Dawro Full Bible Ethiopic
ማዝሙርያ 145
ጋላታ ጾሳዉ
ዳውት ጻፌዳ ጋላታ ሳባ
አቤት ታ ጾሳዉ፥ ታ ካትያዉ፥ ታን ኔና ግታያናነ፥
ነ ሱን መ መናዉ ጋላታና።
ታን ኔና ኡባ ጋላስ ሳባና፤
ነ ሱንካ መ መናዉ ጋላታና።
መና ጎዳይ ዎልቃማ፤ ቃ ጋላታይ አዉ በሴ።
አ ግታተይ አሳ ቆፋፐ አ።
እት የለታይ ሀራ የለታዉ
ኔን ኦዳዋ ኦዳና፤
ነ ማላልስያ ኦሶቱዋካ አዋያና።
ኡንቱንቱ ነ ቦንቹዋነ
ነ አንጋ ግታተባ ሃሳያና፤
ታንካ ነ ማላልስያ ኦሱዋ
ዛራ ዛራደ ቆፓና።
አሳይ፥ “ሆላ!” ጊስያ ነ ኦሱዋ ዎልቃባ ሃሳያና፤
ታንካ ነ ግታተ አዋያና።
ኡንቱንቱ ነ ኬካተ ዳሩዋ ኦዳና፤
ነ ጽሎተባካ የጻና።
መና ጎዳይ ቃረትያዋነ ማርያዋ፤
እ ሀንቀታናዉ ኤሌለናዋነ፤
ዳንዳያንቻነ አገና ሲቁ ዳርያዋ።
መና ጎዳይ ኡባዉ ኬካ፤
እ ባረ መዳ ኡባዉ ቃረትያዋ።
አቤት መና ጎዳዉ፥
ነ መታ ኡባይ ኔና ጋላታና፤
ነ አሳቱ ኡባይካ ኔና ሳባና።
ኡንቱንቱ ነ ካዉተ ቦንቹዋባ ሃሳያና፤
ነ ዎልቃባ ኦዳና።
ሄዌነ፥ ነ ዎልቃማ ኦሱዋባነ
ነ ካዉተ ቦንቹዋ አንጋባ
አሳ ኤርሳና።
ነ ካዉተይ መና ካዉተ፤
ነ ማታይ የለታ ኡባ ጋካናሳ።
መና ጎዳይ ባረ ጌዳ ቃላዉ ኡባዉ አማነትያዋ፤
እ ባረ ኦሱዋ ኡባን ቃረትያዋ።
መና ጎዳይ ሆኬዳዋንታ ኡባ ዘምፕሴ፤
ኩንዴዳዋንታ ኡባ ደን።
ኡባ አይፊ ኔኮ ጼሌ፤
ኡንቱንታ ኮሽያ ዎድያን ኔን ኡንቱንቶ ቁማ እማሳ።
ኔን ነ ኩሽያፐ እማ፤
ፓጻ ደእያዋንታ ኡባ አሙዋ አላ።
መና ጎዳይ ባረ ኦግያን ኡባን ጽሉዋ፤
እ ባረ ኦሱዋ ኡባን ቃረትያዋ።
መና ጎዳይ ባረና ጼስያ ኡባዉ፥
ቱሙዋን ባረና ጼስያ ኡባዉ ማታን ደኤ።
እ ባረዉ ያይያዋንቱ ኡባዉ፥
አሙዋ ኩን።
ቃይ እ ኡንቱንቱ ዋሱዋ ስሲደ፥
ኡንቱንታ አሼ።
መና ጎዳይ ባረና ሲቅያዋንታ ኡባ ናጌ፤
ሽን ኢታቱዋ ኡባ ይሳና።
ታን ታ ዶናን መና ጎዳ ጋላታና።
መታ ኡባይ አ ጌሻ ሱን
መ መናዉ ጋላቶ!
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.