ሌምሱዋ 20

1ዳሮ ማይያ ኡሻ ኡሽያዌ ዳሮ ብድሴነ ዋላሴ፤ ማትያ አሳይ ዎዛናይ ፓጬዳ አሳ።

2ካትያ ሀንቁ ጋሙዋ ጉደ ማላ፤ አ ይሎይያ አሳይ ባረ ሸምፑዋ ቦላ ፕርዴ።

3ፓሉምያፐ ጋጻን ደእያዌ አዎ ቦንቾ፤ ሽን ቦዛ አሳይ ኡባይ ዋላቀታናዉ ኤሌሌ።

4አዛላ ጎሻንቻይ ዎድያ ናጊደ ጎሸና፤ ሄዋ ድራዉ፥ ካ ጫክያ ዎደ እ ዎሴ፤ ሽን አያካ ደመና።

5አሳ ዎዛና ሀልቹ ጪሞ ኦላ ግዶን ደእያ ሃ ማላ፤ ሽን ዎዛናማ አሳይ ሄዋ ዱቂደ ከሴ።

6ዳሮ አሳቱ ባረንቱ ኬካተ ኦዲኖ፤ ሽን ቱሙ አማነትያ አሳ ደማናዌ ኦኔ?

7ጽሎ አሳይ ቶሺ ባይና ደኡዋ ደኤ፤ አ ካሊደ፥ አ ናናቱካ አንጀቴዳዋንታ።

8ካቲ ፕርዳናዉ ባረ ካዉተ አራታን ኡቴዳ ዎደ፥ ኢታ ኡባ ባረ አይፍያን ሀርቂደ ከሴ።

9“ታ ዎዛና ጌሻድ፤ ታናን ናጋርካ ባዋ” ያጋናዉ ዳንዳይያ አሳይ ደአኔሻ?

10መና ጎዳይ ዎርዱዋ ሚዛናን ይግያዋንታነ ልከ ግደናባን ማክያዋንታ እጼ።

11ናአይ ጌሻነ ሱረ ግድያዌ እ ኦያ ኦሱዋን ኤረቴ።

12ስስያ ሀይነ ጼልያ አይፍያነ፥ ኡንቱንታ ላኡዋካ መና ጎዳይ መዳ።

13ገምእሹዋን ነ ዎድያ ዉርሶፓ፤ ኔን ህዬሳና። ቤጎታ፤ ያቶፐ፥ ኔን ካ ካላና።

14ሻምያ አሳይ፥ “ቆሄ! ቆሄ!” ያጌ፤ ሽን ቤዳዋፐ ጉይያን፥ “ገሉዋን ሻማድ” ያጊደ ጬቀቴ።

15ኤራይ ኩሜዳ ሃሳያይ ዎርቃፐካ እንቁዋ ግያ ዳሮ አልኦ ሹቻፐካ አዳ አልኦባ።

16ኤረና አሳዉ ዋስያ ገልያ ኡራ ማዩዋ ቃር አክተ፤ እማ አሳዉ ዋስያ ገልያ ኡራ ማዩዋ ኦይቂተ።

17ዎርዱዋን ደሜዳ ካይ አሳ ማልኤ፤ ሽን አቅ ከሲደ፥ ዶና ግዶን ሻፍያዳን ሀኔ።

18ዞርያ አካደ ነ ሀልችያዋ ሀልቻ፤ ዞርያ አከናን ደኣደ ኦላዉ ቦፓ።

19ዝግርያ አሳይ ጹራ ገንና፤ ሄዋ ድራዉ፥ ኦዳንቻ ኡራና ጋከቶፓ።

20አሳይ ባረ አዉዋ ዎይ ባረ አቶ ሸቆፐ፥ አ ደኡዋ ጾምፕያ ጵ ጎ ማን ቶአና።

21ኮይሩዋን ኤለካ ሺቄዳ አቁ ዉርሰን አንጀተና።

22ነዉ ኢታ ኦዳ ኡራዉ፥ “ታንካ አዉ ኢታ ኦና” ጎፓ፤ መና ጎዳን አማነታደ ናጋ፤ እ ኔና አሻና።

23መና ጎዳይ ላኡ ቆሞ ሚዛናቱዋ ሸነቴ፤ ዎርዱዋ ሚዛናቱካ አ ናሸችክኖ።

24አሳይ ባናዉ በስያ ኦግያ መና ጎዳይ ካለ፤ ያትና፥ አሳይ ባረ ደኡዋን ባና ኦግያ ዎቲደ አኬካናዉ ዳንዳዪ?

25እትባ ኤሌሊደ፥ “ሀዋ ታን ጾሳዉ እማድ” ግ ድግያዌነ ጉየፐ ዝንቆትያዌ፥ ሄዌ አሳ ኦይቂያ ጲረ።

26አዳ ኤራንቻ ካቲ ማካላንቻቱዋ ሻኪደ ኤሬ፤ እ ኡንቱንታ ቃረተናን ሙሬ።

27አሳ አያናይ መና ጎዳዉ ጾምፕያ፤ ሄዋ ድራዉ፥ እ ኑ ግዶ አሳተ ኡባ ፕልግ ጼሌ።

28አገና ሲቁነ አማነትያዌ ካትያ ናጊኖ፤ አ ካዉተ አራታይ አገና ሲቁዋን ምኔ።

29ያላጋቱዋ ቦንቹ ኡንቱንቱ ዎልቃ፤ ጭማቶካ ኡንቱንቱ ፑሉንይ ኡንቱንቶ ቦንቹዋ።

30ምኖ ሙሩ ኢታተ ሾዴ፤ ዋያዌ ኢታ ዎዛና ላማናዉ ዳንዳዬ።