တမန်တော် 1:8

11

ချစ်သော သော်ဖိလု၊

ယေရှုဟ သူ့ရဲ့ အမှုတော် ဆောင်ရွက်ခြင်းနဲ့ သွန်သင်ခြင်းလို့ဟို အစပြုချိန်မှ စယွေ့၊

2ရွေးကောက်သော တမန်တော်များဟို သန့်ဆှင်းသော ဝိညာဉ်တော်အားဖြင့် မိန့်မှာပင်းနောက် ခေါန်းခင်ဟို ဆောင်ယူခြင်းခံသော နေ့တိုင်အောန် ဖြစ်ပျက်သမျှလို့ဟို ပထမစာစောင်နှိုက် ငါရေးသား ဖော်ပြခဲ့အယ်။ 3ကိုယ်တော်ဟ ဒုက္ခဝေဒနာ ခံစားပင်းနောက် မိမိအသက်ဆှင်လျက် ဆိကျောန်း အေးတမန်တော်လို့အား ရမ်းဆာ့ အထောက်အထားလို့ဖြင့် ပြသကာ ရက်ပေါင်းလေးဆယ်အတွင်း သူလို့ဆေ ထင်ဆှားယွေ့ ဘုရားသခင်ရဲ့ နိုင်ငံတော်အကျောန်းဟို ဟောပြောအယ်။ 42အဲပင်းရင် သူလို့ဟ အတူတကွ လာကြသောအခါ3 ကိုယ်တော်ဟ သူလို့ဟို “ယေရုရှလင်မြို့မှ မထွက်ခွာကြဘဲ ငါပြောလဲ့ ဆုကျေးဇူးအကျောန်းဖြစ်သော ငါ့အဖ ကတိထားလဲ့ ဆုကျေးဇူးအတွက် စောင့်မျော်နေကြလော့။ 54အကျောန်းမှာ ယောဟန်ဟ ယေနဲ့ နှစ်ခြင်းဟို ပေးပေမဲ့ နင်လို့ဟ ရက်အနည်းငယ်အတွင်းနှိုက် သန့်ဆှင်းသော ဝိညာဉ်တော်ဖြင့် နှစ်ခြင်းဟို ခံယူကြရလိမ့်မယ်” ဟု မိန့်အယ်။

ယေရှု ခေါန်းခင်ဘုံဟို ဆောင်ယူ ခံခြင်း

(မဿဲ ၁၆.၁၉–၂၀; လုကာ ၂၄.၅၀–၅၃)

6အဲပင်းရင် တမန်တော်လို့ဟ ယေရှုနဲ့ တွေ့ရန် စုဝေးလာကြသောအခါ သူလို့ဟ “အဆှင်၊ ဟေအချိန်ဟ ဣသရေလ အမျိုးသားလို့အတွက် နိုင်ငံဟို ပြန်လည်ထူထောင် ပေးမယ်လော” ဟု မေးဆှောက်ကြအယ်။

7ယေရှုဟ သူလို့အား “ငါ့အဖရဲ့ ကိုယ်ပိုင် အခွင့်အာဏာအားဖြင့် စီရင်ပြဋ္ဌာန်းထားလဲ့ အချိန်အခါဟို နင်လို့ သိပိုင်ခွင့် ဆိဝူး။ 85အဲလိုလဲ နင်လို့ အပေါ်ဟို သန့်ဆှင်းသော ဝိညာဉ်တော် ဆင်းသက်သောအခါ နင်လို့ဟ တန်ခိုးနဲ့ ပြေ့လိမ့်မယ်၊ နင်လို့ဟ ယေရုရှလင်မြို့၊ ယုဒပြေတပြေလုံးနဲ့ ရှမာရိပြေမှ စယွေ့ ကမ္ဘာမြေကြီး အဆုံးတိုင်အောန် ငါရဲ့ အကျောန်းဟို သက်သေခံသူများ ဖြစ်ကြလိမ့်မယ်” ဟု မိန့်အယ်။ 96အေးအရာများဟို ပြောပင်းရင်၊ သူလို့ ကျေ့လျက်နေခါ ကိုယ်တော်ဟ ခေါန်းခင်ဘုံဟို ဆောင်ယူခြင်းဟို ခံအယ်၊ အဲပင်းရင် မိုးချေးသားဟ ကိုယ်တော်ဟို ဖုံးကွယ်ပင်း သူလို့မြင်ကွင်းမှ ဆောင်ယူသွားလေအယ်။

