Skip to content
BibleKenya

Dawro Full Bible Ethiopic

ሌምሱዋ 19

ዎርዶ ሃሳያ ሃሳይያ ቦዛፐ ባረ ደኡዋን ቶሺ ባይና ህዬሳ አሳይ ኬካ።

ኤር ባይና ሴላይ ሎአ ግደና፤ ሀመቲደ ኤሌልያ ኡራይካ ዎራ ቤ።

እት እት አሳይ ባረ ቦዛተን ባረ ደኡዋ ባይዜ፤ ያቲደ ቃይ መና ጎዳ ቦላ ይሎቴ።

ዱረተይ ዳሮ ላገቱዋ ጉጄ፤ ሽን ህዬሳተይ ደእያ ላገቱዋካ ዱ።

ዎርዶ ማርካይ ሙረተናን ቤና፤ ዎርዱዋ ሃሳይያዋንቱካ ከስ አክክኖ።

ዳሮ አሳይ ሞድያ አሳ ስን ኮዬ፤ ጮ እምያ ኡራና አሳይ ኡባይ ዳቦቴ።

ህዬሳ አሳ አ እሻቱ ኡባይ እጺኖ፤ ሄዋፐካ አዋ አ ላገቱ አፐ ሃኪኖ፤ እ ኡንቱንታ አዉዳሺደ ካልናካ፥ ኡንቱንቱ አ ጋ ኦይክኖ።

አዳ ኤራተ ደምያዌ ባረና ሲቄ፤ አኬካ ካርህ ኦ ኦይቂያዌ ሎኦባ ደሜ።

ዎርዶ ማርካይ ሙረተናን አተና፤ ዎርዱዋ ሃሳይያዌካ ያና።

ቦዛ ኡራዉ እሻሎ ደኡ በሰና፤ ሄዋፐካ አይሊ ካፖቱዋ ሞድያዌ ኢታ ዳሬ።

አዳ ኤራተይ አሳዉ ዳንዳያ እሜ፤ ባይዜዳ ኡራዉ አቶ ግያዌካ ቦንችሴ።

ካትያ ሀንቁ ጋሙዋ ጉዱዋ ማላ፤ ሽን አ ሳባይ ማታ አጭስያ ከተርሳ ማላ።

ቦዛ ናአይ ባረ አዉዋ ይሴ፤ ዋላሳንቻ ማቻታካ ጎሊ ኡባ ገደ ጾክያ ጾኩዋ ማላ።

እት አሳይ ጎልያነ ማጹዋ ባረ አዉዋፐ ላታናዉ ዳንዳዬ፤ ሽን አኬካንቻ ማቻቶ መና ጎዳይ እሜ።

ጮ ዞልፓካትያ ኡራዉ ገምእሹ ዬ፤ ኦሱዋ ኦና አሳይ ኮሻቴ።

አዛዙዋ ናጊደ ኦያ አሳይ፥ ባረ ሸምፑዋ ናጌ፤ ሽን ሸነኮ ግያ አሳይ ሀይቄ።

ህዬሳዉ ኬክያ አሳይ መና ጎዳዉ ታልኤ፤ እ ሄ ሎኦ ኦሱዋ አጩዋ ጭጌ።

ስምያ ህዶታይ ደእሺና፥ ነ ናናቱዋ ሴራ፤ ሴራና ዮፐ፥ ኔን ኡንቱንታ ባይዛዳ።

ሀንቁዋ ሱልያ አሳይ ባረ ጋትያ አኮ፤ አ አጋ፤ ኔን አ አሽያዋ ግዶፐ፥ ሀራቱዋካ ኔን አ ሄዋዳን ኦናዌ አተና።

ዞርያ ስሳ፤ ትምርትያካ አካ። ያቶፐ፥ ኔን ዉርሰን አዳ ኤራንቻ ግዳናሳ።

አሳይ ዳሮባ ሀልቼ፤ ሽን መና ጎዳይ ጌዳዌ ፖለቴ።

አሳፐ ኮየትያዌ አገና ሲቁዋ፤ ዎርዳንቻ ግዳናፐ ህዬሳ ግድያዌ ኬካ።

መና ጎዳዉ ያይያዌ ደኦ ካለ፤ አዉ ያይያ አሳይ ካሊደ ደኤ፤ ኢታባይካ አ ቦቼና።

እት እት አሳይ ዳሮ አዛላ፤ ዎጽያን ቱሼዳ ሶሉዋካ ፑደ ባራናዉ ዋየቴ።

ኔን ቅሊጭያዋ ሾጮፐ፥ አኬካይ ፓጬዳዌ ጭንጫተ ታማራና፤ አኬካንቻ አሳ ኔን ሴሮፐ፥ እ ኤራተ ደማና።

ባረ አዉዋ ቦንቂያ ናአይ፥ ባረ አቶካ ሶፐ ከሲደ የደርስያ ናአይ፥ ሄ ናአይ ዬላነ ካዉሻ አህያ ናኣ።

ታ ናአዉ፥ ኔን ዞርያ ስስያዋ አጌዳዋ ግዶፐ፥ ኤራዉ ዞክያ ዛራዳ።

ዎርዶ ማርካይ ሱረ ፕርዳ ቦላ ቅሊጬ፤ ኢታ አሳ ዶናይ ኢታተ ጉጂደ ምቴ።

ቅሊጭያዋንቶ ፕርዳይ፥ ቦዛቶካ ዋይ ኮሼ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.