Dawro Full Bible Ethiopic
ኢስያሳ 43
ጾሳይ ባረ አሳ አሻና ጌዳ
ሽን ነኖ ያቆባ ኔና መዳዎ፥ ነኖ እስራኤልያዉ፥ ኔና ጊግሴዳ መና ጎዳይ ሀዋዳን ያጌ፤ “ታን ኔና ዎዜዳ ድራዉ ያዮፓ። ታን ኔና ነ ሱንን ጼሳድ፤ ኔን ታዋ። ኔን ሃ ግዱዋና ፕንያ ዎደ፥ ታን ኔናና ግዳና። ኔን ሻፋቱዋ ግዱዋና ፕንያ ዎደካ ኡንቱንቱ ኔና ሙክክኖ። ኔን ታማ ግዶና አያ ዎደ፥ ጹገታካ፤ ላጩካ ኔና ሜና። አያዉ ጎፐ፥ ታን ኔና አሽያ እስራኤልያ ጌሻ፥ መና ጎዳ ነ ጾሳ። ታን ግብጼ ነዉ ዎዞ ኦደ፥ ቶጵያነ ሳባ ነ ላምያ ኦደ እማና። ኔን ታ ስንን አልአነ ቦንቾ ግድያ ድራዉነ፥ ታንካ ኔና ሲቅያ ድራዉ፥ ነ ላምያዉ አሳ፥ ነ ሸምፑዋ ላምያዉካ ካዉተቱዋ እማና።
“ታን ኔናና ደእያ ድራዉ ያዮፓ፤ ታን ነ ዘረቱዋ ዉላሃፐነ ዶላሃፐ ሺሻደ አሀና። ታን ሁጲሳ ባጋ፥ ‘ኡንቱንታ ዛራደ አሀ!’ ያጋና። ገድሳ ባጋካ፥ ‘ኡንቱንታ ተኦፓ’ ያጋና። ታ አቱማ ናናቱዋ ሃኩዋፐ፥ ታ ማጫ ናናቱዋካ ሳኣ ጋጻፐ አሀና፤ ታ ሱንን ጼገቴዳ ኡባቱዋ፥ ታን ታ ቦንቾ መዳዋንታ፥ ታን ጊግሴዳዋንታነ ኦዳዋንታ ሀምተ” ያጋና።
እስራኤሊ ጾሳ ማርካ
አይፊ ደእሽን ቆቄዳ አሳቱዋ፥ ሀይይካ ደእሽን ቱሌዳዋንታ ከሳ፤ ካዉተቱ ኡባይ እትፐ ሺቅኖ፤ አሳይካ ሺቁዋ ኡቶ። ኡንቱንቱ ግዶፐ ሀዋ ኦዳናዉነ ካሰ አዳ የዎቱዋ ኑና በሳናዉ ዳንዳይያዌ ኦኔ? ሀራ አሳይካ ስሲደ፥ “ሀዌ ቱማ” ያጋና ማላ፥ ኡንቱንቱ ልከ ግድያዋ በሳናዉ ባረንቱ ማርካቱዋ አይኖ።
መና ጎዳይ ሀዋዳን ያጌ፤ “ህንተ ታ ማርካቱዋ፤ ህንተ ታና ኤራና ማላነ አማናና ማላ፥ ቃይ ታን ጾሳ ግድያዋ አኬካና ማላ፥ ታን ዶሬዳ ታ ቆማቱ ህንተና። ታፐ ካሰ ሀራ ጾስ መትቤና፤ ዎይ ታፐ ጉይያንካ ሀራ ጾስ ደኤና።
“ታናቴ፤ ታን መና ጎዳ። ታፐ አትና፥ ሀራ አሽያዌ ባዋ። ታን ኦዳድ፥ አሻድነ አዋያድ። ህንተ ግዶን ሀራ አላጋ ጾስ ደእቤና። ታን መና ጎዳ ግድያዎ ታዉ ህንተ ማርካቱዋ። ታን ጾሳ፤ ጻጱዋፐ ዶማደካ ታን ታናቴ። ታ ኩሽያፐ ኦንነ አሸና፤ ታን ኦዳዋ ላማናዉ ዳንዳይያዌ ባዋ” ያጌ።
