La Amɛ 142

Yemi kɛ buami he sɔlemi

1I wo ye gbi nɔ kɛ tsɛ Tsaatsɛ Mawu ke e ye kɛ bua mi. I kpa ngmlaa kɛ kpa Tsaatsɛ Mawu pɛɛ. 2I jaje ye sane ɔ ngɛ e hɛ mi, nɛ i bɔ lɛ ye haomi ɔmɛ tsuo. 3Ke ye susuma hao ngɛ ye mi ɔ, mo pɛ nɛ o le. Ye he nyɛli ɔmɛ tsɔ̃ mi klama ngɛ ye blɔ mi. 4I hyɛ ye hiɔ mi, se nɔ ko be nɛ maa ye kɛ bua mi, nɔ ko be nɛ ma fã ye he. Nɛ nɔ ko be nɛ ye nɔ peeɔ lɛ kɔmɔ. 5Kɛkɛ nɛ i sɔle kɛ ha Yehowa nɛ i de ke, “Tsaatsɛ Mawu, mo pɛ ji ye wesa he. Mo pɛ nɛ o ma nyɛ ye yi maa baa.

6Moo bu ye kue fami ɔ tue, ejakaa ye hɛ nɔ kami ta kulaa. Mo kpɔ mi kɛ je ye he nyɛli ɔmɛ a dɛ mi, ejakaa a he wa pe mi. 7Mo je mi kɛ je haomi ɔ mi, konɛ ma na mo si. Dali ɔmɛ tsuo kɛ mi ma nya ngɛ o yemi ke buami ɔ he.”