ ስንን ባይናዋ ማላ፤
ቱሙዋፐ አሳይ ኡባይ እት ገደ ሸምፕያ ጫርኩዋ ማላ።
ቱሙዋፐ አሳይ ኤሹዋዳን ሀመቴ፤
ቱሙዋፐ ጮ መላ ስመረቴ።
እ ማጹዋ ሺሼ፤ ሽን አካና አሳ ኤረና።
“አቤት ጎዳዉ፥ ሀእ ስም፥
ታን ናግያዌ አዬ?
ታን ህዶታ ኦያዌ ኔናና።
ታ ባይዙዋ ኡባፐ ታና አሻ፤
ኤያቱዋን ታና ቶሽሶፓ።
ሀዋ ኡባ ኦዳዌ
ኔና ግድያ ድራዉ፥ ታን ዱዳድ፤
ዶናነ ፖጋበይከ።
ነ ቦሻ ታ ቦላፐ ደን።
ነ ኩሽያ ምኖተ ጋሱዋን ታን ዳቡራድ።
ኔን አሳ አ ናጋራ ድራዉ፥ ሴራሳነ ሙራሳ፤
አ አልኦ ሸምፑዋ ብልኣዳን ዉርሳሳ።
ቱሙዋፐ አሳይ ኡባይ እት ገደ ጫርክያ ጫርኩዋ ማላ።
“አቤት መና ጎዳዉ፥ ታ ዎሳ ስሳ፤
ታና ማዳናዉ ታ ዋሱዋ ሀይዛ።
ታ አፎ ጮኡ ጎፓ፤
አያዉ ጎፐ፥ ታን ታ አዎቱዋ ኡባዳን በተነ እማ ግዳደ፥
ኔናና ደአይ።
ታን ሻከታናፐነ ያናፐ፥
ካሰታደ ናሸታና ማላ፥
ሀእ ታና አጋ” ያጋድ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.