Dawro Full Bible Ethiopic
ማዝሙርያ 30
ጋላታ ዎሳ
ዳዊታ ማዝሙርያ፥ ጌሻ ጎልያ አንጅስያ ጋላስ የጼዳዋ
አቤት መና ጎዳዉ፥
ኔን ታና ጪሙዋፐ ከሴዳ ድራዉነ
ታ ሞርከቱዋን፥ “ሀሹ አዉ” ጊሳቤና ድራዉ፥
ታን ኔና ቁ ቁ ኦና።
አቤት መና ጎዳዉ ታ ጾሳዉ፥
ኔን ታና ማዳናዳን፥ ታን ኔና ጼሳድ፤
ኔን ታና ፓዳ።
አቤት መና ጎዳዉ፥ ታና ዱፉዋ ቤናዳን ናጋዳ፤
ዱገ ጪሞ ኦላን ገለናዳን፥
ኔን ታና ፓጻ አሻዳ።
ህንተኖ ጾሳ አሳቶ፥ መና ጎዳዉ የጽተ፤
አ ጌሻ ሱንካ ጋላትተ።
አ ሀንቁ ጉ ዎድያሳ፥
ሽን አ ኬካተይ ደኡዋ ላይ ኡባሳ።
ቃማ ዬኪደ አቆፐ፥
ዎንታ ዛዋይ ባይና ናሸቻ ግዴ።
ታን ዎፓን ደእያ ዎደ፥
“ስም ታን ኡባካ ቃጽከ” ያጋድ።
አቤት መና ጎዳዉ፥ ኔን ታዉ ኬኬዳ ዎደ፥
ታና ዎልቃማ ደርያዳን ምንሳደ ኤሳዳ።
ሽን ኔን ነ ስን ዎራ ዛሬዳ ዎደ፥
ታን ዳጋማድ።
አቤት መና ጎዳዉ፥ ታን ኔና ጼሳድ፤
ታን መና ጎዳኮ ማሮተዉ ሀዋዳን ያጋደ ዎሳድ፤
“ታን ሀይቂያዋፐ ዎይ
ዱፉዋን ገልያዋፐ አያ ደማኒ?
ባናዉ ላመቴዳ አሳይ ኔና ጋላቲ?
ኔን አማነትያዋ ኦዲ?
አቤት መና ጎዳዉ፥ ታና ኔን ስሳ፤
ታዉ ቃረታ።
አቤት መና ጎዳዉ፥ ኔን ታዉ ማዱዋ ግዳ” ያጋድ።
ታ ዬኩዋ የዉ ላማዳ።
ካዩዋ ማዩዋ ታፐ ቃራደ፥
ናሸቻ ታና ማይዛዳ።
ሄዋ ድራዉ፥ ታን ኔና
ሳባናፐ አትና፥ ጮኡ ጊከ።
አቤት መና ጎዳዉ ታ ጾሳዉ፥
ታን ኔና መናዉካ ጋላታና።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.