La Amɛ 144

Kunimi yemi he si nami

1A je Tsaatsɛ Mawu yi, lɛ ji ye tɛ sa. E woɔ mi he wami nɛ e tsɔɔ mi ta hwumi. 2E mi mi jɔ kɛ ha mi nɛ e suɔ mi be fɛɛ be. Lɛ ji ye laami he, ye he wami, ye yi wami nami kɛ ye kpɔlɔ. Lɛ ji ye he pulelɔ; e ngɔɔ ma amɛ kɛ woɔ ye sisi.

3Neneene Tsɛ, mɛni ji nɔmlɔ adesa nɛ o susuu e he, aloo nɔmlɔ bi nɛ o buu e he akɔtaa? 4Nɔmlɔ ngɛ kaa kɔɔhiɔ; e ligbi ɔmɛ ngɛ kaa nini nɛ bee.

5Oo Tsaatsɛ Mawu, moo je o hiɔwe ɔ nɛ o kple si! Moo ta yoku ɔmɛ a he nɛ a maa je la su ku! 6Mo ha nɛ oslabai, nɛ pa la nɛ o gbɛ mɛ ngɔ fia; mo tsiɛ o kɛ̃ɛ̃ ɔ nɛ o kpata a hɛ mi.

7Moo bɔle o nine kɛ je hiɔwe nɛ o kpɔ mi; mo je mi kɛ je nyu nɛ mi kuɔ nɛ ɔ mi, nɛ o he mi kɛ je ye he nyɛli ɔmɛ a dɛ mi. 8A nya mi hyi tɔ kɛ lakpa, nɛ a kaa kita, be mi nɛ a ngɛ lakpa yee.

9Oo Neneene Tsɛ, i ma la la he kɛ kpa nyɔngma saku kɛ je o yi. 10Mo nɛ o haa matsɛmɛ yeɔ kunimi; nɛ mo ji nɔ nɛ ma je o tsɔlɔ David kɛ je awi yemi ha a nya. 11Mo he ye yi wami! Mo kpɔ mi kɛ je he nyɛli, lakpa yeli kɛ awi yeli nɛ ɔmɛ a dɛ mi.

12Mo ha nɛ wa binyumuwi ɔmɛ a wa nɛ nihe nɛ pue a nɔ, nɛ a pee kaa tsohi nɛ a du nɛ a ngɛ wae, kɛ wa biyiwi ɔmɛ hu a hɛ mi nɛ hi anunyami nɛ a he nɛ pee fɛu kaa pilahi ngɛ matsɛ we ɔ kɔ nyahi. 13Mo ha nɛ wa niye ni gba amɛ a hyi fuu kɛ ngmɔ ni slɔɔtohi. Wa to ɔmɛ a fɔ nɛ a ku kɛ bɔ he akpeakpe abɔ ngɛ wa nga amɛ a nɔ. 14Mo ha nɛ wa na amɛ a he nɛ wa kɛ ha ni tsumi. Mo ko ha nɛ he nyɛli a ba tua wɔ, se mohu tue mi jɔmi nɛ hi he fɛɛ he. Nɛ o ko ha nɛ awi yemi nɔ ko nɛ ba ngɛ wa gbɛjegbɛ ɔmɛ a nɔ. 15Nihi tsuo nɛ ma na jɔɔmi nɛ ɔmɛ ɔ, a bua maa jɔ a he. A gbaa nɔ fɛɛ nɔ nɛ Yehowa ji e Mawu.