መና ጎዳ ማሮታነ አማነተና እስራኤልያ
መና ጎዳይ፥ ህንተና ዎዝያዌ፥ እስራኤልያ ጌሻይ ሀዋዳን ያጌ፤ “ህንተ ድራዉ፥ ባብሎነ ቦላ ኦላንቻቱዋ ኪታደ ባብሎናቱዋ ኡንቱንቱ ጬቀትያ ማርካብያና በትሳና። ታን መና ጎዳ፥ ህንተ ጌሻ፥ እስራኤልያ መዳዋ፥ ህንተ ካትያ” ያጌ።
መና ጎዳይ ሀዋዳን ያጌ፥ አባ ግዶን ኦግያ፥ ዎልቃማ ሃቱዋ ግዶፐካ ሎሱዋ ከሲደ፥ ፓራ ጋረቱዋነ ፓራቱዋ፥ ኦላንቻቱዋነ ምኖ አሳቱዋ አባዉ አሂደ፥ ኡንቱንቱ ደንደናዳን ዛቁልሴዳ መና ጎዳይ፥ ቃይ ኡንቱንቱ ሙቃዳ ላጩዋዳን ቶይሴዳ ያጌ “ካሰ የዎቱዋ ሃሳዮፕተ፤ በንዋካ ቆፖፕተ። በእተ፥ ሀእ ታን ኦራባ ኦይ፤ እካ ሀእ ሞኬ። ህንተ ሄዋ ኤርክቴየ? ታን ባዙዋን ኦግያ፥ መላ ቢታንካ ሻፋቱዋ ከሳና። ዎራ ዶአቱ፥ ዎራካናቱነ ሳጎናቱ ታና ቦንቻና። አያዉ ጎፐ፥ ታ ጋላታ አዋያና ማላ፥ ታ ጊግሴዳነ ዶሬዳ ታ አሳዉ ታን ባዙዋን ሃ፥ መላ ቢታንካ ሻፋቱዋ እማይ።
“ሽን ነኖ ያቆባ፥ ኔን ታ ሱን ጼሳባካ፤ ነኖ እስራኤልያዉ፥ ኔንካ ታና ሳለታዳ። ኔን ታዉ ጹግያ ያርሾ ዶርሳ አሀባካ፤ ዎይ ሀራ ያርሾቱዋንካ ታና ቦንቻበይካ። ታን ኔና ካ ያርሹዋ እማ ጋደ ዋይሳበይከ፤ ዎይ ቃይ እጻና እማ ጋደ ዳቡርሳበይከ። ኔን ታዉ እጻና ሻሉዋን ሻማባካ፤ ዎይ ነ መህያ ያርሹዋ ሞዋን ታና ካልሳባካ። ሽን ኔን ነ ናጋራን ታና ዋይሳዳ፤ ነ ናቁዋንካ ታና ዳቡርሳዳ።
“ታና፥ ነ ባይዙዋ ታ ድራዉ ጋደ ቁጭያዌ ታናቴ፤ ነ ናጋራካ ዛረደ ሃሳይከ። ታና ሀሳይሳ፤ አነ እትፐ ሀ የዉዋ ሞተቶይተ። ኔን ጽሉዋ ግድያዋ በአናዉ አነ ነ የዉዋ ብዳ። ነ ኮይሮ አዉ ናጋራ ኦዳ፤ ኔና ታማርስያዋንቱካ ታና ናቄድኖ። ሄዋ ድራዉ፥ ታን ጌሻ ማቅዳስያ ካፓቱዋ ቱንሳድ፤ ያቆባ ባሻዉ፥ እስራኤልያካ ሸቃዉ አደ እማድ” ያጌ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.