10ဟေလို့ ကိုယ်တော် တက်ကြွစဉ် တမန်တော်လို့ဟ မိုးခေါန်းခင်ဟို အာရုံစိုက်ယွေ့ ကျေ့နေကြရာ၊ အချိန်မှာ အဝတ် အဖြူဝတ်ထားသော လူနေယောက်ဟ ခုတုံး သူလို့ဖေးနားတွင် ရပ်နေကြအယ်၊ 11“ဂါလိလဲပြေသားလို့၊ နင်လို့ဟ ပစာကျောန့် ရပ်ယွေ့ မိုးခေါန်းခင်ဟို မော်ကျေ့နေကြလုန်း၊ နင်လို့ဆေမှ ခေါန်းခင်ဘုံဟို ယူဆောင်ခြင်းဟို ခံသော အေးယေရှုဟ ပစာသို့ ခေါန်းခင်ဘုံဟို တက်ကြွတာဟို နင်လို့ မျော်ရကြအယ်၊ ဟေနည်းအတိုင်းပင် ပြန်လည် ကြွလာလိမ့်မယ်” ဟု ဆိုကြအယ်။

ယုဒရဲ့ နေရာဟို ဆက်ခံသူ

(မဿဲ ၂၇.၃–၁၀)

12အေးနောက် တမန်တော်များဟ သံလွင် နာမယ်တွင်သော တောင်မှ ယေရုရှလင်မြို့ဟို ပြန်ကြအယ်၊ အေးတောင်ဟ မြို့နဲ့ မိုင်ဝက်ခန့်လောက် ဝေးအယ်။ 137သူလို့ဟ မြို့ထဲဟို ဝင်ယွေ့ မိမိလို့ တည်းခိုရာနေအိုင် အပေါ်ထပ် အခန်းဟို တက်သွားကြအယ်။ အဲသူလို့ဟ ပေတရု၊ ယောဟန်၊ ယာကုပ်နဲ့ အိန္ဒြေ၊ ဖိလိပ္ပုနဲ့ သောမ၊ ဗာသောလမဲနဲ့ မဿဲ၊ အာလဖဲ သား ယာကုပ်၊ မျိုးချစ်စိတ်ထက်သန်သူ ရှိမုန်နဲ့ ယာကုပ်ရဲ့ သား ယုဒလို့ ဖြစ်အယ်။ 14သူလို့ဟ ယေရှုနဲ့ အမေ့ဖြစ်သူ မာရိ အပါအဝင် အမျိုးသမီးလို့နဲ့ လည်းကောင်း၊ ကိုယ်တော်ရဲ့ ညီတော်လို့နဲ့ လည်းကောင်း မကြာခဏ တွေ့ဆုံယွေ့ ဆုတောင်းလျက် နေကြအယ်။

15ရက်အနည်းငယ် ကြာသောအခါ အရေအတွက်အားဖြင့် လူ တရာ့နေဆယ်ခန့်သော ယုံကြည်သူများလို့ဟ တနေရာတည်းတွင် စုဝေးကြရာ ပေတရုဟ စကားပြောရန် ထယွေ့၊ 16သူဟ “ငါ့ရဲ့ မိတ်ဆွေလို့၊ ယေရှုဟို ဖမ်းဆီးသူလို့ရဲ့ လမ်းပြဖြစ်သူ ယုဒရှကာရုတ်ဟို ရည်မှတ်ယွေ့ သန့်ဆှင်းသော ဝိညာဉ်တော်ဟ ဒါဝိဒ်မင်း စလောင်အားဖြင့် ကြိုတင်ဟောပြောထားသော ကျမ်းချက်ဟ ပြေ့စုံလာစေရန် ဖြစ်အယ်။ 17ယုဒဟ ငါလို့ အဖွဲ့ထဲဟ အဖွဲ့ဝင်တယောက် ဖြစ်ပင်း ငါလို့ အလုပ်ထဲရဲ့ တထောင့်တနေရာမှာ ရွေးချယ်ခံရသော သူတယောက် ဖြစ်အယ်” ဟု ပြောအယ်။ 188

