La Amɛ 143

Sɔlemi ngɛ haomi mi

1Oo Tsaatsɛ Mawu, moo bu ye sɔlemi ɔ tue; mo ha ye kue fami ɔ heto, ejakaa anɔkualetsɛ kɛ dalɔ ji mo. 2Mo ko kojo mi o tsɔlɔ ɔ, ejakaa nɔmlɔ ko be nɛ hi kɛ pi si ngɛ o hɛ mi.

3Ye he nyɛlɔ ɔ fie mi nɛ e fia mi nɔ kɛ fɔ si; e ha nɛ i tlɔ diblii mi kaa ni nɛmɛ nɛ ngɛ gbogboe muɔ mi ɔ. 4Lɔ ɔ he je ɔ, ye hɛ nɔ kami ngɛ tae, nɛ gbeye nu mi.

5I kai nyakpɛ anunyami ni tsumihi nɛ o tsu ngɛ blema be ɔmɛ a mi ɔ. 6I wo ye nine nɔ kɛ ngɛ kue fae ha mo; o he kuma ngɛ mi yee kaa bɔ nɛ nyu he hiaa zugba gbigbli ɔ. 7Tsaatsɛ Mawu, mo ha mi heto mla, ejakaa ye mumi nya ngɛ tae. Mo ko wo o hɛ mi kɛ laa mi nɛ ma gbo. 8Mo ha nɛ ma na o suɔmi ɔ mɔtu mi; ejakaa o nɔ nɛ i wo ye hɛ kɛ fɔ. Anɔkuale sɔlemi nɛ i ngɛ sɔlee ɔ nɛ, lɔ ɔ he je ɔ, moo tsɔɔ mi he nɛ ma gu. 9Oo Tsaatsɛ Mawu, i tu fo kɛ ba sa we ngɛ o ngɔ; mo kpɔ mi kɛ je ye he nyɛli ɔmɛ a dɛ mi. 10Moo ye kɛ bua mi nɛ ma pee o suɔmi nya ni, ejakaa mo ji ye Mawu. Mo ha nɛ o mumi kpakpa a nɛ kpaka mi kɛ gu blɔ nɛ hi nɔ.

11Neneene Tsɛ, ke o kpɔ mi ɔ, e ma ha nɛ o biɛ ɔ hɛ mi maa ba nyami. Mo je mi kɛ je haomi nɛ ɔ tsuo mi, ejakaa o yeɔ o si womi nɔ. 12Nɛ ngɛ suɔmi kɛ mɔbɔ nami nɛ o ngɛ kɛ ha mi he je ɔ, moo gbe ye he nyɛli ɔmɛ, nɛ o kpata ni nɛmɛ nɛ ngɛ mi awi yee ɔ a hɛ mi, ejakaa o tsɔlɔ ji mi.