Skip to content
BibleKenya

Dawro Full Bible Ethiopic

ማዝሙርያ 29

ጾሳ ኮሻ ዎልቃ

ዳዊታ ማዛሙርያ

ህንተኖ ሳሉዋን ደእያ መታቶ፥

መና ጎዳባ ኦድተ፤

“ቦንቹነ ዎልቃይ መና ጎዳዋ” ጊደ ኦድተ።

መና ጎዳ ቦንቾ ሱን ጋላትተ፤

አ ጌሻተ ፑላዉ መና ጎዳዉ ጎይንተ።

መና ጎዳ ጉንይ ሃቱዋ ቦላን ስሰቴ።

ቦንቾ ጾሳይ ጉጉንዳን ጉሜ፤

መና ጎዳይ ዎልቃማ ሃቱዋ ቦላን ጉሜ።

መና ጎዳ ጉንይ ዎልቃማ፤

መና ጎዳ ጉንይ፥ “ሆላ!” ጊስያዋ።

መና ጎዳ ጉንይ ዝጋቱዋ መንሬ፤

ሊባኖሳ ግያ ቢታን ደእያ ዝጋቱዋካ፥

መና ጎዳይ መንሬ።

ሊባኖሳ ደረቱዋ ጋሎ ማራዳን ቡራቅሴ፤

ስርዮና ግያ ዎልቃማ ደርያ መንዳን ጲጽልሴ።

መና ጎዳ ኮሻይ፥

ዋልቃን ዎልቃምሴ።

መና ጎዳ ኮሻይ ባዙዋ ቃ፤

መና ጎዳይ ቃዴሳ ባዙዋ ቃ።

መና ጎዳ ኮሻይ ዎላቱዋ ቃ፤

ም ሀይካ ቆቆፌ።

ያትና፥ እ ደእያ ሳኣን ደእያዋንቱ፥

“ቦንቹ ጾሳዉ ግዶ” ያጊኖ።

መና ጎዳይ ድኡዋ ሃ ቦላ ባረ ካዉተ አራታ ዎደ ኡቴዳ፤

መና ጎዳይ ባረ ካዉተ አራታን ኡቲደ፥

መናዉ ካተቴዳ።

መና ጎዳይ ባረ አሳዉ ዎልቃ እሜ።

መና ጎዳይ ባረ አሳ ሳሮተን አንጄ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.