Mateo 2

Yesu fɔmi he sane

1A fɔ Yesu ngɛ Yudea ma ko nɛ a tsɛɛ ke Betlehem ɔ mi. Matsɛ Herode nɛ ngɛ matsɛ yee jamɛ a be ɔ mi. A fɔ Yesu bɔɔ pɛ nɛ ni leli etɛ komɛ je pu gbami he kɛ ba Yerusalem nɛ a ba bi ke, 2“Jije Yuda bi ɔmɛ a matsɛ ɔ nɛ a fɔ ɔ ngɛ? Wa na e dodoe ngɛ puje he lokoo nɛ wa ba nɛ wa ba ja lɛ.”

3Sane nɛ ɔ hao Matsɛ Herode saminya, nɛ munyu ɔ gbɛ kɛ fia Yerusalem he tsuaa he.

4Enɛ ɔ he je ɔ, Matsɛ Herode tsɛ Yudea osɔfo nikɔtɔma amɛ kpe nɛ e bi mɛ he nɛ gbali ɔmɛ tsɔɔ kaa a ma fɔ Yiwamihelɔ ɔ ngɛ ɔ.

5A ha lɛ heto ke, “Ngɛ Betlehem, ejakaa bɔ nɛ Gbalɔ Mika ngma ji,

6‘Mo Betlehem,

mo ji kɔpe nɛ klee we pe kulaa ngɛ Yudea zugba a nɔ,

se o mi nɛ matsɛ

nɛ ma kpaka ye ma Israel ɔ maa je.’ ”

7Kɛkɛ nɛ Herode tsɔ ya tsɛ ni leli ɔmɛ zaa ke a ba na lɛ. Benɛ e kɛ mɛ kpe ɔ, e bi mɛ he tutuutu nɛ a na dodoe ɔ ngɛ. Jehanɛ ɔ, e de mɛ ke,

8“Nyɛ ya hla bimwɔyo ɔ ngɛ Betlehem, nɛ ke nyɛ na lɛ ɔ, nyɛ ba de mi konɛ ami hu ma ya ja lɛ.”

9Benɛ Herode kɛ ni leli ɔmɛ ye sɛ nɛ a pue blɔ ɔ, hlami dodoe ɔ je e he kpo ekohu nɛ e nyɛɛ a hɛ mi hluu kɛ ya si e ya da si ngɛ Betlehem he nɛ a fɔ bimwɔyo ɔ ngɛ ɔ tutuutu. 10Ni leli ɔmɛ a bua jɔ a he saminya!

11Benɛ a ya sɛ we ɔ mi he nɛ bimwɔyo ɔ kɛ e nyɛ Maria ngɛ ɔ, a kpla si nɛ a ja lɛ, nɛ a ke lɛ sika tsu kɛ la su ku womi tsopa kɛ nu je via. 12Ni leli ɔmɛ gu blɔ kpa kɛ ho a je he ya. A ya gui Yerusalem nɛ a bɔ Matsɛ Herode amaniɛ, ejakaa Mawu de mɛ ngɛ nlami mi ke a ko ya gu Herode ngɔ hu.

13Benɛ ni leli ɔmɛ je se ɔ, Mawu bɔfo ko ba je e he kpo kɛ tsɔɔ Yosef ngɛ nlami mi nɛ e de lɛ ke, “Matsɛ Herode ngɛ bimwɔyo ɔ hlae nɛ e gbe. Enɛ ɔ he je ɔ, moo te si nɛ o wo bimwɔyo ɔ kɛ ho Mizraim ya mla, nɛ nyɛ ya hi lejɛ ɔ kɛ ya si be nɛ i ma de nyɛ ekohu ke nyɛɛ kpale kɛ ba Betlehem.” 14Yosef ye bɔfo ɔ gbi ɔ nɔ nɛ e wo Maria kɛ bimwɔyo ɔ kɛ si Betlehem jamɛ a ligbi ɔ gbɔkuɛ ɔ nɔuu, 15nɛ a ya hi Mizraim kɛ ya si be nɛ a nu kaa Matsɛ Herode si je mi. Munyu nɛ ɔ ba mi kaa bɔ nɛ Gbalɔ Hosea gba ngɔ fɔ si ke, “I tsɛ ye bi ɔ kɛ je Mizraim” ɔ.

16E dɔ Matsɛ Herode wawɛɛ kaa ni leli ɔmɛ ba gui e ngɔ nɛ a ba bɔ lɛ amaniɛ. Kɛkɛ nɛ e tsɔ sojahi kɛ ho ke a ya gbe binyumuwi nɛ ye kɛ je ligbi kake kɛ ya si jeha enyɔ loo nɔ́ ɔ kulaa ngɛ Betlehem kɛ e he kɔpe ɔmɛ a mi, ejakaa ni leli ɔmɛ de lɛ ke hlami dodoe ɔ je e he kpo kɛ tsɔɔ mɛ maa pee jeha enyɔ mi loko ji a kɛ ba e ngɔ ɔ nɛ. 17Yi mi wami ni tsumi nɛ Herode tsu nɛ ɔ ha nɛ gbami nɛ Yeremia gba kɛ fɔ si ɔ ba mi ke,

18“Ya ngɛ pɛe, nɛ a ngɛ gbenɔ kɔmɔ yee ngɛ Rama.

Rahel ngɛ ya foe wawɛɛ nɛ e kplɛɛ we kpatami,

ejakaa e bi ɔmɛ tsuo gbo.”

19Benɛ Herode gbo ɔ, Mawu bɔfo ko ba je e he kpo ngɔ tsɔɔ Yosef ngɛ Mizraim ekohu nɛ e de lɛ ngɛ nlami mi ke, 20“Moo te si nɛ o kpale bimwɔyo ɔ kɛ e nyɛ ɔ kɛ ho Israel zugba a nɔ ya ekohu, ejakaa nihi nɛ ngɛ jokuɛ ɔ hlae nɛ a gbe ɔ be je mi.”

21Amlɔ ɔ nɔuu nɛ Yosef wo Maria kɛ Yesu kɛ pue blɔ kɛ ho Israel zugba a nɔ ya. 22Se benɛ a yaa ngɛ blɔ ɔ nɔ ɔ, Yosef tsui ya po benɛ e nu kaa nɔ nɛ ngɛ Herode nane mi yee ɔ ji e bi Arkelao. Kɛkɛ nɛ bɔfo ko ba de lɛ ngɛ nlami mi ekohu ke a ko ya Yudea. Enɛ ɔ he je ɔ, a ho Galilea zugba a nɔ ya nɛ a ya to kɔpe ko nɛ a tsɛɛ ke Nazaret ɔ mi. 23Nɛ enɛ ɔ ba mi kaa bɔ nɛ gbali ɔmɛ de kɛ fɔ si ke, “A ma tsɛ lɛ ke Nazaret no” ɔ.