Skip to content
BibleKenya

Dawro Full Bible Ethiopic

ማዝሙርያ 38

ኡንኤቴዳ አሳ ዎሳ

ዳዊታ ሀሳይስያዋ ማዛሙርያ

አቤት መና ጎዳዉ፥ ነ ሀንቁዋን ታና ሴሮፓ፤

ነ ይሉዋን ታና ሙሮፓ።

ነ ዎንዳፍያ ፖይ ታና ጫድ ድጌድኖ፤

ነ ኩሺካ ታና ናቂ ኦይቄዳ።

ኔን ላንጬዳ ድራዉ፥ ታ ቦላይ ፓጻ ግደና፤

ታ ናጋራ ድራዉ፥ ታ አሳተይ ሳራ ግደና።

ታ ኢታተይ ድኡዋዳን ታና ሙኬዳ፤

ደንደና ዎልቃማ ቶኩዋዳን ታዉ ዴጼዳ።

ታን ናጋራ ኦዳ ኤያተ ድራዉ፥

ታ ማዱይ ጊሻ ኦይቂደ ጽንቄዳ።

ታን ሆካድነ ቁናድ።

ጋላሳ ኩመን ዬካደ ፔሻድ።

ታ አሹዋ ምሹ ጹጌ፤

ታ ቦላይ ፓጻ ግደና።

ታን ዳቡራድነ ንፕ ጋድ፤

ታ ዎዛናይ ድድቅያ ድራዉ ኦላይ።

አቤት ጾሳዉ፥ ታ አሙ ኡባይ ነዉ ኤረቴ፤

ታን ኦልያዌ ኔፐ ጌምቤና።

ታ ዎዛና አይፍያን ድድቄ፤

ታ ዎልቃይ እጽና፤

ታ አይፊካ ጼላ እጼዳ።

ታ ማይ ድራዉ፥

ታ ሾሮቱካ ታ ላገቱካ ሃኩዋን ኤቄድኖ።

ታ ዳቦቱካ ታፐ ሃኬድኖ።

ታና ዎናዉ ኮይያዋንቱ፥

ባረንቱ ጲርያ ታዉ የጊኖ።

ታና ቆሀናዉ ኮይያዋንቱ፥

“ኤቃሻ፤ ኑን ኔና ደማና” ያጊደ፥

ማንዲኖነ ጋላሳ ኩመን ታ ቦላ ያኢኖ።

ሄ ዎደ ታን ቱለ አሳ ማላ፥ ስስከ፤

ታን ዱደ አሳ ማላ፥ ዶናነ ፖክከ።

ኤ፥ ታን ስሰናነ

ዶናይ ዛረና አሳ ማላ።

ሽን አቤት መና ጎዳዉ፥ ታን ኔናን ህዶታ ኦይ።

አቤት መና ጎዳዉ፥ ታ ጾሳዉ፥ ኔን ታዉ ዛሩዋ እማና።

ታን ጾሳ፥ “ታ ገዲ በትና፥

ኡንቱንቱ፥ ‘አዉ ሀሹ’ ጋናዳንነ

ታ ቦላ ጬቀታናዳን ኦፓ” ያጋይ።

ታን ኩንዳና ሀናይ፤

ታ ሳኩካ ታና የደናን እጼዳ።

ታን ታ ኢታ ኦሱዋ ፓጻይ፤

ታን ታ ናጋራ ጋሱዋን ካዮታይ።

ታ ሞርከቱ ጎባነ ዎልቃማ፤

ታና ጮ እጽያዋንቱ ጮራ።

ታን ሎኦባ ኦና፥

ታዉ ኢታ ዛርያ አሳቱ፥

ታን ሎኦባ ካልያ ድራዉ፥ ታና ኤቀቲኖ።

አቤት መና ጎዳዉ፥ ታና የጎፓ።

አቤት ታ ጾሳዉ፥ ታፐ ኔን ሃኮፓ።

አቤት መና ጎዳዉ፥ ታና አሽያዎ፥

ታና ማዳናዉ ኤሌላ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.