Skip to content
BibleKenya

Dawro Full Bible Ethiopic

ኢስያሳ 44

ጾሳይ ጾሳ ጻላላ

መና ጎዳይ ሀዋዳን ያጌ፤ “ታ ቆማዉ ያቆባ፥ ታን ዶሬዳ ይሽሩና፥ ሀእካ ስሳ። ታን ኔና መድ፤ ነ ዳይ ኡሉዋን ኔና ጊግሳድነ ማዳድ። ታ ቆማ ያቆባ፥ ታን ዶሬዳዎ፥ ያዮፓ። ታን ሳመቴዳ ጋድያን ሃ ጉሳና፤ መላ ቢታንካ ፑልቱዋ ጎግሳና። ታን ታ አያና ነ ናናቱ ቦላ፥ ታ አንጁዋካ ነ ዘረቱዋ ቦላ ጉሳና። ሃ ዶናን ሞኬዳ ማታዳን፥ ቃይ ጎግያ ፑልቱዋ ማታን ደእያ ምዳን፥ ኡንቱንቱ ሞካና። እቱ፥ ‘ታን መና ጎዳዋ’ ያጋና፤ ሀራይ ቃይ ባረና ያቆባ ሱንን ጼሳና፤ ሀራይካ፥ ቃይ ባረ ኩሽያ ቦላን፥ ‘ታን መና ጎዳዋ’ ያጊደ ጻፋና፤ እ ቃይ ባረና እስራኤሊ ጼሰትያ ሲቁዋ ሱንን ጼሳና” ያጌ።

መና ጎዳይ፥ እስራኤልያ ካቲ፥ አ ዎዝያዌ፥1 ኡባፐ ዎልቃማ መና ጎዳይ ሀዋዳን ያጌ፤ “ኮይሩ ታና፤ ዉርሰይካ ታና። ታፐ ሀራ ጾሳይ ባዋ። ታ ማላይ ኦኔ? ደኦፐ አነ አዋዮ፤ ቃይ አነ ታ ስንን ኤቂደ ኦዶ። በንፐ ዶሚደ፥ ስንፐ ያናዋ ኦድያዌ ኦኔ? አነ ኡንቱንቱ ስንፐ ትምቢትያ ኑዉ ኦድኖ። ያዮፕተ፤ ቃይ ዳጋሞፕተ። ታን ሀዋ ህንተንቶ በንፐ ዶማደ ኦዳበይክታ? ቃይ አዋያበይክታ? ሄዎ ታዉ ህንተ ማርካ። ታፐ አትና፥ ሀራ ጾሳይ ደኢ? ሀራ ዛል ባዋ፤ ታን ኦናነ ኤርከ” ያጌ።

ኤቃ ጎይኑዋ ቦላ ሃሳየቴዳ ቦረ ሃሳያ

ኤቃ ምስለቱዋ ማሲደ መያ ኡባቱ ሀዳ፤ ኡንቱንቱ አን ናሸትያባቱ ኡንቱንታ ጎእክኖ። ኡንቱንቱ ማርካቱካ በእክኖነ ኤርክኖ። ሄዋ ድራዉ፥ ኡንቱንቱ ዬላታና። ጾሳ ጊግሴዳዌ፥ ዎይ አያዉነ ጎኤና ምስልያ ማሴዳዌ ኦኔ? በእተ፥ አ ላገቱ ኡባይ ዬላታና፤ ኩሽያ ሂላንቻቱ ኡባይ አሳ። አነ ኡንቱንቱ ኡባይካ እትፐ ሺቂደ ኤቂኖ። ኡንቱንቱ ያያና፤ ቃይ ኡንቱንቱ ኡባይካ እትፐ ዬላታና።

ብራታ ቆጽያዌ ባረ ቡክያ ብራታ ታማን ዎ፤ ቦንቄዳዋ ባቻን ቆጺደ፥ ባረ ምኖ ቀስያን አ መታ ጊግሴ። ሄዋ ጊግሲደ ኮሻቴ፤ አ ምኖተይካ ዉሬ። ሃካ ኡሸና፤ ላባኔ።

አናጺ ዎዶሩዋን ልኬ፤ እርሳስያን አ ቦላ ማላታ ዎ፤ ያቲደ ማሎግያን ልልእሴ። ልኪደ፥ ፑላና ደእያ አሳ ምስልያ ማላትስ ጊግሲደ፥ ባረ ሶን ዎ። እ ሄዋ ኦናዉ ዝጋ ቃንጼ፤ ዎይ ዎላ ዎይ ጽድያ ዎራ ግዶፐ ዶሪደ ድጫናዳን ኦ። ዎይ እጾፐ፥ እ ዝጋ ቶክና፥ እራይ አ ድቻናዉ ናጌ። ሄዋፐ ጉይያን፥ እ አሳይ ኤያ ም ግዴ፤ እካ አፐ ባጋ አኪደ፥ ኤደ ሆኤ፤ ቃይ ባጋ ኤደ፥ ኡክ ኡኬ። አፐካ ጾሳ መደ፥ አዉ ጎይኔ፤ ቃይ ምስልያ ማሲደ፥ አ ስንን ጉፋኔ። አፐ ባጋ ታማን ኤደ፥ ቁማ ካ፤ ባጋን አሹዋ ጺጺደ፥ ካሊደ ሜ። ቃይ ታማ ሆእ ስሚደ፥ “ሀሹ፥ ላ ሀዌ አያ ሆኢ!” ያጌ። ቃይ አቴዳ ም ማሲደ፥ ባረዉ ጎይንያ ጾሳ ምስልያ ከሴ። ሄ ምስልያ ስንን ጉፋኒደ፥ አዉ ጎይኔ፤ ያቲደ፥ “ኔን ታ ጾሳ ግዴዳ ድራዉ፥ ታና አሻ” ያጊደ ዎሴ።