သူဟ မိမိဆိုးညစ်မှုကျောန့် ရဆိလဲ့ ပိတ်ဆန်ဖြင့် လယ်တကွက်ဟို ဝယ်ပင်းနောက် အဲလယ်မြေပေါ်တွင် လဲကျသေဆုံးလေအယ်၊ သူ့ရဲ့ ဖိုက်ဟ ပေါက်ယွေ့ အူများ ထွက်လာအယ်။ 19ယေရုရှလင်မြို့နှိုက် နေထိန်သော လူအားလုံးလို့ဟ ဟေအဖြစ်အပျက်အကျောန်းဟို ကြားသိကြအယ်၊ အေးလို့ဖြစ်ယွေ့ အဲလယ်ဟို မိမိလို့ ဘာသာစကားဖြင့် “အကေလဒမ” ဟု ခေါ်ဆိုကြအယ်၊ အနက်အဓိပ္ပာယ်ဟ “သွေးလယ်မြေ” ဟု ဆိုလိုအယ်။

20“အကျောန်းမှာ ဆာလံ ပအုပ်နှိုက်၊

“ ‘သူ့ရဲ့ နေအိုင် လူသူဆိတ်ညံရာ ဖြစ်စေမန့်၊

အဲအိုင်တွင် စသူမှ မနေပါစေနဲ့။’

‘အဲသူရဲ့ ရာထူးဟိုလည်း အခြားသူတဦး ယူပါစေ’

ဟူယွေ့ ရေးသားထားအယ်။ 219

“အဲလိုမို့ သခင် ယေရှု ဆှင်ပြန်ထမြောက်စေကျောန်းဟို ငါလို့နဲ့အတူ သက်သေခံရန်အတွက် လူတယောက်ဟို ရွေးချယ်ရမယ်၊ 22ယောဟန်ဟ သူ့ရဲ့ နှစ်ခြင်းအကျောန်း ဟောပြော10 လဲ့ အချိန်မှ စယွေ့ ခေါန်းခင်ဘုံသို့ ဆောင်ယူခြင်းဟို ခံချိန်ထိ ငါလို့နဲ့အတူ သွားလာနေထိန်ခဲ့သူ တဦးဟ ကိုယ်တော်ရဲ့ ဆှင်ပြန်ထမြောက်ခြင်းအကျောန်း ငါလို့နဲ့အတူ သက်သေခံသူ ဖြစ်ရမယ်” ဟု ဆိုအယ်။

23အဲလိုမို့ သူလို့ဟ ဗာရှဗ ခေါ် ယုတ္တုနာမယ်သစ်ဟို ရသောသူ ယောသပ်နဲ့ မဿိလို့ လူနေယောက်ဟို ရွေးကောက်ရန် အဆိုပြုကြအယ်။ 24အေးနောက် သူလို့ဟ “အဆှင်၊ ကိုယ်တော်ဟ လူတိုင်းရဲ့ အတွေးများဟို သိသောကျောန့်၊ 25ယုဒဟ မိမိနေရာဟို သွားရန် တမန်တော် အရိုက်အရာမှ ရွေ့လျော့ဖောက်ပြန်တာ ဖြစ်ယွေ့ ဟေအမှုတော်လုပ်ငန်းနဲ့ တမန်တော် အရိုက်အရာဟို ဆက်ခံရန် ဟေသူ နေယောက်အနက် စသူဟို ကိုယ်တော် ရွေးချယ်ထားတာဟို ငါလို့အား ဖော်ပြမန့်” ဟု ဆုတောင်းကြအယ်။ 26အဲပင်းရင် သူလို့နေဦးအတွက် စာရေးတံ မဲနှိုက်ကြရာ မဿိ ရဆိသဖြင့် သူ့အား တမန်တော် တဆယ့်တပါးလို့နဲ့အတူ တမန်တော် ဖြစ်စေရန် အဖွဲ့ထဲဟို ထည့်ဖို့ ရွေးကောက်ခန့်ထားကြအယ်။