Dawro Full Bible Ethiopic
ማዝሙርያ 27
ጾሳና ደእያ አሳ አማኑዋ
ዳዊታ ማዛሙርያ
መና ጎዳይ ታዉ ፖኦነ ታና አሽያዋ፤
ያትና፥ ታን ኦዉ ያያንታ?
መና ጎዳይ ታ ደኡ ናገትያ ሚጻ፤
ያትና፥ ታን ኦዉ ዳጋማንታ?
ኢታ አሳቱ፥ ታ እጽያዋንቱነ ታ ሞርከቱ
ታና ዎናዉ ታኮ ዎጽያ ዎደ፥
ኡንቱንቱ ባረንቶ በቲደ ኩንዳና።
ሞርክያ ቶራይ ታና ዶድንቶካ
ታ ዎዛናይ ያየና።
ኦላይ ታ ቦላ ዶድንቶካ፥
ታን መና ጎዳን አማነታይ።
ታን መና ጎዳ እትባ ኦቻድ፤
ታን ሄዋ ኮያድ፤
ሄዌነ፥ ታን ታ ደኡዋ ላይ ኡባን፥
መና ጎዳ ጎልያን ደአናዋ፤
ቃይካ ታን መና ጎዳ ሎኦተ በአናዋነ
አ ጎልያን አ ኮያናዋ።
ሄዋ ድራዉ፥ መቱዋ ጋላሳን
እ ታና ባረ ደእያ ሳን ገንና፤
ባረ ዱንካንያን እ ታና ቆስ አሻና።
እ ታና ቃ ሹቻ ቦላን ኤሳና።
ሄ ዎደ ታን ታና ዶዴዳ ታ ሞርከቱዋፐ፥
ግታታደ ቁ ቁ ያጋና።
ታን አ ዱንካንያን ናሸታደ ያርሹዋ ያርሻና።
ታን መና ጎዳዉ ዲጻናነ የጻና።
አቤት መና ጎዳዉ፥ ታን ኔና ጼስያ ዎደ፥
ኔን ታዉ ኮያ፤
ታዉ ቃረታ፤ ታና ስሳ።
ኔን፥ “ታ ስን ኮይተ” ጌዳ ዎደ፥
ታ ዎዛናይ፥ “አቤት መና ጎዳዉ፥ ኤኖ፤
ታን ነ ስን ኮያና” ያጌዳ።
ነ ስን ታፐ ገንፓ።
ታና ማዴዳዎ፥ ታና ነ ቆማ
ሀንቀታደ ጉየ ዛሮፓ።
አቤት ታና አሽያ ጾሳዉ፥
ታና ኦሎፓነ አጎፓ።
ታ አዉነ ታ አታ ታና አግንቶነ
መና ጎዳይ ታና ሺሽ አካና።
አቤት መና ጎዳዉ፥ ነ ኦግያ ታና ታማርሳ፤
ታ ሞርከቱዋ ድራዉ፥ ታና ሱረ ኦግያ ካለ።
ታና ናስያ ዎርዶ ማርካቱ ታ ቦላ ኢታተን ደንዴዳ ድራዉ፥
ታና ታ ሞርከቱዋ አሞ አደ እሞፓ።
መና ጎዳ ኬካተ ታን ፓጻ ደኣደ በአናዋ አማናይ።
መና ጎዳን ሂዶታ ዎ፤
ምናደነ ዎዛናማደ፥ መና ጎዳን ሂዶታ ዎ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.