ኡንቱንቱ አይነ ኤርክኖ፤ አይነካ አኬክክኖ። አያዉ ጎፐ፥ ኡንቱንቱ በኤና ማላ፥ ኡንቱንቱ አይፊ ጎዘቴዳ፤ ቃይ አኬከና ማላ፥ ኡንቱንቱ ዎዛናይካ ጎርደቴዳ። ኤቃ ኦያ አሳይ ባረ ዎዛናን፥ “አፐ ባጋ ታማን ኤድ፤ አ ቦንቁዋንካ ኡክ ኡካድ፤ አሹዋካ አን ጺጻደ ማድ። ያትና፥ አፐ አቴዳዋ ሸነይያ ኤቃ ኦደ መ? ቃይ ም ሙዶ ጉፋናደ ጎይኖ?” ያግያ ኤር ዎይ አኬክ ኦስነ ባዋ። እ ብድን ሜ፤ አ ጭመቴዳ ዎዛናይ አ ዎራ ካለዳ። እ ባረ ሸምፑዋ አሻናዉ ዎይ፥ “ታ ኡሸቻ ኩሽያን ደእያዌ ዎርዱዋ ግደኔ?” ጋናዉ ዳንዳየና።

ጾሳይ መዳዋነ አሽያዋ

ጾሳይ ሀዋዳን ያጌ፤ “ያቆባ፥ ነኖ እስራኤልያዉ፥ ኔን ታ ቆማ ግድያ ድራዉ፥ ሀ የዎቱዋ ሀሳያ። ታን ኔና ጊግሳድ፤ ኔን ታ ቆማ። ኔኖ እስራኤልያዉ፥ ታን ኔና ዶግከ። ታን ነ ባይዙዋ ሻርያዳን፥ ነ ናጋራካ ጫጋናዳን ቁጫድ። ታን ኔና ዎዜዳ ድራዉ፥ ታኮ ስማ” ያጌ።

ህንተኖ ሳሎቶ፥ መና ጎዳይ ሀዋ ኦዳ ድራዉ፥ ናሸቻን የጽተ። ህንተኖ ቢታ ጪማቶ፥ እልልተ። ህንተኖ ደረቶ፥ ዎራዉነ አ ግዶን ደእያ ም ኡባዉ፥ ማዝሙርያ ክንችተ። አያዉ ጎፐ፥ መና ጎዳይ ያቆባ ዎዜዳ፤ ቃይ እስራኤልያ ግዶንካ እ ቦንቼታና።

ኔና ዎዝያዌ፥ ዳይ ኡሉዋን ኔና መዳዌ መና ጎዳይ ሀዋዳን ያጌ፤ “ታን መና ጎዳ፥ ኡባ የዎቱዋ መዳዋ፤ ሳሎቱዋ ታረካ ምጬዳዌ፤ ሳኣካ ታረካ ምጬዳዌ ታና። ታን ዎርዱዋ ትምቢትያ ኦድያዋንቱ ማላታ ሀዳ ኦይ፤2 ቃይ ሻሬቾቱዋካ ኤያ ከሳይ። ታን አዳ ኤራንቻቱዋ ጉየ ዛራይ፤ ኡንቱንቱ ኤራካ ኤያ ኦይ። ታን ታ ቆማ ቃላ ምንይ፤ ታ ኪቴዳዋንቱ ሀናና ጌዳዋካ ፖላይ። ታን የሩሳላመ ካታማ፥ ‘ኔን አሳይ ደኢያሳ ግዳና’ ያጋይ፤ ይሁዳ ካታማቱዋካ፥ ‘ህንተ ስሚደ ኬጸታና፤ ህንተ ግምቢያካ ኦራጽሳና’ ያጋይ። ታን ሃ ጪማቱዋካ፥ ‘መልተ! ህንተ ጎግያ ሃቱዋካ መልሳና’ ያጋይ። ቃይ ቂሮሳ፥ ‘ኔን ታ አሳ ሄምያዋ፤3 ኔን የሩሳላመ ካታማ፥ “ነ ስማደ ኬጸታና” ያጋደ፥ ጌሻ ጎልያካ፥ “ነ ባሱ ባሰታና” ያጋደ ታ ሀልቹዋ ፖልያዋ’ ያጋይ” ያጌ።

Source notes (3)
  1. Cross-reference ኢሳ. 48:12፤ ሳፃ 1:17፤ 22:13
  2. Cross-reference 1 ቆሮ. 1:20
  3. Cross-reference 2 ኦዱዋ 36:23፤ እዝራ 1:2

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.