Dawro Full Bible Ethiopic
ማዝሙርያ 147
ኡባ ዳንዳይያ ጾሳዉ ሺቅያ ጋላታ
መና ጎዳ ጋላትተ! ኑ ጾሳ ሳቢያዌ ሎአ፤
አ ሳቢያዌ ናሸችያባነ በስያዋ።
መና ጎዳይ የሩሳላመ ኦራና፤
እስራኤልያ አሳቱዋፐ በቴዳዋንታካ ሺሻና።
ዎዛናይ መኤዳዋንታ እ ፓ፤
ኡንቱንቱ ማዱካ እ ቃቼ።
እ ጾልንተቱዋ
ኡንቱንቱ ፓይዱዋን ኤሬ፤
ኡንቱንታ ኡባካ ኡንቱንቱ ሱንን ሱንን ጼሴ።
ኑ ጎዳይ ዎልቃማ፤ አ ዎልቃይ ዳራ፤
አ አኬካይ ልክያፐ አያዋ።
መና ጎዳይ ናቀቴዳዋንታ ዘምፕሴ፤
ሽን ኢታቱዋ ቢታን ዱገ ኦሌ።
መና ጎዳዉ ጋላታ የ የጽተ፤
ኑ ጾሳዉ ዲ ዲጽተ።
እ ሳሉዋ ሻርያ ካሜ፤
ሳአዉ እራ ቡክሴ፤
ቄሪ ደረቱዋ ቦላ ማታ ሞክሴ።
መሄቶነ ዋስያ ቁሩዋ ማራቶ፥
ምያዋ እ እሜ።
እ ናሸትያዌ ፓራቱዋ ዎልቃንነ፥
ቶራንቻቱ ምኖተን ግደና።
መና ጎዳይ ባረዉ ያይያዋንቱንነ
አገና አ ሲቁዋን፥
ባረንቱ ህዶታ ዎዳዋንቱን ናሸቴ።
የሩሳላመ ካታማቴ፥ መና ጎዳ ጋላታ!
ጽዮኔ፥ ነ ጾሳ ጋላታ!
አያዉ ጎፐ፥ እ፥
ነ ፐንግያ ኩልባቱዋ ምንሴ፤
ነ ግዶን ደእያ ነ አሳካ አንጄ።
እ ነ ዛዋ ሳሮተን ናጌ፤
ኔና ሎይ ሎእያ ዛርጋ ካልሴ።
እ ባረ ኪታ ሳአዉ ኪቴ፤
አ ቃላይካ ኤለ ጋኬ።
እ ሻቻ ቡሉኩዋዳን ምጬ፤
ከተርሳ ብድንዳን ላሌ።
እ ባረ ዎልቃማ ሻቻ
ሹቻዳን ዱገ ኦሌ።
ሄ ሜጉዋን ኤቃናዉ ኦንነ ዳንዳየና።
እ ባረ ቃላ ኪቲደ፥
ሻቻ ሙሽሴ።
እ ጫርኩዋ ጫርክስና፥ ሃይ ጎጌ።
እ ባረ ቃላ ያቆባ ዘረዉ፥
ባረ አዋዩዋነ ፕርዳ
እስራኤልያ አሳዉ አዋዬ።
እ ሀራ ካዉተ አሳዉ፥
ሀዋ ኦቤና፤
ኡንቱንቱ አ ፕርዳ ኤርክኖ።
መና ጎዳ ጋላትተ!
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.